Mbouŋ To Yes Israela 20:1-8

¹Mbouŋ to David Saawe tau ighe yo uleep ila pataŋani loolo, Yoova pale ilooŋ suŋuuŋ tsio ve iuul ghom. Maaron to Yakop, i eeza tiina pa tapiri ve poia tooni. I pale imin sigheu payo ve iŋgin ghom uleep poi.

²Maaron ileep ila rumei tooni patabuyaaŋ izi loloz Zion. I pale iuul ghom ve ipalot ghom.

³I aat maata iŋgal watooŋrau tsio tisov. Irau loolo iveegh pazi mako. Watooŋrau tsio tau yav ighan dodolin zi, ene tighamu loolo poia.

⁴Ve gabua tau yo lolom pani na, i aat igham payo. Ve ŋgar isov tau lolom ighur ughe ugham zi na, i pale igham anooŋa ivot.

⁵Murei, saawe tau yo uliiv koiamŋa, yei pale lolomai poia kat ve nisir. Pale nigham pilak tsiei ve nisik zi ilala ilamlam, ve nipait Maaron toit eeza toman tintinmai. Gabua naol isov tau yo ughason Yoova pani na, i pale ilooŋ ghom ve igham payo.

⁶Ŋgarig gha nawatagh: Yoova pale iuul kinik tau i tauu ighuru pa uraat na. I pale ileep izi nugh tooni patabuyaaŋ sambam, ve ilooŋ suŋuuŋ tooni, ve ipaloti pa tauu tapiri. Leso iliiv koiŋa tisov.

⁷Zeran siriv tinumeer karis toozi to malmal, ve siriv tipakur zi pa hos toozi. Eemon yei ninumeer Maaron tsiei Yoova. I eeza tiina pa tapiri ve poia tooni.

⁸Tauvene koiamaiŋa pale aghezi pusukia ve titaptap. Eemon yei pale niburig ve niyooz tuŋia pa malmal.