Mateo 23:3-24

³Ruma kꞌu riꞌ, riꞌix chiꞌana janipa ri kakibꞌiꞌij puwi wa tzijpixabꞌ; noꞌj miꞌan kꞌu iweꞌix ri na utz taj kakiꞌan rike, ma junwi ri kakiꞌan rike chwa ri kakikꞌutu.

⁴»Ri kitaqanik rike e pachaꞌ nimaq taq eqaꞌn lik al y lik kꞌayew rukꞌaxik; kekitaq kꞌu ri winaq chaꞌ kakeqaj bꞌi yey rike na kakaj tane kꞌana ketoꞌbꞌ rukꞌ waꞌ.

⁵»Ronoje taq ri kakiꞌano xew e chaꞌ kebꞌilitaj kuma ri winaq. Kakiꞌan che kibꞌ pachaꞌ lik e jusukꞌ chwach ri Dios; ruma kꞌu laꞌ, e ri kifilacterias ximital chukurusil ri kipalaj y che ri kiqꞌabꞌ, lik kakiꞌan nim che; yey taq ri cordón karabꞌabꞌ che ri kiqꞌuꞌ, kakiꞌan lik naj raqan che.

⁶Pa taq ri sinagogas y pa taq waꞌim, lik e kukꞌul kikꞌuꞌx ketzꞌuyiꞌ chupa ri tzꞌulibꞌal ke ri lik kꞌo kiwach.

⁷Yey lik kukꞌul kikꞌuꞌx kayaꞌ rutzil kiwach pa kebꞌilitaj wi y kabꞌiꞌx chike: “¡Lal tijonel!”

⁸»Ekꞌu riꞌix miwoyꞌej kabꞌiꞌx “¡Lal tijonel!” chiwe, ma xa jun ri tijonel iwe, waꞌ e ri Cristo. Yey ruma Rire xixuꞌan iwatz-ichaqꞌ iwibꞌ.

⁹Mibꞌiꞌij “Nuqaw” che junoq wara che ruwachulew, ma xa jun Riqaw kꞌolik, y waꞌ e Riqaw kꞌo chilaꞌ chikaj.

¹⁰Miya luwar kabꞌiꞌx “¡Lal Aj Kꞌamal Qawach!” chiwe, ma xa jun ri Aj Kꞌamal Iwach, waꞌ e ri Cristo.

¹¹»Ekꞌu ri kꞌo uwach chixoꞌlibꞌal riꞌix e chuyaꞌa ribꞌ kuꞌan nimanel iweꞌix.

¹²Ma china ri lik kuꞌan nim che ribꞌ, ri Dios kuqasaj uwa uqꞌij; noꞌj china ri kuꞌan chꞌutiꞌn che ribꞌ, ri Dios kuyak uqꞌij.

¹³»¡Lik kꞌu toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! E tzꞌapim alaq ri okibꞌal re rutaqanik ri Dios petinaq chilaꞌ chikaj chaꞌ na jinta kꞌo kebꞌok bꞌi; ma na kok tane ubꞌi ralaq y na kaya tane alaq luwar chike jujun chik kebꞌok bꞌi.

¹⁴»¡Lik toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! Ma kamaj alaq ri kocho rixoqibꞌ e malkaꞌnibꞌ. Yey chaꞌ na kaqꞌalajin ta ri na utz taj kaꞌan alaq, e kawererej alaq unimal chꞌabꞌal echiriꞌ kaꞌan alaq orar. Ruma kꞌu wa kaꞌan alaq, lik unimal kꞌaxkꞌolil kakꞌul na alaq echiriꞌ kaqꞌat tzij pawiꞌ alaq ruma ri Dios.

¹⁵»¡Lik toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! Ralaq kaqꞌaxuj alaq uwi taq mar y kabꞌinibꞌej alaq taq ri luwar che ruwachulew chaꞌ juna tikawex kuꞌan tijoꞌn alaq. Yey echiriꞌ uꞌanom chi tijoꞌn alaq, kaꞌan alaq che ri tikawex kalaj más itzel uwachlibꞌal chiwach ralaq.

¹⁶»Lik toqꞌoꞌ wach ralaq alaq pachaꞌ potzꞌ kꞌamal kiwach jujun chik, ma kabꞌiꞌij alaq: “We kꞌo junoq kujikibꞌaꞌ uwach juna tzij pa rubꞌiꞌ ri Rocho Dios, riꞌ na chirajawaxik ta che kuꞌan ri ubꞌiꞌim; noꞌj we kujikibꞌaꞌ uwach juna tzij pa rubꞌiꞌ ri oro re ri Rocho Dios, riꞌ chirajawaxik che kuꞌan janipa ri ubꞌiꞌim” kacha alaq.

¹⁷»¡Na jinta naꞌoj alaq y alaq potzꞌ! ¿Pachike ri más kꞌo uwach? ¿E ri oro o e ri Rocho Dios, ri kuꞌan santo che ri oro?

¹⁸Jenewaꞌ ri kabꞌiꞌij ralaq: “We kꞌo junoq kujikibꞌaꞌ uwach juna tzij pa rubꞌiꞌ raltar, na chirajawaxik ta che kuꞌan ri ubꞌiꞌim; noꞌj we kujikibꞌaꞌ uwach juna tzij pa rubꞌiꞌ ri qasaꞌn kꞌo chwi raltar, riꞌ chirajawaxik che kuꞌan janipa ri ubꞌiꞌim” kacha alaq.

¹⁹»¡Sachinaq ri naꞌoj alaq y alaq potzꞌ! ¿Pachike ri más kꞌo uwach? ¿E ri qasaꞌn o e raltar ri kuꞌan santo che ri qasaꞌn?

²⁰Ma china ri kujikibꞌaꞌ uwach juna tzij pa rubꞌiꞌ raltar, riꞌ na xew ta kuꞌan pa rubꞌiꞌ raltar, ma kuꞌan pa rubꞌiꞌ ronoje ri kꞌo chwi raltar.

²¹Jekꞌulaꞌ, china ri kujikibꞌaꞌ uwach juna tzij pa rubꞌiꞌ ri Rocho Dios, na xew ta kuꞌan pa rubꞌiꞌ ri Rocho Dios, ma riꞌ e kuꞌan tzij pa rubꞌiꞌ ri Dios, ri Jun jeqel chiriꞌ.

²²Jekꞌulaꞌ, china ri kujikibꞌaꞌ uwach juna tzij pa rubꞌiꞌ ri kaj, riꞌ kuꞌan pa rubꞌiꞌ ri tzꞌulibꞌal pa kataqan wi ri Dios y kuꞌan pa rubꞌiꞌ ri Jun tzꞌul chupa.

²³»¡Lik toqꞌoꞌ wach ralaq alaq aj kꞌutunel re ri tzijpixabꞌ y alaq fariseos! ¡Xa kebꞌ palaj alaq! Ma kaya alaq che ri Dios ri diezmo alaq re ri arweno, re ri anix y re ri kominox. Noꞌj na kok ta alaq il che rukꞌuꞌxibꞌal ri Tzij Pixabꞌ re ri Dios: Waꞌ e ri kaꞌan alaq ri usukꞌ, ri kakꞌut alaq ri kꞌaxnaꞌbꞌal kꞌuꞌx alaq chike jujun chik y ri kakubꞌiꞌ kꞌuꞌx alaq rukꞌ ri Dios. Lik chirajawaxik kꞌu riꞌ kaꞌan alaq taq waꞌ, junam rukꞌ ri kaya ri diezmo alaq.

²⁴»¡Alaq pachaꞌ potzꞌ kꞌamal kiwach jujun chik! Ma ri kaꞌan alaq e pachaꞌ junoq lik kuchajij ribꞌ chaꞌ na kubꞌiqꞌ tubꞌi tobꞌ xa juna ralko us, pero kubꞌiqꞌ bꞌi ri nimaq taq awaj pachaꞌ ri camello.