MAAKU 4:11-27

¹¹Akũ à pìńnɛ: Luda kpata kũ à bò a kĩnaa asiri kpàáwa àgↄ̃ dↄ̃, ama madì yã sĩnda pínki o gbɛ̃ kparanↄnɛ kũ yãlɛkↄ̃ananↄmɛ,

¹²de ògↄ̃ gwagwa pↄ́ke'enaa sari, ògↄ̃ sã kpákpa a dↄ̀rↄ dↄ̃naa sari, de òsun arɛ dↄ Ludaa, à ń durunnanↄ kɛ̃ḿmaro yãi.

¹³Akũ Yesu ń lá à pì: Á yã pì dↄ̃roo? Deran áni yãlɛkↄ̃ana ke dↄ̃ↄ?

¹⁴À ma! Búbari pìi Luda yãn àtɛn fã.

¹⁵Gbɛ̃kenↄ de lán zɛ́ gũn pↄ́wɛ bà, gu kũ ò Luda yã fã̀n. Tó ò mà, akũ Setan dì su à Luda yã kũ ò fã̀ ń tɛ́ pì síḿma gↄ̃̀nↄ.

¹⁶Gbɛ̃kenↄ de lán pↄ́wɛ kũ à lɛ̀tɛ gbɛ̀ sàraa musu bà. Tó ò Luda yã mà, òdi sí gↄ̃̀nↄ kũ pↄnnao.

¹⁷Zaakũ ò zĩni vĩro, òdi kɛ gↄrↄ plaro. Tó yã̀'ũmmana ń lé ke tó ò wɛ́ tã̀ḿma yã pì yãi, òdi fumɛ gↄ̃̀nↄ.

¹⁸Gbɛ̃kenↄ de lán pↄ́wɛ kũ à lɛ̀tɛ lɛ̀nↄ gũn bà. Ò Luda yã mà,

¹⁹ama andunia yã damukɛna kũ yena aruzɛkɛiio kũ pↄ́ kparanↄ nidɛnao dì nakaraḿma, akũ yã pìi dì gↄ̃ àree sari.

²⁰Gbɛ̃kenↄ de lán pↄ́wɛ kũ ò lɛ̀tɛ zĩtɛ manaanↄ bà. Òdi Luda yã ma ò sí, akũ òdi kɛ karana pↄ́ ũ, ń kenↄ baraakurikuri, kenↄ baaakↄ̃kↄ̃, kenↄ basↄsↄↄro.

²¹Yesu pìńnɛ: Òdi fitila na ò gbaka kútɛa ke ò ditɛ gádo gbáru yá? fitiladibↄↄ musun òdi dinloo?

²²Asiri ke kun kũ oni gí boaairo. Pↄ́ke kun utɛna kũ ani bo gupuraaro.

²³Gbɛ̃ kũ à sã vĩ à yã pì ma.

²⁴À pìńnɛ dↄ: À laakari kɛ yã kũ átɛn maa. Zaka kũ adì yↄ̃̀ońnɛn Luda ni yↄ̃oárɛ ani ɛra à karaárɛ dↄ.

²⁵Gbɛ̃ kũ à pↄ́ vĩ Luda ni karanɛ. Gbɛ̃ kũ à pↄ́ke vĩro sↄ̃, bee a fítinna kũ à vĩ Luda ni sía.

²⁶À pì dↄ: Kpata kũ à bò Luda kĩnaa de lán pↄ́wɛ kũ gbɛ̃ fã̀ bura bà.

²⁷Gwãani kũ fãnantɛ̃o bee tó àtɛn i o ke à bɛ̃nɛ, pↄ́wɛ pìi dì butɛ à zↄ̃kↄ̃ kũ, gbɛ̃ pìi dìgↄ̃ dↄ̃ lákũ àdi kɛ nàro.