Luk 23:3-30

³Kɔ Pilat eyif kɔ: «Wəbɛ wəka aSuyif məyɔnɛ?» Kɔ Yesu oloku kɔ: «Məna oloku ti.»

⁴Kɔ Pilat oloku wəloŋnɛ wəpɔŋ wəka kəlɔ kəpɔŋ ka Kanu kɔ kənay ka afum: «Inəŋk fɛ tɔlɔm o tɔlɔm ntɛ pəmar pasumpərɛ wərkun wəkawɛ mɔ.»

⁵Mba kɔ ŋaŋgbəc gbɛs, kəloku: «Afum ŋɔ eŋgbiŋər, pəc-təksɛ afum atɔf ŋa Yude disrɛ fəp kəyɛfɛ atɔf ŋa Kalile nde ɛnacop mɔ, haŋ nnɔ.»

⁶Ntɛ Pilat ene teta Kalile mɔ, k’eyif kɔ: «Wəka Kalile məyɔnɛ ba?»

⁷Ntɛ Pilat ene a wəka Kalile ɔfɔ mɔ, k’oloku a fum wəkawɛ, Herodu pəmar pəkiti kɔ. K’oloku a pakenɛ kɔ Herodu nwɛ ɛnayi mata mamɔkɔ Yerusalɛm mɔ.

⁸Ntɛ Herodu ɛnəŋk Yesu mɔ, kɔ pəmbɔt kɔ, bawo ɛŋc-tɛn kənəŋk kɔ kəyɛfɛ ntɛ pənawon mɔ, teta mes mɔkɔ eŋc-ne pac-loku tɔn mɔ, pəyɔ amera kənəŋk kɔ, pəyɔ tɔyɔ tɛgbɛkərɛ ntɛ tɛyɛfɛ nde Kanu kəyi mɔ fɔr yɔn kiriŋ.

⁹Kɔ Herodu eyifət Yesu mes mɛlarəm, mba Yesu ɛnaluksɛ fɛ kɔ ntɛ o ntɛ.

¹⁰Wəloŋnɛ wəpɔŋ kɔ atəksɛ sariyɛ ŋanayi di, ŋac-naŋkanɛ kəyemsɛnɛ kɔ.

¹¹Herodu kɔ abum ɔn ŋafani kɔ, kɔ ŋayɔ kɔ pəlɛc pəlɛc; kɔ ŋambɛr kɔ yamos ya abɛ, kɔ ŋasɔŋ kɔ a pakenɛ Pilat.

¹²Dɔsɔk dadɔkɔ yati dɔ Pilat kɔ Herodu ŋanabɔt oŋ, ŋanaterɛnɛ cɔkɔ-cɔkɔ.

¹³Kɔ Pilat ewe wəloŋnɛ wəpɔŋ, abɛ a dɔtɔf, kɔ afum.

¹⁴K’oloku ŋa: «Nəŋkɛr’em fum nwɛ a nkɔn eŋgbiŋər afum kəyeŋk səbomp. Mba fɔr yonu kiriŋ iyifət kɔ, ali tes tin inəŋk fɛ ntɛ ɔyɔ mes mamɛ nəmboŋcɛ kɔ mɔ, ntɛ pəmar padifɛ kɔ mɔ.

¹⁵Herodu sɔ ɛnəŋk fɛ ali tin, bawo oluksɛ su kɔ. Awa! Fum wəkawɛ ɔyɔ fɛ ntɛ o ntɛ pəmar padifɛ kɔ mɔ.

¹⁶Kəsak kɔ k’inder k’andelip kəsut kɔ-ɛ.»

¹⁷Kəsata ka Pak nkɛ o nkɛ, Pilat ɛŋc-sakɛ ŋa wəyi dəbili wəkin.

¹⁸Kɔ ŋambaŋɛnɛ fəp kəkulɛ-kulɛ: «Mədif wəkawɛ! Məsakɛ su Barabas!»

¹⁹Anabɛr Barabas dəbili teta kədifətɛnɛ kəlɔma nkɛ kənayi dare mɔ, kɔ kədif ka fum.

²⁰Kɔ Pilat ɔŋgbɔkərɛ sɔ kəloku ŋa kəfaŋ kɔn kəsak Yesu.

²¹Mba kɔ ŋaloku gbɛs: «Məcaŋ kɔ dəkətɔk ka defi! Məcaŋ kɔ!»

²²Kɔ Pilat eyif ŋa sɔ tamaas: «Pəlɛc pere pɔyɔ-ɛ? Inəŋk fɛ ntɛ o ntɛ pəmar padifɛ kɔ mɔ. Kəsak kɔ k’inder k’alip kəsut kɔ-ɛ.»

²³Kɔ ŋampɛnɛ sim kəbupərɛ, ŋac-loku: «Pacaŋ kɔ!» Kɔ sim səŋan səŋkalərnɛ.

²⁴Kɔ Pilat owosɛ kəyɔ tɔkɔ ŋanafaŋ mɔ.

²⁵Kɔ Pilat ɛsak Barabas wəkɔ ŋanawer kɔ mɔ. Barabas nwɛ anabɛr dəbili teta kədifətɛnɛ, kɔ kədif ka fum mɔ. Kɔ Pilat ɛlɛk Yesu, k’ɛmbɛr ŋa dəwaca ŋayɔ kɔ tɔkɔ ŋanafaŋ mɔ.

²⁶Ntɛ ŋayi kəkekərɛ Yesu mɔ, kɔ ŋambəpɛnɛ kɔ wərkun wəlɔma pac-we kɔ Simɔŋ, wəka atɔf ŋa Sirɛn ɛnayi pəyɛfɛ dalɛ, kɔ ŋasarsər kɔ kətɔk kəpandən ka defi a pəcəmɛ Yesu darəŋ pəkekərɛ ki.

²⁷Kɔ kənay ka afum alarəm kɔ aran ŋaŋcəmɛ kɔ darəŋ ŋac-sut-sutnɛ bəkəc ŋac-yɔnɛ kɔ nɔnɔfɔr.

²⁸Kɔ Yesu ɛŋkafəlɛ nnɔ ŋayi mɔ, k’oloku: «Aran a Yerusalɛm, ta nəbokɛ tetem! Mba nəbokɛ te tonu kɔ ta awut anu!

²⁹Bawo dɔsɔk dendeder ndɛ andeloku: ‹Pəmbɔt aran aŋɛ ŋantɔbɛkəs mɔ, pəmbɔt cor ncɛ cəntɔkom mɔ, kɔ mɛsɛ mmɛ mɔntɔmɛsər mɔ!›

³⁰Afum ŋandeloku mɔrɔ dɔsɔk dadɔkɔ: ‹Mətɛmpɛnɛ su kəroŋ!› kɔ mofo meŋeci, ‹Məgbəpərnɛ su!›