Metiu 8:13-27

¹³Ano Jises tiye ili ta ndramak batun tinan tiri lau ta bahun, “Ou ala kon, saba lakou ou aseken, ndramesekei in hamon ta budon tam tinan handru.” Eme ya ndramak ta ndrahu so-ok tan ndramwenen ja na le liliy.

¹⁴Na len Jises edek eme ili asiu ta Pita, iy atou salahu Pita ibo sik. Badan nyarahan ma iy amadin in bada sau.

¹⁵Jises eme tawi le minen ma badan nyarahan nane iu, ma badih doh suri iy le eme loke, ma iy amekes na Jises nyamon.

¹⁶Mirihik kon anya ka beyeh, ya iri lau atiye lau solo-an nane balik udu bwele-e iri ame hawe Jises, eme ma iy asehek le sahou ili tiri malawin ndra-in, ma tikahei iri au, ma iy mesekei iri lau mari amwenen ja.

¹⁷Idoh ta amekes sahou ta propet Aisaya ndrasihidiy, asahan handru: “Iy amwenen bwese-ei sik tataha ma iy andrei sik ndra-in tataha iu i len.”

¹⁸Jises atou iri lau solo-an labai awudi iy, eme ma iy tiye i toro lau tan au ala kapa gwa bilisiu.

¹⁹Ano ndramak ari ta leheya kandriyen malen eme hawe Jises, ma iy tiye tan i buku doh, “Ndramak ta leheya, loboho heh ou ala aliy, jo kameh in le hamon tam.”

²⁰Jises tiye i tan i buku doh, “Iri mwi badu lokei, munu iri udu aliy, ya iri sirih ale awi iri ta matinou udu aliy. Arile, jo Nadu Ndramak Awas, badeh, ari ndrahu matinou tek, bwe.”

²¹Ano ndramak ari badu hamon tan eme tiye i ta Jises, “Laban, jo kili kihi tama op. Ano jo barawek bara-en hamon tam.”

²²Arile Jises tiye i tan i buku doh, “Ndri-iy ai! Ou ame a-en hamon tek, ya iri lau amak badeh, kado gwek. Idah kameh, iri lau badu hawe iri barala bara-eh iri.”

²³Ano Jises sandroh ili bolo ndron ra-ei, ma hawe oro lau tan ma ronoh la-uh a-en hamon tan.

²⁴I le mani tur, siyer laba tinan atohou eme bwele-e gwa li Galili, eme ma bayau atohou eme bolo ndron. Arile Jises amadin.

²⁵Ya oro lau tan ala mete-ei iy, ma oro tiye i buku doh, “Laban, ou aseben to! Bwe kameh to katuh ai!”

²⁶Jises tiye i buku doh, “Ado budon tado nadu bwisik labai, i buku sah ado anoh tinan labai?” Ano iy suri iy eme loken, ma tiye sahou boto-on i ta siyer ma hawe bayau, eme ma siyer ma bayau amondrei i le rasan.

²⁷Eme ma oro lau tan mani oro atur, ma oro ndremenya oro, “Are ndramak i buku iy dah? Ya siyer ma bayau anuhun iy!”