Mboe 97:1-9

¹Yooba, ni king biibi ŋonoono ta ikamam peeze pa koroŋ ta munŋaana men. Tana niom tomtom ta karao pa toono ta boozomen na, leleyom ambai. Mi niom mutumutu ta munŋaana men ta karao pa tai na, menmeen yom.

²Yooba isombe iswe itunu, na imbotmbot lela miiri tieene gabgapŋana mi imar. Peeze kini, ina imender se mbulu kini ndeeŋeŋana. Pa ni imendernder pizin tomtom mi iurpewe pataŋana kizin.

³You kini imuŋmuuŋgu pini, mi ikanan ka koi bizin ma timap lup.

⁴Ni ikamam ma lele ikimitmit, mi lolo kini iwenweene. Tabe toono ire, to itortoori kembei moori ta ikamam be ipeebe i.

⁵Yooba, ni biibi ta imborro toono ta boozomen. Sombe imar igarau na, you kini inenne zin abal ma tirereere kembei ta yok ma tila len.

⁶Koroŋ ta timbotmbot sala maŋaanaŋana na, tizzoyaryaara mbulu kini ndeeŋeŋana. Mi karkari ta boozomen tire mburaana mi mbulu kini ndabokbokŋan ta zaana biibi pa i.

⁷Tana zin wal ta so timbesmbeeze pa merere pakaamŋan mi nin zze pa ke teeteŋan ta koroŋ ŋonoono som na, Yooba ikam zin ma kan miaŋ. Pa mburaana ilip pa merere ta boozomen. Tana wal tana merere kizin tilek kumbun pini tomini.

⁸O Yooba, nu mendernder pizin tomtom mi uluulu zin pa pataŋana kizin. Tana zin wal ki Sion tileŋ urum na, lelen ambai kat. Mi kar ta boozomen ki Yudea menmeen zin.

⁹Pa Yooba, nu ta Anutu kor kana kat. Nu mborro toono ta boozomen, mi lip kat pa merere ta munŋaana men.