Mboe 20:1-8

¹Mboe ki Dabit Nu sombe mbotmbot la pataŋana leleene mi taŋroro Yooba, na ni ko ileŋu mi iuulu u. Anutu ki Yakop ko iwitu, mi iuru sala kor. Naso kom koi bizin tirao be timbuulu u mini som.

²Anutu ko imbot urum kini potomŋana ta Sion na, mi iŋgo ulaaŋa sa pu mi ipombolu.

³Pa koroŋ boozomen ta nu kamam pini na, ni mataana iŋgalŋgal. Mi leleene ambai pa patoronŋana boozomen ta nu nenne sala you na.

⁴Tana koroŋ boozomen ta so lelem pa, na ni ko ikam pu. Mi ŋgar boozomen ta lelem iur pa na, ni ko ikam ma iur ŋonoono.

⁵Kaimer, nu sombe lip pa malmal, to niam ko amyotyooto ma leleyam ambai kat. Mi amkam kawaala pakaana mi ampabilbil, mi menmeen yam ma ampakur Anutu kiti zaana ma isala kor. Mi koroŋ boozomen ta nu sombe wi Yooba pa, na ni ko ileŋ la kalŋom mi ikam pu.

⁶Iŋgi nio aŋute: Yooba ko ikamke king ta ni itunu iroogi mi iuri pa uraata na. Ko imbotmbot lele kini potomŋana ta saamba a, mi ileŋ suŋŋana ki king mi iuuli. Ko iswe mburaana, mi namaana woono ikam uraata bibip bekena ikamke i.

⁷Wal pakan nin se pa karis kizin ta malmal kana i, mi tipase pizin. Mi pakan nin se pa hos kizin. Tamen niam na, niyam se pa Yooba Anutu tiam mburaana, mi ampase pini be iuulu yam.

⁸Tana zin ko titutkat kumbun ma timelmel. Mi niam, nako amparaama ma tuŋ mi amender mbolŋana.