Mak 9:15-26

¹⁵A taro det tama pas o Iesu, ra det kisin doko, ma det kalabor ra det gas pasi.

¹⁶Ra o Iesu i ting det lena, “Asau ra mot engaras uni?”

¹⁷Ara musano tagun a taro ra, i balu i lena, “Tene Ususer, a ben a nutunglik a nat musano torom ui, uni a laulau na nion kura uni ma ke wasiso.

¹⁸A laulau na nion ri i ser solsolongi, i ser woro puku i utiro upiso. A wano i ser busu ma i ser ungingit a kabo lokono ma i ser udekdek a pinpinino. A saring anum a kum nat na ususer sur det in lakro ru a laulau na nion gusuni, ikut ka det pet lar pasi.”

¹⁹O Iesu i balu i lena, “Mot a taro tagun uniri, ka mot nurnur! A sa kis suano i tomo nam mot. Nangisin mo mot in nurnur? Mot in ben a nat ra urin torom iau.”

²⁰Det beni torom o Iesu. Ra a laulau na nion i tama pas o Iesu, uniutra i woro pirso tar a natlik. Ra a natlik i puku piso, i tubulus tuptupukus, ma i busubusu a wano.

²¹Ra o Iesu i ting a taman a nat lena, “Nangisin ra i turpasi?” Ma i balu i lena, “Ra i natlik utmakai.

²²A susut na bung, a laulau na nion i ser woro tari una sungun, o una danim sur in um doko i. Ra un pet lari sur un lakro ru a laulau na nion gusuni, un maris mir, ma un warut mir.”

²³O Iesu i watungi tano lena, “Ilai ra u watungi lenri, ‘Ra un pet lari’? Osi ra i nurnur, in pet lar pas a kum utna rop.”

²⁴Uniutra a taman a natlik i balu i lena, “A nurnur! Warut iau una nung a lik nurnur.”

²⁵O Iesu i tama a kunur na taro ra det kalabor tomo torom det, ra i wasiso dekdek torom a laulau na nion lena, “Ui a laulau na nion, u ngat ma u kutkut. A sakbat ui, un pirso gusun a natlik, ma gong melet mo u sisiop uni.”

²⁶A laulau na nion i woiwoi pas, i gunu dekdek tar a natlik, ra i pirso gusuni. A natlik ra, i tamtama mukut elar nama minat, ma a susut na taro det lena i sa mat.