Marka 4:11-27

¹¹O wii ɓe: —Onon, on ndokkaama faamde goonga tedduɗo haala Laamu Laamɗo oo. Kaa wonɓe sella ɓee, huunde fuu e banndol kaalaniran-mi ɓe.

¹²Ɗum waɗi so: «ana ƴeewa faa gasa tawa njiyataa, ana nana faa laaɓa paca tawa paamataa, sako ɓe tuuba so ɓe njaafee.»

¹³O wii ɓe: —On paamaali ngol banndol naa? Hono paamirton banndi goɗɗi ɗii fuu ndennoo?

¹⁴Aawoowo oo konngol Laamɗo o aawata.

¹⁵Yimɓe yogaaɓe ana nanndi e laawol ɗo aawdi ndii saami ɗoo. Ɓe nanan konngol ngol, oon wakkati fuu Ibiliisa warata so itta konngol aawaangol e maɓɓe ngol.

¹⁶Yogaaɓe ana nanndi e korokaaƴe ɗe aawdi ndii yuppii e muuɗum ɗee. Ɓe nanan konngol ngol, ɓe njaɓɓoroo ngol seyo oon wakkati fuu,

¹⁷kaa ngol walaa ɗaɗi e maɓɓe, wakkati gooto tan ngol wonata e maɓɓe. Wakkati mo ɓillaare naa torra hewti ɓe saabe konngol ngol fuu, ɓe njankiran.

¹⁸Yogaaɓe ɓee ana nanndi e nokku kebbe ɗo aawdi ndii saami ɗoo. Ɓee ngoni nanɓe konngol ngol,

¹⁹kaa sugullaaji aduna e koomti jawdi, kaɲum e giɗaaɗe yonki goɗɗe naatan e maɓɓe, cuuma konngol ngol, ngol laatoo dimarol.

²⁰Kaa ɗo aawdi ndii saami e leydi lobbiri ɗoo, ɓee ngoni nanooɓe konngol ngol so njaɓa ngol. Ɓe ndiman: yoga sowoo cowe capantati, yoga capanɗe jeegom, yoga teemedere.

²¹Caggal ɗum, Iisaa wii ɓe: —Won fuu kuɓɓoowo lampa so hippa hen saawal, naa soorna ɗum ley leeso? Wanaa sinndan ɗum naa?

²²Walaa fuu ko ɲooɓi ko ɓanngintaake, walaa ko suuɗii ko yaltintaake sella.

²³Jom nowru fuu yo nanu!

²⁴O wii ɓe kasen: —Tiiɗee e no nanirton haalaaji am ɗii nii! Sabi no etirton nii, non etirante-ɗon on ɓeydante duu.

²⁵Sabi jogiiɗo fuu ɓeydante, kaa mo walaa oo, fay seeɗa mo jogii oo teetete.

²⁶O wii kasen: —Laamu Laamɗo ana wa'i no neɗɗo cankuɗo aawdi e ngesa mum nii.

²⁷Caggal mum, ɗaanoo jemma daroo ɲalooma, no laatii fuu aawdi ndii fuɗan, mawna, tawa joomum anndaa no ndi mawniri.