Mark 4:11-27

¹¹Ma Iesu i paribelei i pa, “God ana vigulau ana kaua mamae govaḡana; taumi i vieḡemi ma rava au tano maemaei, taui aiwai anatapui awanainei e paripari-verei.

¹²Lamna ana kauei da wariaḡa peroveta aiwai i girugirumia ina tupua:

¹³Anina ma Iesu i riwei i pa, “Wei awanainei a babani ma anona eḡa ota aramanei bo? Ma awanaina ḡelaui menanare ona aramananei?

¹⁴Taupaewa, God riwana, rava anatapui e paripari-verei.

¹⁵Rava ḡelaui orai i bagibagi me etanai. Riwa au tepana e raurauei, wate maratagogi Satan e nenei da riwa rava au orai e vaivai-tawanei.

¹⁶Ma rava ḡelaui orai me doa viḡaiḡaimana. Taui, riwa i nonori ma maratagogi ana nuaiaii riwa e vaivaia.

¹⁷Wate warami eḡa da eḡa ita mamae guratana. Ma maranai nuabola bo rau-iviapoapoe e nenei taui awari, aubaina taui ai tumaḡana God awarina e tereterei. Taui maratagogi e peupeu.

¹⁸Rava ḡelaui orai me pei, modu donadonai au orai e gogogolana. Taui anina riwa e nononori.

¹⁹Wate lawana ai nuabola ma mane ai nuavainana ma kaua ḡelaui ai au nuaiai e ruirui ma God riwana e lavalavani da eḡa ita uaua.

²⁰Ma ḡelaui, taui me pei doa au aiaina i peu. Taui, lamna anina riwa e nononori ma e vaivai-kauei ma e uaua: ḡelaui 30 ma ḡelaui 60 ma ḡelaui 100.”

²¹Iesu i riwei i pa, “Rava, eḡa rampa ita neineiai da iriga au gabaurina ita tereterei bo vatara au gabaurina ta pa? Rampa ana au anikiala e tereterei ta pa?

²²Kaua mamae govaḡai, anataputapui a vieḡai ma kaua govagovaḡai nanarena ana vieḡai.

²³Mepa da taniḡami e mamae, riwa ona nonori!”

²⁴Iesu i riwa i pa, “Aiwai o nononoria ona rautaniḡanana-kauei, ruva o ruveruveia, God nanare awarimi ina ruvai ma ḡelauna ina tavipotoi.

²⁵Lamna aubaina, mepa da riwau ona aramanei, tau ḡelauna ma ḡelauna ana veremi. Ma taui eḡa ita aramanei, lamna aiwai aburuna i nononoria, ina vine-boai.”

²⁶Iesu e ririwa i pa, “God ana vigulau me rava, witi peina au doa ita ravi-awawari.

²⁷Ma waguvara e matamatave ma maratom e vovomairi ma pei e gogogo ma e rarata. Wate aiwaiei e gogogo, tauna e vivinuanainei.