Luka 22:11-61

¹¹Ferâ fic rune ʒiŋuc âzâcneniŋ: ‘Qaqazuzi gore ʒiŋuc mukac, fic maŋne wena motecfâc‐nane jaŋehec aakic lama nanaŋmu?’

¹²Iŋuc âzâcnepire fic maŋne kâcɋene moc ŋeŋe fofo wiac rumacke emasaŋ ekicne ŋofatume ira aakic lama rike bâmoc ezepirec.”

¹³Eme jahe rarâ wiac muwec sâc bâfuarâ aakic lama rike bâmoc epic.

¹⁴Eme nâzo dameŋ maickeme motecfâcne gâcne rocjopame fisirâ nâmbiŋ.

¹⁵Ehuc ʒiŋuc jazawec: “Ʒâic dameŋ‐nanezi bâmbeŋnuhame aakic lama ʒi ŋoŋehec nâpemurâ boc enarejec.

¹⁶No mupe mananiŋ: No aakic lama mocwâc mi nânâ juhape Anuture uucmaŋko fâri fideteŋ eocmu.”

¹⁷Iŋuc murâ waiŋ râqâc rorâ daŋge murâ ʒiŋuc jazawec: “Ŋoŋe rorâ nâ nareŋ gareŋ eniŋ.

¹⁸No ŋazape, waiŋ opâ mocwâc mi nânâ juhape Anuture uucmaŋ fua tâcnezokac.”

¹⁹Dâŋ i murâ poroŋ rorâ daŋge murâ bazurâ ʒiŋuc muhuc jarewec: “Kecʒi fâri‐nane, i ŋoŋere erâ qikiŋnekicne. Nore manasuhuc iŋuc nânʒepieŋ.”

²⁰Nânâ nâpie waiŋ râqâc rorâ iŋuc jaha jarehuc muwec: “Râqâc kecʒira ʒâʒâfic ɋâricnere socnane ŋekac. I ŋoŋere erâ qikiŋnekicne.

²¹Erâ manaŋgopieŋ, doc bacnuocmu eki nohec tebo ʒira wiac mâmâc ro nâc ehuc ŋekoperec.

²²Ŋic Fâri Wâtuŋne e hata muʒâwecnekicne ijaha raocmu. Â doc baocmu e ine, jei okacne mo iŋucne roocmu.”

²³Iŋuc mume motec jaŋe guru‐jeŋickonec mozi i eocmu muhuc wiwioc embiŋ.

²⁴Eku wâc motec jaŋe nâŋâcnaonec mozi femicne‐nâŋec jukac muhuc hehefaric embiŋ.

²⁵Epie Jesuzi ʒiŋuc jazawec: “Mâreŋ ŋicwofuŋ jaŋe ŋiczi kiŋaŋ qajareeŋgopieŋ â fekicne sâko jaŋe omanezi mumbiaŋ‐jopaeŋgopieŋ.

²⁶Ŋoŋerao ine iŋuc mi fuazejec. Ŋoŋerao kâcɋenezi piticnere sâc juzejec, â micnezi kiŋaŋ qaqare sâcko juzejec.

²⁷Me ŋoŋe muniŋ, wenimo izi fekicne? Nânâ mâc ŋehuc nâocmu eki fekicne, me rike bâmoc eocmu eki fekicne? Mâc ŋehuc nâocmuzi fekicne, i manaeŋgopieŋ. Noni ine ŋoŋere ŋondeŋko kiŋaŋ qaqa iŋucne erâ juekopac.

²⁸Ŋoŋe hâcne ʒârâ hâriŋ maŋko jupe jujufâc‐nane jueŋgopieŋ.

²⁹Eme Mamac‐nanezi guriŋ bapa gie munarewec iŋuc jaha noni ŋoŋe muŋarekopac,

³⁰ŋoŋe nore uucmaŋko tiwâ nâ ʒeri eniŋte â ŋicwofuŋ ŋeŋeo ŋehuc Israe ŋicguru 12 jaŋere dâŋ mutaraniŋte.

³¹“Simoŋ, Simoŋ, padi saja bapie wosâeekac iŋuc jaha Sataŋzi ŋoŋe ere meo fepie saja bacŋopaocte mujec.

³²Eme noni ine mamanasiŋge omaezacte gore erâ numupac. Irec go miti hatao mocwâc risierâ qomâfâcge keteŋ‐jopazemec.”

³³Mume Petorozi ʒiŋuc âzâcnewec: “Wofuŋ, go kâpâcwâruo me hâmocko fâtec fâpemu.”

³⁴Eme Jesuzi muwec, “Petoro, no gazape manac, qâqâczi miŋecgac ŋafeo mi dâŋehame goki jahec â moc micnucmu.”

³⁵Iŋuc murâ muwec, “Noni moneŋ tâmiric â he tâmiric â kikehuhu tâmiric sorec‐ŋopape ra basac qasac moc embiŋ me?” Eme jaŋe mumbiŋ, “Iŋuc aricne jâmbâŋ.”

³⁶Mupie ʒiŋuc ʒuhuckewec: “Â dameŋ ʒiŋuczia ine moc e moneŋ focnekacko ro bajuzejec, â moc e hemotec focnekacko rupe juzejec, â moc e ʒika basahuc ŋaqi qikiŋneme moc kitâcnecnezejec.

³⁷No mupe mananiŋ, findaŋdâŋ moc ʒiŋuc qâreŋkekicne: ‘E ʒika qaqa jaŋere guruo râembiŋ’, dâŋ i norao fârinehuc eocmu. Erâ nore dâŋ mukicne i mâmâc sasawa sanaŋke‐fâreocte dameŋ maickekac hâcne.”

³⁸Mume motec jaŋe ʒiŋuc âzâcnembiŋ: “Wofuŋ honec, ʒi ʒika jajahec fokopirec.” Eme muwec: “Sâcne.”

³⁹Eme ŋeku Jesu e ŋafe sâc ejujec iŋuc erâ hae beherâ Oliwa tikio feme motec jaŋe bâjâpembiŋ.

⁴⁰Eme jujujecko fisirâ motecfâcne ʒiŋuc jazawec: “Ŋoŋe eesâicko dockenʒipiŋte numuniŋ.”

⁴¹Iŋuc murâ qânâ wickepene raekac irec sâc rarâ dieŋzi herâ ʒiŋuc muhuc numuwec:

⁴²“Mamac, go manatec sâckeme mutec ʒâic guru ʒizi nowaruoc. Erâ nore dâŋ mâcne, gore dâŋ sanaŋkezejec.”

⁴³Iŋuc muhame sambâŋkonec aŋelo moczi waharâ basanaŋkewec.

⁴⁴Eme maŋzi ʒâic hâhâwicne ecneha fotariehuc numuwec. Ehame fofoŋac‐ticne soc ʒâmbâŋ iŋucne tâcnehuc mâreŋko wahawec.

⁴⁵Numuku faharerâ motecfâcne jaŋerao rarâ honec‐jopawec: Jaŋe busâqoczi bâdoc‐jopame betaŋkerâ guŋ fombiŋ.

⁴⁶Fohapie jazarâ muwec: “Ŋoŋe wemocte guŋ foŋgopieŋ? Eesâicko dockenʒipiŋte faharerâ numuniŋ me!”

⁴⁷Iŋuc muhuc domahame mi râsi guru ututuŋ fisinʒepieŋ i! Eme motec jaŋere âgo moc ʒâŋene Juda, eki micne bajarehuc Jesurao rarâ muduckewec.

⁴⁸Muduckeme Jesuzi ʒiŋuc âzâcnewec: “Juda, go wemocte Ŋic Fâri Wâtuŋne e muduckehuc doc bakomec?”

⁴⁹Eme Jesure kikefuŋfâc jaŋe wiac fuazo eme honerâ mumbiŋ, “Wofuŋ, ʒikazi jopanaŋ me?”

⁵⁰Iŋuc murâ jaŋeraonec moczi taha bapa sâkore kiŋaŋ motec ʒikazi qaocte hazecne fâreopec i qatarawec.

⁵¹Eme Jesuzi i honerâ muwec: “Ŋoŋe beheniŋ.” Iŋuc muhuc ŋic hazec‐ticne bâuahuc bâsomiewec.

⁵²Erâ taha bapa micne â ufuŋte polisman micne â soŋaŋ e roniŋte fisimbiŋ jaŋe ʒiŋuc jazawec: “Ŋoŋe nore manapie ʒika qaqa eme ʒika qaruc‐ŋeŋichec fisirâ rocnuŋgopieŋ me?

⁵³No ʒoaŋne ʒoaŋne taha ufuŋko ŋoŋehec juekopac, ehame ŋoŋe ira mi rocnumbieŋ. Ʒi ine ŋoŋere dameŋ maickekac â dapâcte tâpiri fua tâcnekac.”

⁵⁴Eme jaŋe Jesu rorâ bararâ taha bapa sâkore ficko bafembiŋ. Ehame Petoro e fisi fâresuc ehuc ʒâhec rawec.

⁵⁵Eme momori jaŋe sacmaŋko raʒirâ ʒoc ruqerâ ruahuc ŋehapie Petoro e iŋuc jaha raʒirâ ŋondeŋ‐jeŋicko ŋewec.

⁵⁶Ŋehame kiŋaŋ naru moczi fisirâ hone dedeŋnehuc muwec, “Ŋic keci ehec juekac wâc.”

⁵⁷Eme Petorozi mic bahuc muwec, “Ŋokac, no e mi honeekopac.”

⁵⁸Iŋuc murâ ŋeme mi ʒorahame ŋic moczi honerâ muwec, “Go hâcne jaŋere guruonec.” Eme Petorozi muwec, “Ŋic go, no aricne.”

⁵⁹Eme ʒâhec ŋic moczi fisirâ musanaŋkehuc muwec: “Â ŋic kecʒi jâmbomac ehec juekac, e Galilaia ŋic jaha.”

⁶⁰Mume Petorozi muwec, “Ŋic go dâŋ mutec kâuc bakopac.” Muhame izia qâqâczi dâŋewec.

⁶¹Eme Wofuŋzi forisierâ Petororao ʒâŋe fime Petoro e Wofuŋzi dâŋ ʒiŋuc âzâcnewec i manasuwec: “Qâqâczi mi dâŋehame go jahec â moc mic bacnucmu.”