Luka 23:3-30

³Te phoeiah Pilat loh a dawt tih, “Nang he Judah manghai la na om a?” a ti nah. Tedae Jesuh loh anih te a doo tih, “Nang long ni na ti,” a ti nah.

⁴Te dongah Pilat loh khosoihham rhoek neh hlangping rhoek te, “Hekah hlang soah a lolh ka hmuh moenih,” a ti nah.

⁵Tedae amih loh a mangkhak la, “Pilnam a hueh tih, Galilee lamloh he hil, Judah tom ah pahoi a thuituen,” a ti uh.

⁶Pilat loh a yaak vaengah, “Hekah hlang tah Galilee hoel la om maco, “a ti.

⁷Te daengah Herod kah saithainah dongah aka om la a ming tih Herod taengla a tueih. Te vaeng tue ah Herod khaw Jerusalem ah om.

⁸Herod loh Jesuh te a hmuh vaengah bahoeng omngaih. Hlamat kum lamkah a kawng a yaak coeng dongah amah hmuh ham te ngaihlih ana om coeng. Te dongah anih loh a saii miknoek khat khat te hmuh hamla a ngaiuep.

⁹Te dongah Jesuh te ol muep a dawt. Tedae Jesuh loh anih te a doo moenih.

¹⁰Te vaengah khosoihham rhoek neh cadaek rhoek loh pai uh tih Jesuh te rhaprhap a paelnaeh uh.

¹¹Herod neh a rhalkap rhoek long khaw Jesuh te a hnaelcoe uh tih a tamdaeng uh. Te phoeiah himbai a cim thik a bai sak tih Pilat taengla a tueih uh.

¹²Te khohnin kuelhuelh ah Herod neh Pilat loh khat neh khat paya la coeng rhoi. A noek ah amih rhoi te thunkha la om rhoi dae ta.

¹³Te dongah Pilat loh khosoihham rhoek, boei rhoek neh pilnam te a hueh tih,

¹⁴“Hekah hlang he kai taengah pilnam aka palet bangla nang khuen uh. Kai loh nangmih hmaiah ka boelh het coeng dae a lolh la anih na paelnaeh uh thil te hekah hlang soah ka hmuh moenih he.

¹⁵Herod long khaw a hmuh pawt dongah ni anih he mamih taengla han tueih. A saii te dueknah neh aka tiing a om moenih he.

¹⁶Te dongah anih he ueih sak lamtah ka hlah eh,” a ti nah.

¹⁷Khotue ah amih ham hlang pakhat tah a loeih sak ham a kuek.

¹⁸Tedae huek pang uh tih, “Anih he khuen laeh, Barabbas mah kaimih ham han hlah,” a ti uh.

¹⁹Barabbas tah khopuei ah olpungnah bet a om vaengah ngawnnah a saii dongah thongim khuila a hlak uh.

²⁰Jesuh te hlah a ngaih dongah Pilat loh amih te koep a khue.

²¹Tedae amih loh a o uh tih, “Anih te tai laeh, tai laeh,” a ti uh.

²²Tedae Pilat loh amih te, “He loh boethae balae a saii tih, dueknah ham koila anih soah a lolh ka hmuh moenih. Anih he ueih sak lamtah ka hlah tangloeng eh, “voeithum a ti nah.

²³Tedae a lalh uh coeng dongah Jesuh tai ham te ol ue a hoe uh tih amih ol loh boeih a khumla uh.

²⁴Pilat long khaw amih kah bihhoenah te rhoirhi ham ko a tam.

²⁵Te dongah a hoe uh vanbangla olpungnah neh ngawnnah dongah thongim khuila a det tangtae te a hlah. Tedae Jesuh te amih kongaih bangla a voeih pah.

²⁶Anih te a khuen uh vaengah Kurena Simon te lohma lamkah ha pawk hatah a tuuk uh tih Jesuh hnukah koh pah ham thinglam te a tloeng pa uh.

²⁷Te vaengah anih te pilnam rheangpuei neh anih aka rhaengsae tih aka hlai huta rhoek loh muep a vai uh.

²⁸Amih te Jesuh loh a mael thil tih, “Jerulalem nu rhoek, kai hamla rhap uh boeh. Namamih ham neh na ca rhoek ham mah rhap uh.

²⁹“Cayaa, camoe aka cun pawh bung, khut pawh rhang suk loh a yoethen,” a ti uh tue tah ha pawk coeng he.

³⁰Te vaengah tlang taengah kaimih n'tim thil laeh, mol taengah khaw kaimih m'vuei laeh, “pahoi a ti uh ni.