SAN LUCAS 23:3-30

³ꞌBa Pilato tsiningiyare Jesús: —¿A ji= ni reyre xuta judío? ꞌBa Jesús kitsingojore: —Ji je ꞌba kisji.

⁴ꞌBa kio Pilato jako xi ngakure naꞌmiu ko xutankjiun, ꞌba kitsure: —Nime je sakuna̱ ngatꞌare xutabi.

⁵Tunga nchjabiu a tu si kitsu: —Jotsaꞌen kui tibakuya timinyasiyare xutankjiun ngayéje ngaꞌnde xi tjin nangi Judea. ꞌEtutsꞌinre nangi Galilea ꞌba kaꞌnda ngaꞌe je jaꞌe nga ꞌba titsaꞌen.

⁶ꞌBa kionga Pilato kjintꞌe kibi, tsiningiya tsa Jesús jngu xuta tseꞌe Galilea kuán.

⁷ꞌBa kionga kikꞌinre nga Jesús ndibani nangi Galilea, ña batexuma Herodes, ꞌbatsaꞌen kitsikasen Jesús ngixkun Herodes, xi ꞌba nde tijña naxinanda Jerusalén kui nixtjinbiu.

⁸ꞌBa kionga Herodes tsabe Jesús, ꞌñu tsja kuánre, ngatꞌa je ndaꞌe mejénnire skue. Ngatꞌa nkjin ndiya kjintꞌe ngatꞌa tseꞌe Jesús, ꞌba mejénre skue nga kui saꞌen jngu kjuakun.

⁹ꞌBa tsé tsiningiyare, tunga nijnguú en kitsingojo Jesús.

¹⁰ꞌBa ꞌba nde kio inya xi ngakure naꞌmiu ko chjine kjuatexuma nga ꞌñu inyakaninejere Jesús.

¹¹ꞌBa ꞌbatsaꞌen Herodes ko chasoldadure joni tsajmi xi tumé chjire kitsiko Jesús. ꞌBa tsejnuke nga kitsikaja jngu najñu xi tsja kjiꞌi joni xi baja rey, ꞌba kitsikasen nganire Pilato.

¹²ꞌBa kui nixtjinbiu Herodes ko Pilato, xi ngandaꞌeñu stike xinkjin tsakaiñu, ꞌetutsꞌinre nga nda tsakaꞌa xinkjin.

¹³ꞌBa meni Pilato ꞌeñajan xi ngakure naꞌmiu ko xutaxa ꞌba ko xutankjiun,

¹⁴ꞌba kitsure: —Jun jaꞌekonuu̱ xutabi. Temixun nga timinyasiyare xutankjiun. ꞌBa ngixkún je tsiningiya_ra̱, ꞌba bi kisakuna̱ tsa tjinre je xutabi ngatꞌare ngayéje xi tefangiu.

¹⁵Ninga Herodes bi kisakutꞌare je. Kui kjua kitsikasen nganina xutabi. Ngu, je teꞌyo nga tumé kitsaꞌen xutabi xi ꞌbakore nga kueya.

¹⁶ꞌBamani, kꞌuexaa̱ nga sꞌe̱re ꞌba saꞌe suntjia̱n.

¹⁷ꞌBa xki nu xki nu nga sꞌi pascua, Pilato tjinnere nga tsikꞌejñandai jngu xuta xi kjiyuya nduya.

¹⁸Tunga tu jngu kitsaꞌen jndare xutankjiun nga kiskiꞌndaya, ꞌba kitsu: —¡Ngatjanikꞌen xutabiu! ¡Tikꞌejñandainii̱ Barrabás!

¹⁹Barrabás kisꞌeya nduya, ngatꞌa ngajin naxinanda Jerusalén kiskjanko nchja xi tseꞌe Roma, ꞌba kitsikꞌen jngu xuta.

²⁰ꞌBa Pilato mejénre nga sikꞌejñandai Jesús, kui kjua jako ngani xutankjiun.

²¹Tunga xutankjiun ngisa ꞌñu kiskiꞌndaya, ꞌba kitsu: —¡Tjatꞌai kru xutabiu! ¡Tjatꞌai kru xutabiu!

²²ꞌBa xi majánni ndiya Pilato jako ngani, ꞌba kitsure: —Ngu, ¿mé= kjua xi chꞌotjin kitsaꞌen xutabi? Nimé tisakuna̱ xi ꞌbakore nga kueya. ꞌBamani, kꞌuexaa̱ nga sꞌe̱re ꞌba saꞌe suntjia̱n.

²³Tunga xutankjiun ngisa ꞌñu si kitsaꞌen nga tsiꞌare Pilato nga kꞌuetꞌa kru Jesús, kaꞌnda nga kjinisinre.

²⁴Kui kjua Pilato kitsjani enre nga kꞌuetjusunre mé= xi inyamiꞌa.

²⁵ꞌBa meni kitsikꞌejñandai xuta xi xutankjiun jaꞌajin, xuta xi kjiya nduya ngatꞌa kiskjanko nchja xi tseꞌe Roma ꞌba kitsikꞌen jngu xuta. ꞌBa kitsingantsja Jesús, tuxi sikoni jotsaꞌen mejénre xutankjiun.

²⁶ꞌBa kionga Jesús inyafikatꞌa kru, kitsuba jngu xuta xi tseꞌe nangi Cirene, xi Simón ꞌmi, xi ngijña tjindibani. Kui xi kitsikaꞌanijin kru, ꞌba kitjenngi Jesús.

²⁷ꞌBa nde nkjin xuta tjenngire ko yanchjin xi inyakjiꞌndantjai Jesús ngatꞌa kjimaꞌonre.

²⁸Tunga kitsikuꞌbe Jesús ꞌba kiskutsejenꞌa yanchjinbiu, ꞌba kitsure: —Jun yanchjin Jerusalén, bi an chiꞌndantjainuu̱. Tusa chiꞌndo ngatꞌa tsojon ꞌba ngatꞌa tseꞌe kiꞌndinu.

²⁹Ngatꞌa kjuaꞌe= nixtjin nga ꞌbi kuetsu xuta: “Ndaxure yanchjin xi ꞌndi, xi niñajanni kisꞌeyaꞌmore ninga bi kitsikaki kiꞌndi.”

³⁰ꞌBa kio kuetsure nindu: “Tixuneni.” ꞌBa kuetsure tjengiu: “Tꞌeꞌmoni.”