MATIU 8:13-27

¹³Akũ Yesu pì sozanↄ gbɛ̃ zↄ̃kↄ̃ↄ pìinɛ: Ǹ tá bɛ. À kɛnnɛ lákũ n ma náani kɛ̀ nà. Akũ a zĩkɛrii pì gbãna kũ̀ gↄrↄ kũ̀a gↄ̃̀nↄ.

¹⁴Yesu gɛ̀ɛ Pita bɛa, akũ à è a nanↄ da wútɛna, àtɛn mɛ̀wãna kɛ.

¹⁵Kũ à ↄ nà a ↄa, akũ a mɛ̀ yĩda kũ̀, akũ à fùtɛ à pↄ́ble kɛ̀nɛ.

¹⁶Kũ ↄkↄsi kɛ̀, akũ ò sùnɛ kũ tãnadenↄ dasidasi, akũ à tãna pìnↄ gòḿma kũ yã'onaao, à gyãrenↄ wèrekↄ̃a ń pínki.

¹⁷Lɛn yã kũ annabi Isaya òo kɛ̀ lɛ à pì: À ó gbãnasarikɛ sɛ̀, à ó gyãnↄ kɛ̃̀wá.

¹⁸Kũ Yesu è pari kàkaraai, akũ à pì a ìbanↄnɛ: Ò bikũ sɛ̀bɛɛ bara.

¹⁹Akũ ludayãdannɛri ke sù à pì Yesunɛ: Dannɛri, gu kũ ntɛn gɛ́n sĩnda pínki manigↄ̃ tɛ́nyĩ.

²⁰Yesu pìnɛ: Gbɛ̃gbonnↄ ń tò vĩ, bãnↄn ń sà vĩ, Bisãsiri Nɛ́ sↄ̃ à ĩampaki vĩro.

²¹Akũ ìba pãnde pìnɛ: Dikiri, ǹ tó ari ma de kpágui gĩa.

²²Akũ Yesu pìnɛ: Ǹ tɛ́mai. Ǹ tó gɛ̀nↄ ń gɛ̀nↄ vĩ.

²³Yesu gɛ̃̀ gó'itɛ gũn, akũ a ìbanↄ tɛ̀i ò dà zɛ́n.

²⁴Kãnto zàga'ĩa gbãna kàka sɛ̀bɛla, í tɛn vĩvĩ àtɛn káka ń gón. Yesu tɛn i o,

²⁵akũ a ìbanↄ nài, ò a vù ò pì: Dikiri, ǹ ó sura ba, ótɛn kakatɛmɛ.

²⁶Akũ à pìńnɛ: Ludanaanikĩanadenↄ! À kɛ̀ dera á vĩna vĩ lɛɛ? Akũ à fùtɛ à gì ĩanɛ kũ ío, akũ gu kɛ̀ kítikiti.

²⁷Yã pìi bò gbɛ̃ pìnↄ sarɛ ò pì: Gbɛ̃ kpate taka burin dí? Bee ĩa kũ ío dì a yã mamɛ.