Aposol nup meme 28:9-24

⁹Mewö asuhuiga miaŋgöreŋök kawöl ambazip tosatŋi pakpak gölme jöhanŋe ahögeri, yeŋön mewöyök kaŋgotketka Polnöŋ Anutu köuluköiga ölöwaket.

¹⁰Yeŋön kalem könaŋi könaŋi gwötpuk neŋgiba mewö miaŋön göda qem neŋgiba malget. Könaŋgep waŋgenöŋ öŋgöbingö ahini, nalö miaŋgöreŋ köwet qakŋe köna malmalgö yuaiŋaŋgö osiini, mi memba neŋgöra waŋgenöŋ alget. Mewö.

¹¹Köiŋ karöbut teköiga waŋge kun qetŋi “Bem Siwisiwi” miwikŋaiget. Waŋge miaŋgö nunduŋe siwisiwi bemyahöt qetŋiri Kastor aka Poluks mietkö imutŋira memba meŋölöba alget kinohot. Waŋge miaŋön Ijipt kantrigö siti qetŋi Aleksandria miaŋgöreŋök kaiga gölme jöhanŋe jöhöba luhutqeqe nalöŋi mi tatket. Mi tatket teköiga öŋgöinga opo seri öröba möröreŋgögetka luhutnöŋ naŋgöi mosöta anin.

¹²Anda mala siti qetŋi Sairakyus miaŋgöreŋ aŋgota gölmenöŋ eta wehön karöbut tarin.

¹³Tata waŋgenöŋ öŋgöinga opo seri öröba möröreŋgögetka anda Regium sitinöŋ aŋgorin. Aŋgota ahöm wahöta luhut Saut görökenök könahiba gilök. Gili anda silimŋi yahöt aiga miaŋgöreŋ Rom likepŋe Puteoli taongö waŋge döpnöŋ aŋgorin.

¹⁴Aŋgota miaŋgöreŋ urumeleŋ alaurup tosatŋi miwikŋaiba eŋgehin. Eŋgehinga kewö qesim neŋgiget, “Iŋini ölöp nembuk sonda mohot malbeak me qahö?” Qesim neŋgigetka “Ölöp!” jiba yembuk malin. Malin teköiga eŋgömosöta Rom sitinöŋ öŋgöin.

¹⁵Urumeleŋ alaurupninan Rom siti malgeri, yeŋön kainaŋgö keu buzupŋi mötket. Mi möta miwikŋaim neŋgibingöra tosatŋan wahöta (köna 43 mail kaba) miri qetŋi Apius Forum maket miaŋgöreŋ kaget. Tosatŋan (33 mail kaba) miri qetŋi Kian miri karöbut, miaŋgöreŋ kaba miwikŋaim neŋgiba aŋgehin. Aŋgeka Polnöŋ “Anutu saiwap!” jiba möpöseiba uruŋi amqeiga ölöwahök. Mewö.

¹⁶Rom sitinöŋ kaŋgota miaŋgöreŋ Polnöŋ miri kunöŋ nanŋök malmapkö jim teköm waŋgigetka yarö azi kunŋan galöm memba yambuk malök.

¹⁷Mewö jim teköm waŋgigetka miri miaŋgöreŋ tari silim karöbut teköiga Juda ambazip ipŋi köl öröm eŋgii kaba tokoget. Tokogetka Polnöŋ kewö jii mötket, “Iwi alaurupni, nöŋön nanine Juda ambazip kambunini qahö qetala kazik ak eŋgial me ambösakonurupnini yeŋgöreŋök ahakmeme möta maljini, mi qahö ak bölial. Mewö qahöpmö, töndup Jerusalem sitinöŋ qeraköba nömimba jöhöm niŋgiba kösö mire al niŋgiget tatpiga Rom gawman yeŋgö böröŋine al niŋgiget.

¹⁸Al niŋgigetka böröjaŋ memba könaŋamnaŋgö qesiba kewötketka ölöwahök. Nöŋön yuai bölöŋi kun qahö aka kömupkö buŋaya akileŋakö dop qahö ahal. Yeŋön mewö eka pösat niŋgibingö mötket.

¹⁹“Mewö mötketmö, Juda jitŋememe yeŋön Judia miaŋgöreŋ keu mi qetala tuarenjoŋ aket. Mewö aketka siksauk aka lömböriiga nöŋön köna jaruba kun qahö miwikŋaiba kewö kapaŋ köla qesial, ‘Ni ölöp Rom sitinöŋ anbiga sisa kiŋnöŋ keuni mindiŋgöi diŋgima.’ Mewö qesibiga melaim niŋgigetka ki kayal. Nani Juda kambu yeŋön kazik al niŋgigetmö, töndup yeŋgö sileŋine keu bölöŋi kun ala jim eŋgimamgö qahö mötzal. Mewö qahö.

²⁰Anutunöŋ azi kun asuhumapkö jöhöjöhö keu al neŋgiiga Israel neŋön keu miaŋgö ölŋi ahumapköra mamböta jörömqöröm ahakzini, nöŋön mönö azi sorokŋi yaŋgöra aka gwaröhöm niŋgigetka tapep (muŋgamuŋga) ki bisizal. Könaŋamni mewö. Miaŋgöra aka merak eŋgeka keukeu eraum mötpingöra köl öröm eŋgibiga ki kaba tokoze.”

²¹Mewö jiiga jiget, “Judia gölmenöŋ göhöra keu jiba malgetmö, neŋgöra kimbi kun qahö alget kaiga ehin. Mewöyök alaurupninan miaŋgöreŋök ki kageri, yeŋgöreŋök kunŋan göhö keu buzup me kösohot bölöŋi kun qahö jii mörin.

²²Mi kun qahö jiget mörinmö, uruge keu ahözawi, nini mi ölöp mötpingö mötzin. Göhöreŋ Nazaret pati kambu miaŋgö keuŋi mi gölme dop jigetka ambazipnöŋ qetalgetka likeplikep miaŋgöreŋ goranora keu gwötpuk jiba kazik ahakze. Pati kambu miaŋgö buzupŋan mewö kezapnine gei mötzin.”

²³Mewö jiba Polnöŋ keu kunbuk jimapköra nalö kun areŋgöget. Mi areŋgögetka Juda ambazip jesöŋgöŋan nalö miaŋgöreŋ kaba Pol miri malöhaŋgöreŋ tokoget. Tokogetka söŋanök könahiba Anutu bemtohoŋaŋgö könaŋi jim asariba mali miri söŋauyök. Jisösgö könaŋi möt yaköba möt nariba uruyahöt mosötmegöra kapaŋ köla uru kuŋgum eŋgiba malök. Mutuk Mosesgöreŋ Köna keu aka kezapqetok ambazip yeŋgöreŋ Buzup Kimbi oyoŋda keu miaŋgöreŋök könahiba Jisösgö könaŋi indela miaŋön kondela naŋgöba jiba malök.

²⁴Buŋa keu mewö jiba maliga tosatŋan uruyahöt mosöta möt narigetmö, tosatŋan mi qahö möt nariba tönpin malget.