Matai 23:3-24

³Amboac tonaŋ biŋ samob, taŋ sêsôm gêdêŋ amac naŋ, ajop to amansaŋ. Tageŋ gêŋ, taŋ sêgôm naŋ, aŋgôm atom, gebe êsêac sêsôm gêc aweŋsuŋgeŋ, mago tauŋ sêgôm atom.

⁴Êsêac sêkic gêŋ ŋawapac ma sêu gêsac lau magiŋm, ma êsêac tauŋ segeŋ tauŋgeŋ.

⁵Êsêac sêgôm nêŋ gêŋ samob kêtu ŋamalac sêlicŋageŋ, sebec naŋeŋeŋ kapôêŋ mecŋa to sêsô ŋakwê ŋalêsô baliŋ.

⁶Ma êsêac têntac gêwiŋ sebe sênac tauŋ mata-mata gebe sêŋgôŋ ŋamatageŋ aŋga gamêŋ sêniŋ gêŋŋa to aŋga lôm amboac tonaŋgeŋ,

⁷ma sebe lau aweŋ ênac êsêac aŋga malacluŋ to sêsam êsêac gebe ‘Mêtêmôkê’.

⁸Mago sêsam amac gebe ‘Mêtêmôkê’ atom, ŋac tageŋ kêtu nêm mêtêmôkê ma amac samob atu ŋalasitêwaigeŋ.

⁹Ma asam ŋac teŋ aŋga nom gebe ‘Tamemi’ atom, amac Tamemi tageŋ tê gêmoa undambê.

¹⁰Ma sêsam amac gebe “Laumata mêtêŋa’ atom, gebe amacnêm laumata mêtêŋa tageŋ tec Kilisi tau.

¹¹Amacnêm ŋac kapôêŋ atu amacnêm sakiŋwaga.

¹²Teŋ embe etoc tau sa, go Anôtô êkôniŋ eŋ ma teŋ embe êkôniŋ tau, go Anôtô etoc eŋ sa.

¹³“Ojaê amac dansaŋtêna, biŋsutau to Parisaimêŋ, tec êlai gamêŋ undambêŋa auc gêdêŋ ŋamalacgoc. Amac taôm oc asô ana atom, ma lau taŋ sebe sêsô sêna naŋ, tec amac akô êsêac auc sêwiŋ.

¹⁴“Ojae amac dansaŋtêna, biŋsutau to Parisaimêŋ, tec ajaŋgo awêtucnêŋ andu to ŋawaba ŋawaô, mago akwa taôm auc ŋa mec baliŋ. Ŋagêjô oc êtap amac sa êlêlêc.

¹⁵“Ojae amac dansaŋtêna, biŋsutau to Parisaimêŋ, tec ajac laoc gwêc to masaŋmgeŋ abe anam ŋac jaba tageŋ ôkwi êtu Juda. Ma embe anam eŋ ôkwi su, oc aŋgôm eŋ êtu lamboam ŋakêlêndiŋ ŋalatu êlêlêc amac taôm su.

¹⁶“Ojae amacmêŋ tec matempec, mago abe awê lau. Amac asôm gebe ‘Ŋac teŋ embe êtôc lêma êpi lôm dabuŋ, oc êŋgôm nê biŋ ŋanô êsa atom. Ma tageŋ embe êtôc lêma êpi lôm dabuŋ ŋagold, tonaŋ tec oc êŋgôm ŋanô êsa.’

¹⁷Meloc to matempec ŋanô amac. Gêŋ ondoc ŋanô, gold me lôm dabuŋ, taŋ gêgôm gold kêtu gêŋ dabuŋ.

¹⁸Ma teŋ gebe ‘Teŋ embe êtôc lêma êpi altar, oc êŋgôm nê biŋ ŋanô êsa atom. Ma tageŋ embe êtôc lêma êpi da, taŋ gêsac altar tau ŋaô, tonaŋ tec oc êŋgôm ŋanô êsa.’

¹⁹O matempecac, gêŋ ondoc ŋanô, da me altar, taŋ gêgôm da kêtu dabuŋ.

²⁰Ŋac embe êtôc lêma êpi altar, naŋ oc êtôc êpi altar tau to gêŋ samob, taŋ gêsac ŋaô naŋ êwiŋ.

²¹Ma teŋ embe êtôc lêma êpi lôm dabuŋ, naŋ oc êtôc êpi lôm tau to ŋac, taŋ gêmoa lôm ŋalêlôm naŋ êwiŋ.

²²Ma ŋac teŋ embe êtôc lêma êpi undambê naŋ oc êtôc êpi Anôtônê lêpôŋ to ŋac, taŋ gêŋgôŋ ŋaô naŋ êwiŋ.

²³“Ojae amac dansaŋtêna, biŋsutau to Parisaimêŋ, amac embe atap laki to gwêc ma môsi 10-10 sa, go akêŋ ŋateŋ êtu da. Ma biŋsu ŋakoleŋ ŋanô tonec biŋgêdêŋ to taêm walô lauŋa ma akêŋ gêwiŋ, tec awi siŋ, Daŋgôm teŋ ma dawi teŋ siŋ atom.

²⁴Amac matempec, mago abe awê lau. Embe aniŋ gwada sauŋsauŋ, go ajaliŋ ŋatêkwa ŋapepgeŋ, ma bôc tec aeŋ totêkwageŋ.