Maol Amom Aposeli 28:9-24

⁹Aꞌi owaꞌ nandaꞌas naꞌamba owaꞌ, anis daias ailan inimbaisi awas nandaꞌasi safiꞌmai anen nandaꞌmas beten sataga boꞌwes wapani.

¹⁰Eaꞌ esis sasoꞌafa hiahaom fasimi aꞌowaꞌ. Ama afaꞌ waꞌi ogafeꞌ owaꞌ, sasoꞌafa hiahawes hiasi afaꞌ waowaolasi eaꞌ sofaꞌas sambeꞌmafas anop sip afaꞌ ogafeꞌapi.

¹¹Apaꞌ afaꞌ ataꞌ wape aomb wanemb ailan inimba. Ama main, walota sip apamba pagail ailan inimbai nogota atamba fufin luꞌwani nagaluwatai. Sip apamba Aleksandriai. Agilipa saꞌi sahomana owamana amom atom magape isag atogai, nogaopana anona god basoꞌamunai Sus. Eaꞌ afaꞌ wakwahogon wafeꞌ.

¹²Wafeꞌ wataga Sirakyus wape nimaguf wanif

¹³wakwaha anamba wafeꞌ wataga Regium. Ama nemaf fagagiꞌi fufin luꞌunai nalo nafiꞌi awin negembaꞌma, ama nemaf fagagiꞌi eaꞌ wataga anis basis Puteoli.

¹⁴Wambel ambalemba afaꞌ wati anis Kristen. Eaꞌ saꞌipafa wape walomas wik siꞌigai. Ama main, aꞌ wafeꞌ Rom.

¹⁵Esis Kristen sagape Romi sameꞌ basefa afaꞌ wafiꞌi, anis safiꞌi sotambel Maket wambel Apiusi, apaꞌ anis safiꞌi sotambel wambel agol agalemba sagaꞌi ifagw wanogw sandaꞌ fiꞌi feꞌ sagapaugwi. Eaꞌ satolofa ufiaꞌw. Pol nati esis, nandagala nanifela God okom ananimi ambanagem.

¹⁶Afaꞌ wafeꞌ wataga Rom, gavman Romunai naꞌi ahoꞌma Pol atona nogape anota ipat noloma anona soldia numafiana nogape atapina.

¹⁷Nimaguf wanif fafeꞌ ma eaꞌ, Pol nofalai amom agufumi Judai mafiꞌi mandakolas. Eaꞌ naꞌipam naꞌamba naꞌi, “Ipaꞌ sahope, aeꞌ ina andaꞌ anin mae ahambombaga epes apeꞌisi ma egesambala waf amom bafapapa apeꞌimii, owaꞌatin. Apaꞌ owaꞌ amom dembami Judai mandaꞌ kalabusima aeꞌ Jerusalem eaꞌ mandaꞌe afiꞌi lagof amom Romi.

¹⁸Amom Rom mameꞌ basefa kot aeꞌatai, aeꞌ basefa waf awafi kofagefa owaꞌatina mohe egagaꞌ. Eaꞌ maꞌi motagwahowe.

¹⁹Owaꞌ amom Juda mosambala basef ifimba. Naꞌamba deiꞌ aeꞌ ufiaꞌw ake ma egafeꞌ wahifiwi. Eaꞌ efala gavman dembinai Sisar ma nogameꞌ basefa kot aeꞌatai. Apaꞌ aeꞌ ina endakotima epes aeꞌasi ma anis maefah, owaꞌatin.

²⁰Basef kofagefa ifimba atif deiꞌ efalepa pafiꞌi. Aeꞌ aꞌi eseꞌepa anif basef. Aeꞌ ahapifif ape ehafa anen anamba apaꞌ Israel hiapai mape mogohafanai. Aeꞌ agahapifanai. Isimba atis kofagesa ma deiꞌ mandaꞌ sen inimba mowaꞌe.”

²¹Eaꞌ amom maꞌipana maꞌi, “Owaꞌ anom amam Judaimi mosapaꞌi anif basefa mogaꞌipafa inaꞌa, owaꞌatin. Eaꞌ ina anona aman Judainai nafiꞌi nape naꞌipafa andeandeꞌma naꞌi anif basef awafi ma inaꞌ, owaꞌatin.

²²Apaꞌ afaꞌ waꞌi ataꞌ omeꞌ nomonas ineꞌisi atisa malogol ineꞌigili. Afaꞌ ogawa, walemb hiagoma esis amam nematawa sandaꞌ basef awafi ma miniꞌap apamba ineꞌipi.”

²³Eaꞌ amam mandandepa anef nemafa amam hiami mugafiꞌmai Pol ipat ananitai. Eaꞌ mafiꞌi kuhimbita mape mape mataga wambomota, anen naꞌi basef kofagefa nawalapefa amom. Eaꞌ nawalapa basef alihifa epes sogawis nomona maol Godi nope Dembinai nugumafias. Anen nawalapa anif basefa muꞌuli fowaꞌ God nagasoꞌ Mosesafi faloma basef Godi amom profet fowaꞌ magaꞌiefi. Ama basef ifimba anen naꞌif banagambela nagasaꞌma ukup amamipi ma mogahapifa Jisas.

²⁴Anom mahapifana ma basef ananifi, apaꞌ anom owaꞌ mohapifanaea.