Markuj 6:22-37

²²Ari, nain Erodiaj jeripein ap kodo kakalek, kamakamait Erodej o me momod re a ko ni tepel. Nanmarki ap majani on jeripein o: Poeki re i meakot, me koe mauki; i pan ki on uk.

²³I ari kotin kaula: Meakot koe poeki re i, i pan ki on uk, lao lel apali en ai wei.

²⁴A ap pedoi wei indan in a: Da me i pan poeki? I ari inda: Mona en Ioanej jaunpaptaij o.

²⁵I ari puredo, madan don ren nanmarki o, poeki, inda: I men, komui en madan kotikido mona en Ioanej jaunpaptaij nan eu dal en!

²⁶Nanmarki ap topwaila kaualap, a pweki a kotin kaula o pweki ir, me ian i ni tepel ko a jota men kapapalawei.

²⁷Nanmarki o ap madan poronela jaunpei amen, majani, mona en wijikedo.

²⁸A ap kola, lepuke jan mona nan imaten, ap wa kodo mona o nan dal eu ap ki on jeripein o; jeripein o ap kion in a.

²⁹A tounpadak kan lao ronadar, re ap kodo ale kalep a, nekidala nan joujou o.

³⁰Wanporon oko kapokon irail pena ren Iejuj, potoan on i meakaroj, me re wia o me re kawewedar.

³¹A ap kotin majani on irail: Komail kelepe don jap tan; kamol maj. Pwe me toto purepure ir; irail ari jota pijokki on mana.

³²Re ap takeda jop kelep kolan jap tan.

³³A me toto kilan ar majalwei; me toto aja irail. Ir ari japal jan kanim karoj audi mo a ap pokon pena re a.

³⁴A Iejuj lao keredi jan nan jop o, ap majani aramaj toto, ap kupura ir ala; pwe likamata irail jip, me jota jile parail. A ap kotin tapiada kawewe on irail me toto.

³⁵Waja lao jautik penaer, japwilim a tounpadak kan ap poto don re a, potoan on: Jap tan eu met, ap waja jautiker;

³⁶Re kotin kadar ir pajan; pwe re en paanewei jap koren kan o kijin kanim akan o pein netiada kan ar prot, pwe jota man ar tunole meakot.

³⁷A ap kotin japen majani on irail: Komail katunole ir! Re ap potoan on i: Je en kola en netiada prot me denar riepuki, ap ki on irail ren tunole?