Marcos 9:15-26

¹⁵Konoje kꞌu ri winaq lik xekiꞌkotik echiriꞌ xkil ri Jesús. Kebꞌanik xeꞌkikꞌuluꞌ apanoq y xkiya rutzil uwach.

¹⁶Xutzꞌonoj kꞌu Rire chike: —¿Saꞌ puwi kachapalaꞌ wi ibꞌ alaq kukꞌ rike? —xchaꞌ.

¹⁷Kꞌo kꞌu jun chikixoꞌl rukꞌiyal winaq jewaꞌ xukꞌul uwach: —Lal tijonel, nukꞌamom lo ri nukꞌajol chiwach la, ma rire kꞌo puqꞌabꞌ jun itzel uxlabꞌixel uꞌanom meꞌt che.

¹⁸Xa tobꞌ pa kuchap wi, kukꞌaq pulew. Ekꞌuchiriꞌ, rala kujeq kapuluwan rukꞌaxaj, kaqichꞌichꞌ ruwi taq reꞌ y kakanaj kan junchi chukꞌuchik. Xintzꞌonoj kꞌu chike ri tijoꞌn la chaꞌ kakesaj bꞌi ri itzel uxlabꞌixel, pero rike na xkichꞌij ta resaxik bꞌi —xchaꞌ.

¹⁹Ekꞌu ri Jesús xukꞌul uwach, jewaꞌ xubꞌiꞌij chike: —¡E ri ix tikawex re waqꞌij ora, na kubꞌul ta kꞌana ikꞌuꞌx wukꞌ! ¿Janipa chi lo qꞌij kajawaxik kinkꞌojiꞌ iwukꞌ chaꞌ kakubꞌiꞌ ikꞌuꞌx wukꞌ? ¿Janipa chi lo qꞌij kixinkuyu e laꞌ jelaꞌ iꞌanom? Chikꞌama lo rala wara —xchaꞌ.

²⁰Xkikꞌam kꞌu lo rala chwach. Ekꞌu ri itzel uxlabꞌixel echiriꞌ xril uwach ri Jesús, lik ko xujabꞌajaꞌ rala. Ekꞌu rala xtzaq pulew y xujeqo kubꞌalkatilaꞌ ribꞌ, kapuluwan rukꞌaxaj.

²¹Ri Jesús xutzꞌonoj kꞌu che ruqaw rala: —¿Jampa ujeqom lo waꞌ che? —xchaꞌ. Rachi xukꞌul uwach: —Chuchꞌutiꞌnal upetebꞌem loq.

²²Ukꞌiyal laj ukꞌaqom pa aqꞌ y pa yaꞌ re kamisaxik uwach. We kꞌo ko paqꞌabꞌ la katoꞌ la, kꞌutu ko ri kꞌaxnaꞌbꞌal kꞌuꞌx la chiqe y chojtoꞌo la —xchaꞌ.

²³Ri Jesús xukꞌul uwach: —¿Suꞌbꞌe kabꞌiꞌij la chwe we kꞌo panuqꞌabꞌ kanꞌan waꞌ? Ma we kꞌo junoq lik kubꞌul ukꞌuꞌx wukꞌ, ronoje kel pana rukꞌ —xchaꞌ.

²⁴Ekꞌu ruqaw rala na jampatana ko xchꞌawik, jewaꞌ xubꞌiꞌij: —Kubꞌul nukꞌuꞌx ukꞌ la, xew chintoꞌo ko la chaꞌ kanimar ri kubꞌulibꞌal nukꞌuꞌx —xchaꞌ.

²⁵Ekꞌu ri Jesús echiriꞌ xrilo katajin kimolotajik rukꞌiyal winaq, xtaqan puwi ri itzelilaj uxlabꞌixel, jewaꞌ xubꞌiꞌij che: —Itzelilaj uxlabꞌixel, ri aꞌanom meꞌt y tꞌoꞌk che waꞌla, riꞌin katintaqo: Jat, chatelubꞌi y mat-tzelej chi lo kꞌana rukꞌ —xcha che.

²⁶Ewi ri itzel uxlabꞌixel xsikꞌinik y lik ko xujabꞌajaꞌ rala; tekꞌuchiriꞌ, xel bꞌi. Ekꞌu rala xkanaj kanoq pachaꞌ kaminaq chik. Ruma riꞌ, lik e kꞌi ri xebꞌiꞌn re: «Ya xkamik» xechaꞌ.