Luuka 22:11-61

¹¹Mwimuuze mwennyewe nyuupa yaya eto yoori: ‘Mwanliimu eetta oniruma owuuzelani yoori puuro anttelaaye ojavo njampo la Paashikowa na anakhiyoni awe pi vayi?’

¹²Othuuto ontta wuuthoonyezani nsana nwulweene wa vatulu oriina zaana zooshi, mwaattalele attaapho njampo nttho.”

¹³Yo khulawa khusikana epile Yinsa aawooziyeezo, khwaattalela etthu-yoojiwa ya Paashikowa.

¹⁴N'oofiya wakathi Yinsa na maaswihaapa awe khwiikhala vameeza.

¹⁵Khuwooza yoori: “Kaari ohithajiya venkivene onja Paashikowa vamote na-mweyo kihinalawe ohoowa.

¹⁶Kiniwuuzani yoori akinteela oja theenya njampo ntthi mpakha linttelaavo omariseliwa muufwalume wa Nnyizinku.”

¹⁷Athuuliyeevo jiikira khunshukhurwela Nnyizinku, khuwooza yoori: “Mwithuule mwaawanyena.

¹⁸Kiniwuuzani yoori akinrutela onywa nshumo wa nrayi wa wuuva mpakha ontaavo Ofwalume wa Nnyizinku.”

¹⁹Athuuliyeevo phaawu khunshukhurwela Nnyizinku, khumeya khuwenkha khuwooza yoori: “Opu mwiili aka onttelaaye ovahiwa khwa mweeyo, mwisala mwiretta etthiipi mwikifikhiraka miiyo.”

²⁰Khwa nanna ethiito nawiisha oja khuthuula jiikira khulupa yoori: “Jiikira eti wahati mpheya onrettiwaaye ti taamu yaka, enttelaaye wiittikha khwa mweeyo.

²¹Ila mwijuwe yoori, otule anttelaaye okikholisa ori vameeza attaapha vamote na-miyo.

²²Mwaana wa Pinaatamu onttela ofwa khwa nanna etthiipo Nnyizinku asharutheliyeezo. Ila atakhaliwa otule anttelaaye onkholisa.”

²³Yo khusala oozelana atthaaporu yoori anjuwe nlupa aari weettelaaye oretta etthu yaya eto.

²⁴Aphano maaswihaapa khusala anyakulisana atakhaka onjuwa paani eezeliyeeyo ottunkhulu vakatthi vaya.

²⁵Yinsa khuwooza yoori: “Afwalume a vathi apha aniiyana oshintta vakatthi wa atthu aya, na apale aneettettisaaye ofwalume oniwaatuvela olupeziwa onamaretta saana.

²⁶Ila mweeyo mwihiiye toowo, nttunkhulu vakatthi venu eeye ti nttiitthi aya, otule anlokozelaaye eeye ti namarumeyela aya.

²⁷Nttunkhulu ti paani, ti otule aniikhalaaye vameeza ama otule anrumeyaaye? Khaniiya otule aniikhalaaye vameeza? Ila vakatthi venu mweeyo, miiyo kiri nkhama otule anrumeyaaye.

²⁸Mweeyo ti ye mwiriiye vamote na-miyo mphule kinzayiniwaamo.

²⁹Nkhama etthiipo Paapa akinkhiyeeyo ofwalume, na miiyo kiniwinkhani mweeyo,

³⁰yoori mwije na mwinywe vameeza vaka muufwalume mwaka, na mwiikhale vakhukulu y'oofwalume yoori mwiphuke mahimo khumi na mawiri a Ezirayeele.

³¹Simawu, Simawu, Epiliisi avekela yoori awootooteni nkhama empepetthiwaazo tiriku.

³²Ila miiyo koolompela yoori amini yawo ehiwaashikhe. Amana orutela wiiya vamote na-miyo, owaalipisele azaawo.”

³³Simawu khujipu yoori: “Mbwanaaka, miiyo kakhupali wuulotta hatha nkhama nkalapooso, hatha nkhama ofwa.”

³⁴Ila Yinsa khunjipu araka: “Miiyo kiniwuuza weeyo Pheeturu yoori leelo eti likukhuwi lihineekhe, onkikhana swaafu ttatthu oraka khunkijuwa.”

³⁵Aphano Yinsa khuwooza araka: “Wakathi opule koorumiyeenini mwihina hatha mfukho wala napampa, ama shapatthu, niini yoosaleeliyeenini?” Yo khujipu yoori: “Hatha etthu khayaanisaleeliye.”

³⁶Ye khuwooza yoori: “Ila nasaapi eti otule ariina mfukho athuule na napampa awe anthuule. Otule ahina phanka oozanyise ajapi yawe oozanye.

³⁷Nkhama etthiipo Nttakhuzi la Nnyizinku linlupaazo yoori: ‘Ye onaalakiwa nkhama nanretta zootakhala.’ Miiyo kiniwuuzani khweele yoori sharuthi vitthu epi zirettikhane khwa miiyo, maana etile yaatikhiweeyo monkoni wa miiyo ena yoorettikhana.”

³⁸Maaswihaapa apale khulupa yoori: “Fweeyo apha Mbwana ninaaye phanka piiri.” Ye khujipu araka: “Weesha mwaasa aya opo!”

³⁹Khulankha khusala alawa vamwaako wa Oluveera nkhama etthiipo aazowereliyeezo, anakhiyoni awe khunlotta.

⁴⁰N'oofiya khuwooza yoori: “Mwilompe yoori mwihikwele muuzayiniwa.”

⁴¹Ye khuwaasusa vattitthiiru khukokhora khusala alompa araka:

⁴²“Paapa amana otakha, okilaze jiikira eti yoohoowa; ila ehirettikhane otakha waka miiyo, arettikhane matakhelo awo.”

⁴³Aphano khumpuwelela nlayikha la pinkuuni khusala linlipisela.

⁴⁴Ari mmashakha, khusala alompa woojilipisavo, mattottonka oovujuwela wawe khuretteya wiiya taamu khusala akwela vathi.

⁴⁵N'oolaavo aphale aari olompaavo, khweetta aphale aariivo anakhiyoni awe, khuwaasikana eettaka olala mwaasa woohuzunikha.

⁴⁶Khuwoozela araka: “Mwinlala-ni? Mwilankhe mwilompe yoori mwihikwele muuzayiniwa.”

⁴⁷Eettaka ottakhula etthiipile, khutavo atthu a waatta alokoziwe ti mmote wa anakhiyoni apale khumi na awiri aari wiitthiwaaye Yuuda. Ye khuta aphale aariivo Yinsa yoori amwinkhe peezhu.

⁴⁸Attaaphale Yinsa khuri: “Yuuda, Mwaana wa Pinaatamu oninkholisa na peezhu?”

⁴⁹Anakhiyoni awe nawoona vitthu epile khulupa yoori: “Mbwana, niwoomanane na phanka?”

⁵⁰Aphano nakhiyoni mmote khunshija nshiilo la nkhono-nlume mwiitthwaana wa haakhimu nwulu wa tiini.

⁵¹Ila Yinsa khuri: “Onlikhe ohinrutele!” Ye khukhola nshiilo la ntthu otule khunvonisa.

⁵²Aphano Yinsa khuwoozela attunkhulu a mahaakhimu a tiini na attunkhulu a anamweekesela a Nyuupa ya Nnyizinku na anamalokozela a tiini apale aateeliye onkhola araka: “Mwakiteela na phanka na puutta nkhama kiiyiye namalokozela wa anazompere?

⁵³Wakhula siikhu kaari wiiya vamote na-mweyo vaje wa Nyuupa ya Nnyizinku khuhisala mwikikhola, aphano, opu wakathi enu na otule ariina ofwalume wa n'yiiza.”

⁵⁴Aphano Yinsa n'ookholiwa khulawaniwa mpakha vaje wa haakhimu nwulu wa tiini. Pheeturu khusala anlottelela Yinsa woohimwaattami.

⁵⁵Yo khukhoza moottho vaje khusala oottha, na-ye Pheeturu khuta attaapho khwiikhala.

⁵⁶Njaazi mmote aariivo n'oomoona eekhaliye nshini wa moottho khumweekesa saaneene khuri: “Otu aari vamote na Yinsa.”

⁵⁷Pheeturu khukhana araka: “Weyo mwanankha! Miiyo akininjuwa ntthu aya oto.”

⁵⁸N'oovira wakathi vattitthiiru, Pheeturu khooniwa ti ntthu nkina khumuuza yoori: “Weeyo o wa khuntti ethiitile.” Ila Pheeturu khukhana araka: “Mwinyi, khahiyo miiyo!”

⁵⁹Oviriyeevo wakathi mmote, ntthu nkina theenya khulupachacha yoori: “Khweele-khweele otu aari vamote na-ye, maana otu aya na-ye nkalileya.”

⁶⁰Pheeturu khujipu araka: “Mwinyi! Miiyo akinjuwa etthu mwinlupaaye.” Eettaka ottakhula etthiipile, likukhuwi khwiikha.

⁶¹Mbwana khuzukuluwa khumweekesa Pheeturu, ye khufikhiri mattakhuzi apale ooziweeyo ti Mbwana yoori: “Leelo ethiiti likukhuwi lihineekhe, onteela okikhana swaafu ttatthu.”