Lukas 23:3-30

³Pilatus a aisini Jesus, “Ifa usun, en nöün chon Juta we king?” Jesus a pölüeni, “Ewer, usun om apasa.”

⁴Mürin Pilatus a üreni ekewe souasor mi lap me ewe mwicheichen aramas, “Üsap küna och tipis ren ei mwän.”

⁵Nge ir ra chök alapala ar kapasen tipitipmwäl ngeni, “A afitikokoi ekewe aramas ren an afalafal lon unusen Jutea, a popuetä seni lon Kalilea o otourato ikei.”

⁶Iwe, lupwen Pilatus a rong ekei kapas, a ais, “Ifa usun, ei mwän eman re Kalilea?”

⁷Nge lupwen a rongorong, pwe Jesus seni ewe fanü Herotes a nemeni, a tinala Jesus ren Herotes, pun Herotes a pwal nom lon Jerusalem lon ei fansoun.

⁸Iwe, lupwen Herotes a küna Jesus a fokun pwapwa, pun a fen mochen küna lon fansoun langatam. Pokiten mine a fen rong usun, a apilükülük ngeni an epwe küna och asisil Jesus epwe föri.

⁹Iei mine Herotes a aisini Jesus chomong kapas ais, nge Jesus esap pölüeni och.

¹⁰Iwe, ekewe souasor mi lap me ekewe Sensen Allük ra ü ikenan o ra fokun achocho le atipisi.

¹¹Nge Herotes me nöün kewe sounfiu ra urumwotei o turunufasei Jesus. Mürin ar aüföüfa ngeni echö üf mi fokun ling, Herotes a tinsefäliela ren Pilatus.

¹²Lon chök ewe ränin Herotes me Pilatus ra pwipwifengen, nge me mwan ra oputafengeniir.

¹³Mürin Pilatus a körifengeni ekewe souasor mi lap, ekewe sounemenem me ekewe aramas

¹⁴o a üreniir, “Ämi oua apasa lupwen oua emwenato ei mwän rei pwe a emweningauei ekewe aramas. Iei üa atittina me mwemi, nge üsap küna och tipisin ei mwän ren mine oua atipisi won.

¹⁵Pwal Herotes esap küna och tipis ren, iei mine a tinsefälieto rech. Me rei, esap wor och mine ei mwän a föri an epwe tipisin mäla.

¹⁶Iei mine üpwe wichi o amusala.”

¹⁷Iteiten ier, lupwen a tori ewe mongön Pasofer, Pilatus a soun amusa eman chon fötek.

¹⁸Iwe, ewe mwichen aramas a köpökütä, “Kopwe amäloi ewe aramas, nge kopwe amusa ngenikem Parapas.”

¹⁹(Parapas a fen nom lon imwen fötek pokiten an afisätä eu fitikoko lon ewe telinimw, pwal fän iten an niela aramas.)

²⁰Pilatus a fokun mochen angasala Jesus, iei mine a kapassefäl ngeni ewe mwichen aramas.

²¹Nge ir ra chök kökkö ngeni, “Kopwe iräpengesi, kopwe iräpengesi!”

²²Iwe, Pilatus a kapas ngeniir fän aülüngatin, “Pwota? Meni sokun tipis a föri? Üsap küna ren ei aramas och tipis an epwe ina popun pwe epwe mäla. Iei mine üpwe chök wichi o amusala.”

²³Nge ekewe aramas ra chök sopwela le kökkö fän leüömong o tüngormau pwe epwe iräpenges. Feilfeil a pwönüetä mine ra eäni kökkö.

²⁴Iei mine Pilatus a apwüngala, pwe epwe fis ngeni Jesus mine ra tüngor.

²⁵A amusala ewe mwän mi nom lon imwen fötek pokiten an afisätä fitikoko me niela aramas, i ätewe ra tüngor an epwe musala. Nge a mwüt ngeniir Jesus pwe repwe föri ngeni mine ra mochen.

²⁶Iwe, lupwen än ekewe sounfiu etekinala Jesus won ewe al, ra churi eman mwän seni Kirene, itan Simon, a feito seni lemäl, pwe epwe tolong lon ewe telinimw. Ekewe sounfiu ra turufi Simon o ekietä ewe iräpenges won afaran pwe epwe mwärela mürin Jesus.

²⁷Eu mwichen aramas mi chomong ra tapwela mürin. Iwe, a wor ekoch fefin me leir mi ngüngüres o kechüeiti Jesus.

²⁸Nge Jesus a sap ngeniir o üreniir, “Ämi fin Jerusalem! Ousap kechüeitiei, nge oupwe püsin kechüeitikemi me nöümi kana.

²⁹Pun repwe war ekewe rän, lupwen aramas repwe apasa, ‘Feiöchün ekewe fefin mi rit, ekewe fefin resap nöünöü, pwal ekewe resap oupwu semirit.’

³⁰Mürin repwe kapas ngeni ekewe chuk, ‘Oupwe turutiu wom,’ repwe pwal kapas ngeni ekewe chukutekison, ‘Oupwe pwölükeemila.’