Luuka 23:3-30

³Aphano Pilaatu khumuuzela yoori: “Ti weeyo mfwalume wa mayaahuuti?” Yinsa khujipu yoori: “Weeyo walupa.”

⁴Pilaatu khuwooza attunkhulu a mahaakhimu a tiini apale na khuntti ya atthu etile yaariivo yoori: “Miiyo akinimoonana hatha paathuli otu.”

⁵Atthu apale khusala avira akhanyarelaka olupa yoori: “Otu ontta owaatapanya atthu a Yudeya yooshi eti, aaza Kalileya mpakha ofiya okhuno.”

⁶Paata yoosiila mattakhuzi apale, Pilaatu khuuzela yoori: “Otu aya nkalileya?”

⁷Pilaatu ajuwiyeevo yoori Yinsa aari wa nti wa mfwalume Herooti, khuruma olawaniwa ottuukho. Wakathi aya opo Herooti na-ye aarettiye ari Yeruzaleemu.

⁸Herooti n'oomoona Yinsa, khwiiya woofurahi venkivene maana aaziye raku otakha omoona mwaasa woosiila vitthu aari orettaazo, khusala aweeja woona minjuza arettaka.

⁹Aphano khusala amuuzela vitthu za waatta, ila ye khuhisala anjipu hatha etthu.

¹⁰Attunkhulu a mahaakhimu a tiini na anamanozela a kano khusala anlokoveza mattakhuzi mawulu-mawulu.

¹¹Herooti na anajanka awe khwaaza onveyisa Yinsa na ontarawu, khunwalisa ajapi y'oofwalume khuruma yoori arutiseliwe wa Pilaatu.

¹²Herooti na Pilaatu khaari osiilanaka, ila siikhu ethiito khupuwa oshirikha.

¹³Aphano Pilaatu khuwaakhuwela attunkhulu a mahaakhimu a tiini, anamaphuka milattu na atthu,

¹⁴khuwooza yoori: “Mwakitiisela otu mwinlupezaka yoori ontta owaatapanya atthu, ila miiyo kamuuzela vakatthi venu mweeyo, akimoonaneeni hatha paathuli khwa vitthu epo mwininlupezaazo.

¹⁵Herooti na-ye khamoonaneeni hatha paathuli, ti eto arumiyeeyo orutiseliwa okhuno. Eto enthoonyeza yoori kharetteeni etthu yoosuhi wuuliiwa.

¹⁶Miiyo kintta oruma opiiwa nawiisha kinleve.”

¹⁷N'oofiya siikhu ya njampo la Paashikowa, Pilaatu aarina sharuthi yoowaafukulela atthu napherezu mmote.

¹⁸Attaaphale atthu ooshi khusala anyakula araka: “Mwimuule oto! Mwinifukulele Baraba!”

¹⁹Baraba aafukeliwe mwaasa woolaza onazompere nsitati na khumuula ntthu.

²⁰Aphano Pilaatu khurutela owooza atthu atakhaka onleva Yinsa.

²¹Ila atthu khusala anyakula venkivene araka: “Akhomeliwe, akhomeliwe vansalapa!”

²²Pilaatu khuwoozela swaafu yattaatthu: “Niini arettiyeeyo yootakhala? Miiyo akinimoonana hatha paathuli yoosuhi wuuliiwa. Kinruma yoori mwinhukhumu nawiisha kinleve.”

²³Ila yo khusala avira anyakulaka avekaka yoori Yinsa alawe akhomeliwe, akhanyarelaka onyakula.

²⁴Aphano Pilaatu khukhupalela oretta etile aari otakhaaye atthu apale.

²⁵Ye khumfukulela Baraba otule aafukeliweeyo mwaasa woolaza onazompere na wuula, khuwenkha Yinsa otule anvekiyeeyo yoori alawe anrettele etile aari ontakhelaaye.

²⁶Yinsa khuthuuliwa khusala alawaniwa, eettaka olawaniwa etthiipile, khusikaniwa mwinyi mmote wa Sireeni aari wiitthiwaaye Simawu, aari olankhaaye omashapa. Khukholiwa khuthuulisiwa nsalapa opule yoori anlottisele Yinsa.

²⁷Aari olottiwa pi atthu a waatta na aarivo aakha aari onlilelaaye ankhupanyeraka.

²⁸Yinsa khuzukuluwa khuweekesa aakha apale aari onlilelaaye khuwooza yoori: “Aakha a Yeruzaleemu, mwihikililele miiyo, ila mwijililele mweeyo na aaneenu.

²⁹Maana zinteela ofiya siikhu mwinttelaaye olupa yoori: ‘Ashapweyiwa aakha apale oohiina mavokozi, ahinavokole na ahinaamwise.’

³⁰Siikhu ethiito mwinlawa mwalupe yoori: ‘Nyaako zinikwele kulu zinifinikhe!’