Mak 7:5-35

⁵Ile pe su Paraseo pe su tisa odo Lo hehndremte Yesus ihpa, “Ei, Yesus. Su lewim ti hesenohtot punou ta su papo’ tidu pwi ti ile sa? Su lumwe’ su mo‑on odoke hantakun song pe hana‑an ti ou apa huyen?”

⁶Yesus isomwi su ihpa, “Oduu ti ndramat odo tawiwihi sa lau. Profet Aisaiah pihe idetorwe Nolwo‑on Lapan ti idu‑uw taduu. Nolou erti ipe ihpa: “‘Su lau kiti henesori rongo iso poho’ su, odoke tawene ta su ti indrito Todo pwi.

⁷Surok su hompo ile Todo ti porah kopwi. odosa lo ndre su hempehre ti sa ndramat hadatorwei. Lo erti Yu undretawei pwi.’

⁸Oduu ti edengkakik puko‑on ile sal ndre ndramat iduwei, pe etndre‑au odo Lo ndre Lapan iduwei.”

⁹Yesus ipe ile ta su lakopwi yi ihpa, “Oduu ti tuno’ oduu lakopwi odo pondrih sal odo atawe Lo ta Lapan kile mahun, pe atkakik puko‑on kile lo ndre sa ndramat hahnan.

¹⁰Lo ta Lapan ndre Moses iduwei ti ipe ihpa, ‘Oso pahndran tamam horu tinem, pe opo huyen kile ta horu.’ Lo erti ipe yi ihpa, ‘Si kom kipu nolou mo‑on kile pule‑en taman horu tinen ti we hapwi iy kimet.’

¹¹Odoke oduu etawe lo handrai ihpa, ‘Uh homou lau kipahran pohon kile moleu ipe iy we kihngahang Lapan kile sane, eri iy lau erti we kindrahngahang taman horu tinen kile hangka‑an pwi.’

¹²Lo taduu kuti ihnan, ile pe iy lau kuti we kindranon kindrehnuwii taman horu tinen pwi.

¹³Iy lo ndre oduu edempo kuti inahnan lo ndre ndramat ihnan ti illa puko‑on, pe Lo ndre Lapan iduwei ti illa hangka‑an ke porah. Pe oduu edemposisihen sane sulo‑on yi ihpa ke kutih.”

¹⁴Yesus iyuwen sa lau hala hun Iy yi, pe ipe ile ta su ihpa, “Oduu ndre sulo‑on atawe ndralnga’ oduu kise, pe atahrung kehii. Atawonon nolou ndre Yu ka we kupwe kutih.

¹⁵Sane odo kiu ndre ndramat intakuni hala lom mundren ti handranon hahnan iy kile mo‑on odo madan Lapan pwi. Tapake sane ndre honu‑us lom mundren ndramat hassa moleu ti hanahnan iy illa mo‑on odo madan Lapan.

¹⁶Ou si ndre ndralngam, eri ehrungi nolou kuti kehii.”

¹⁷Yesus isohou ta sa lau oh, inum pe Iy iyeu ile lonu‑um. Pe su disaipel hehndremte Iy, “Mining odo nolou Ou ampa mahkele ti ihpa kehe?”

¹⁸Yesus ipe ihpa, “Oduu ti tawene ta oduu murun. Oduu tuno’ oduu pwi, erih? Homosa ndre ki‑us kiu pe kile lon ndrinen ndramat, eri kindranon kihnan ndramat kinna mo‑on odo madan Lapan pwi,

¹⁹odosa hangka‑an erti inna lon ndrinen ndramat ndre ndrokene pwi. Hangka‑an erti ile ke salan song, inum pe ile salan ndre, inum pe iyeu ise yi ndre moleu.” Yesus ipahran nolou kuti, odosa iy ipe song ndre sulo‑on ti huyen kopwi odo yo‑on.

²⁰Pe Yesus ipe lakopwi yi ihpa, “Sane ndre honu‑us lon ndrinen ndramat hassa kiu ti hanahnan ndramat illa mo‑on odo madan Lapan. Lon ndrinen ndramat ti intawe tawene mo‑osa pe pahna. Lon ndrinei ti intawe tawene odo up ndramat kimet, ndramat impo kowos ile tam pedih pe kamal mbrulndrat, pe ndre‑em putmo‑oi. Lon ndrinei ti intawe taheweh, ndringis sane ta lau homou yi, mah‑ah pwi odo punou mo‑on, ndramat hassap sa, taninen ndramat homou yi pe sane sulo‑on mo‑osa yi. Iy sane kuti honu‑us lon ndrinen ndramat pe henahnan ndramat illa mo‑on odo madan Lapan.”

²⁴Inum pe Yesus pe su disaipel Tadan ha‑au odo Galili, pe hala lok sehir ise tolau ea. Su helihir koson siti odo Tair. Tair ti ise koson ndras mandra‑an Mediterenia. Yesus ipe sa lau hohtuno sa pe heltuwe Iy kolwii. Iy ile lon um sim, odoke Iy itong ta sa lau tahit.

²⁵Pedih homou ihtunon ihpa ndre Yesus ti insa. Iy nedun pihin ti sinel imin pule‑en pe inahnan iy ile sik. Iy iporitai kopwi ile hu Yesus pe pandrulku‑un ile poi idu kendrun ndriken.

²⁶Pedih kuti iy odo Yuda pwi. Iy ti odo Fonisia, ise lok mandra‑an Siria. Iy idu purmadan Yesus pe ihndremte puko‑on ipe Yesus ki‑es sinel odo mundren nedun pihin.

²⁷Odoke Yesus ipe ihpa, “Tidu titawe song ana’ su nonkom ti kile ta mweh kolwii. Su nonkom ti hoyo‑on oh uu ndre kenon su.”

²⁸Odoke pedih kuti ipe ihpa, “Ou ampa ti imel, lau il, odoke mweh ndre iso pahndran tepol ti ina‑an tikin lehe’ su nonkom yi.”

²⁹Yesus ipe ile tadan ihpa, “Ou apa ihpa kirtih? Eri ka emin eleng pe ala yi ndre ndrongon nedum. Sinel indra‑au odo pule‑en.”

³⁰Pedih ti ile yi ndre omwen pe iltuwe nedun pihin ti inemetir iyin lok. Sinel indra‑au odo pule‑en ndre ndrokene.

³¹Yesus ipe kise yi ndre Galili, ile pe Iy itlang odo mukehe Tair pe ile tolau ea, pe ihir Saidon. Inum pe Iy isondrih ndrokoron lok uu pe ilihir Dekapolis.

³²Pe sa lau hekuni orngon homou ile hu Yesus. Orngon kuti isentahrung lok pwi pe inolou idu ke lon kolon. Sa lau hosohou karundrum ile ta Yesus, hapa Yesus kiduwe lumwen kile pule‑en.

³³Ile pe Yesus ikuni orngon kuti ile mahun odo ta sa lau ndre sulo‑on. Iy iduwe kopwen lumwen hala lon ndralngan orngon kutih. Inum pe Yesus imburnguh ile kopwen lumwen oh pe iduwe ile kalilmen orngon kutih.

³⁴Pe iy indre‑et ile eleng ile heven, ihti ngohon puko‑on, pe ipe ile tan orngon kuti ihpa, “Efata!” (Iy erti ihpa, “Erwei!”)

³⁵Eri pe orngon ti ihrung lok lakopwi. Hangka‑an ndre inehndrepti kalilmen ti iyeu, pe iy isohou ile huyen.