Acts 28:9-24

⁹Damanina ba nikona i tupuwa wai, gubagubagisi ereonowasi si botu wai i yawasisi.

¹⁰Kona kairavina keta pesarinai si bopuyopuyokai ba ka bobunaga kata tauya wai, kama keta tamasina si berikai.

¹¹Nawaravi tonu murinai, ba bodu ba sibe kairavina waka neyarai i mamana wai, ka geru ba ka nae. Wakana wai Alexandria biyisi asi waka, ba tarabibisaka asi ruwamo Castor ba Pollux gayamisi waka naonai si taura.

¹²Ka verakasibau ku Syracuse meyagina ba kao tonu namai ka mana.

¹³Ba namai ka kuka ka nae ku Rhegium, meyagina mena ka verakasibau. Mara i tom ba yawara sibena i kasibau wai, kao ruwamo ba ku Puteoli ka verakasibau.

¹⁴Ba namai bigeruwana biyisi mutusi ka pananisi, ba si baba kata taparoro kesana yabata kata mana. Damanina ba nanakasike ka botubotu, yepo muri yai ku Rome ka verakasibau.

¹⁵Rome bigeruwana biyisi wara si nonori kata ka botubotu wai, mutusi si botu ku Appius bigimona gawarina, ba yebo mutusi si botu ku meyaga kana waba Tavern asi Tonu ba namai si vera beyikai. Paul i kinanisi wai nuwanuwana i tora ba God i kaikaivi.

¹⁶Maranai ka verakasibau ku Rome wai, taupauma ana abiabiyisi asi bada i damanina kata Paul ikesina, ita matupa ba abiabiyina kesanaikei ita potapotai.

¹⁷Kao tonu murinai, Paul, Jew biyisi asi babada i yorisi si notuwa. Ba Paul kurisi i wona, “Warewaresiku, bagunai wata kega goyona a wosei ata pipiya kurisi, kona wawata asi dudura ai kasikotobi, saba Jerusalem yai si patumiku ba Rome biyisi ku yarosi si teriku.

¹⁸Kosi si buibuiyiku ba asi waina sita tombauniku, kairavina au goyona kega, ba rabobo sarobina ata yauni.

¹⁹Saba Jew biyisi si kaosaira wai nota a yauni kata, Caesar kurina ati baba, ba kega au pipiya, damana ati kunumakisi kairavina.

²⁰Kona basuna, ai baba kata ata kinanimi ba yabata tati sisiya. Israel biyisi asi Baibaiyawasina Kaobaisiyena kairavina wai yauku chain yai si kausiku.”

²¹Ba kosi si kaobeya, “Yakai kega pepa kesana Judea yai ka yauni kom ibi sisiyim, ba kega kesana waresita namai i botu wai am goyona i sisiyei kona i kaobigoyonim.

²²Saba ama waina am nota kana, kuiri kata pipiya kupura ereonowanai, ami bikeresiyana te kaobisipuwei.”

²³Kata kao kesana si binei, Paul sita nonori kairavina ba koroto kaikapona kona kaonai si notuwa, Paul kurina ba didibarai i dagui God ana basileiya, i bibeyebeyisi yepo i pom ba Moses ana kairuwana, ba peroperoveta asi kiruma i mamatarei kurisi kata, nikosi sisiya ereonowana Iesu kairavina wai i nuwatainisi kata siti geruwei.

²⁴Ba mutusi awaika i sisiyei wai i nuwatainisi ba si geruwei, saba mutusi kega si geruwana.