GWAY GI IDAWUU’D 20:1-8

¹Tap̱a midi thoḵ /e ’twa/ mo ka tee jin ṯoju /e bwa mo. Dhali gway ma Arumgimis ma Yakuub mo tani a’di midi cesh /e ka p̱o/ mo.

²Dhalki a’di hashki /e mowoṯẖ ’peni mo jin ḵogu mo dhali c̱i /e mo ma thip̱ ’pena Sihyuun mo.

³Dhalki a’di ka’da ris tom pini kun c̱ina /e ki me’d e mo mmo’ciṯẖ ’kus mo, dhali kar /e ki mo ma ’the mo gom to kun ’ciṯẖkina /e ’kus mo mmomiiya bas mo. Doshi ma dhali ’cunycuri yan mo.

⁴Dhalki a’di c̱i /e a’di jin gwon ma dum pini mo dhali thima ris tom pini kun thosonkina /e is mo.

⁵Dhalki aman wola cuuwa/ mo gom bwaŋ ’kunyka/ ap̱o/ mom pini jin p̱ina /e mii e mo dhali ki gway ma Arumgimis bana mo tani dhalki ana thuma bereḵ bana mo. Dhalki Tap̱a a’di thimi’da ris mo ma ’thom pini mo.

⁶Dhali aha/ misha ki Tap̱a a’di midi woṯẖ jim piti jin ’koshkunu ki monyca mo. A’di midi thoḵ a’di ’twa/ mo ’peni momis piti jin ḵogu mo ki dhan mo ma dem dem jin p̱inu mii e mo ki me’da bim poros piti mo be.

⁷Kun tiya dhu ’ba/ ki ca mo goma risa arabiyya kun dira shumarum mo, dhali goma ris shumarum mo. Hili ana dhuna ’ba/ ki ca gom gway gi Tap̱a Arumgimis bana mo.

⁸Uni mini ’tuḵ mo dhali ṯa’k mo hili ana mina cu mis mo dhali dosh ki bimbir mo.