San Marcos 6:22-37

²²Sun payura Herodíaspa pashune kumira unamkin nap kit ku kimɨzta. Herodeskas paiña izmuruzkas kwisha wat kulazi. Katmizna sun manta kimmikane Herodíaspa pashura kaizta: —Chiwazha paikukane, sunpawa tanash, kizta.

²³Mamasa an tɨnta ussa ka kin namta: —Chiwazha paikukane, sunpawa tanash. Na kakwa mɨj aizpa tanash, kizta.

²⁴Usne tas puz kit akkuhshta mɨmara: —¿Chima paikwanash? kizta. Herodíasne pashura kaizta: —Juan munnammikawa kɨzpu tɨt kit karanka, kizta.

²⁵Sun urain musittune manta kimmikakin ãĩn nap kit paikwat kit kaizta: —Mamin Juan munnammikawa kɨzpu pashu. Pɨlattura unari, izna, kizta.

²⁶Sun manta kimmikane kwisha tayalta. Usne ussain minta: “Ap izmuruzne na kaizta aizpa mɨara. Nane uspa iztakin na kaizta aizpa kimanash kaizsachish,” minta.

²⁷Suasne manta kimmikane suldaru awara ɨninta, Juanpa kɨzpu karanpa.

²⁸Usne kajchira ɨt kit tɨmpukin kɨzpu tɨtta. Usne pɨlattura kɨzpukasa karat kit musittura mɨlat. Musittune akkuhshta mɨlara.

²⁹Sun mɨarawane, Juanpa kammuruzne ɨat kit ussa muat kit pilta kamaara.

³⁰Mamaz sura kaiyarawane, sun doce ɨnintuzne Jesús tura wanmakkat kit ussa chiwazha kiarɨt aizpakas chiwazha kamtanarɨt aizpakas kaizara.

³¹Kwisha akkwan awa Jesús tukin aarɨt akwa, uspane kuasachi. Katmizna Jesúsne usparuza kaiznara: —Mamaz sura, awa tuchira, ɨzhain, pitchin kwaizkulana, kiznara.

³²Suasne Jesúskas paiña kammuruzkas kanuawara ɨara, pul surakima.

³³Akkwan awane uspa ɨamtura izat kit ussa piankaara. Sua pɨpuluras awane mittɨwara ãĩn chaara, uspakin an ñancha piannaana. Uskasa wanmakkaara.

³⁴Kanuaras kihshtawane, Jesúsne akkwan awaruza iznat kit usparuza kiwainshinara, uspa pɨrikukana izarɨt akwa, uspa kwira kimchiruzkana izarɨt akwa. Usne usparuza akkwan kamtanamɨzta.

³⁵Nashtɨmtuasmin, paiña kammuruzne ussa aat kit kaizara: —Sun sune pul i. Awa purachi. Nashtui.

³⁶Usparuza ɨninnari, ɨanapa, kasha sura kasha pɨpulura chiwazha paitkuanapa, kizara.

³⁷Usne usparuza sɨnkanara: —Umin kumira kwinnari, kuiznapa, kiznara. Uspane ussa kaizara: —Sunpawa pan paitkwashitne, aune, paas cien payurakima kal kitpamakpas. Aune sunpawa pial mɨjchimakpas, awaruza kumira kwinnana, kizara.