Luka 22:11-61

¹¹Amur a biti tai ra luluai na pal dari: A Tena Vartovo i tir iu ba: Akave kaum pal na vaira ba avet ma kaugu tarai na vartovo avet a en ra magit na bolo lake tana?

¹²Ma na ve tar ta mumur ra ngala na pakana pal liu di tar vangan ia; amur a vaninare tana.

¹³Ma dir vana, ma dir gire tadav nam par i ga tatike, ma dir mal pa ra magit na bolo lake.

¹⁴Ba ra pakana bung i vut, diat ma ra tarai na vartovo dia ki.

¹⁵Ma i biti ta diat: Iau ga mamainge muka ba dat a en go ra magit na bolo lake ba pa di vakadik iau boko;

¹⁶tago iau tatike ta vavat: Pa ina en mule tuk ta nam ba da pait ot pa ia ta ra varkurai kai God.

¹⁷Ma i vatur tika na momamomo ma ba i tar pite varpa, i biti: Avat a vatur go, ma avat a tibe avat me;

¹⁸tago iau tatike ta vavat, ba pa ina mome mule ra vuai na vain papa gori, ma na tuk tar ta ra bung ba na pot i tana ra varkurai kai God.

¹⁹Ma i vatur ra gem, ma ba i tar pite varpa, i tabik ia, i tabar diat me, ma i tatike: Go ra pakagu. Di tul tar ia ure avat; avat a papait. go, ma avat a matamatane upi iau me.

²⁰Damana bula ra momamomo, ba i tar par ra nian, ma i tatike: Go ra momamomo a kalamana kunubu ta ra gapugu nina i talingir ure avat.

²¹Ma ra lima i nam i vagu tar iau, go kari ta go ra vuvuvung na nian.

²²A dovot ba Natu i ra tutana na vana da di ga kure; ma na kaina tai nina ra tutana i vagu tar ia.

²³Ma dia varvartir vargil ba to ia ta diat na pait go ra magit.

²⁴Dia vartoto vargil bula ba to ia ta diat i ngala kakit.

²⁵Ma i tatike ta diat: A umana king kai ra lavur Tematana dia papait na luluai na kaia ta diat; ma di vatang diat dia kure diat ba ra umana boina.

²⁶Ma koko avat a damana; nam i ngala ta vavat, boina ba na da nina i mur, ma nam i luluai na da tikai i toratorom.

²⁷Tago nuve i ngala, nina i ki ta ra nian ba nam i toratorom tana? Vakir nina i ki ta ra nian vang? Ma go iau ki pire vavat da tikai i toratorom.

²⁸Avat dat, ava ga tur maravut iau ta ra lavur mangamangana di ga valamlam iau me;

²⁹ma iau tibe tar ra varkurai ta vavat, da Tamagu i ga tibe iau me,

³⁰upi avat a ian ma avat a momo ta kaugu vuvuvung na nian ta kaugu varkurai; ma avat a ki ta ra umana kiki na king, avat a kure ra vinun ma ra ivu vuna tarai Israel.

³¹Simon, Simon, Satan i tir pa avat upi na tang valar avat da ra Vit;

³²ma iau tar araring ure u, upi koko kaum nurnur na panie kakit, ma tuka boko ba u tar nukpuku mulai, una vapatuan ra tara na turam.

³³Ma i biti tana: Luluai, go iau vaninara upi ina mur u ta ra pal na banubat ma ta ra minat.

³⁴Ma i biti: Petero, iau ve u, gori ba ra loko pa i riki boko, una vautul a varpuai ba pa u nunure iau.

³⁵I tir diat: Ba iau ga tulue avat, ma pa kavavat ta popopoi ba ta rat ba ta pal a kau, ava ga iba vang upi ta magit? Ma dia biti: Pata.

³⁶Ma i biti ta diat: Ma go, nina ba kana ta popopoi, na kap ia ka, damana bula ra rat; ma nina ba pa ta, boina ba na ivure kana olovoi ma na kul pa ra pakat na vinarubu.

³⁷Tago iau tatike ta vavat, ba da pait ot pa ia tagu go di ga tumu ia dari: “Ma di ga luk guve ma ra lavur tena varpiam.” Tago a dovotina da pait ot pa nam parika di ga tumu ia ure iau.

³⁸Ma dia biti: Luluai, a ivu pakat go kari. Ma i biti ta diat: I ot ika.

³⁹Ma i irop, i vana ta ra luana na Oliva, da kana mangamangana iat; ma ra tarai na vartovo dia mur ia.

⁴⁰Ba i tar pot ta nam ra gunan, i tatike ta diat: Avat a araring kan da valam pa avat.

⁴¹I ki irai kan diat da ra kulalongo na vat; ma i va timtibum, i araring dari:

⁴²Tama, ba u mainge, una tak vue go ra momamomo kan iau, ma koko da pait ra nuknukigu, da pait ra nuknukim iat.

⁴³Ma tika na angelo marama ra bala na bakut i tur pa, pirana, i vaongor kap ia.

⁴⁴Ma tago i liliut na kinadik, i ongor ma ra niaring; ma kana mangamangon i da ra ngala na tua na gap, i bura ta ra pia.

⁴⁵Ba i tut kan ra niaring i vana pire ra tarai na vartovo, i babare diat dia va mat, tago i tabun ra bala i diat,

⁴⁶ma i tatike ta diat: Dave ava va mat? Avat a tut, avat a araring upi koko da valam pa avat.

⁴⁷Ba i tata boko, nam di vatang ia Iudas, tikai ta diat ra vinun ma a ivut, i vut ma ra kor na tarai i agure diat, ma i tadav Iesu upi na galum ia.

⁴⁸Ma Iesu i biti tana: Iudas, una vagu tar Natu i ra tutana ma ra vargalum laka?

⁴⁹Ma ba diat dia varagur me, dia gire nam ba diat a pait ia, dia tir ia ba: Luluai, avet a varubu ma ra pakat vang?

⁵⁰Ma tikai ta diat i kita ra tultul kai ra tena tinabar i lualua, i kutu vue ra talingana ta ra papar a lima tuna.

⁵¹Ma Iesu i biti: Avat a nur vue. Ma i bili ra talingana, i varkotone pa ia.

⁵²Iesu i biti tai ra umana tena tinabar, ma ra umana luluai na vinarubu kai ra pal na vartabar, ma ra lavur patuana, dia tar vut upi ia, dari: Ava tar vana rikai vang ma ra umana pakat ma ra umana ram da upi ra tena nilong?

⁵³Ba dat ta ra pal na vartabar a bungbung, pa ava tulue ra lima i vavat ure iau; go muka kavava pakana bung, ma ra ongor na bobotoi.

⁵⁴Ma dia kinim pa ia, ma dia ben vaire; dia kap ia ta ra kuba i ra tena tinabar i lualua. Petero i murmur maro vailik.

⁵⁵Ba dia tar voto ra iap livuan ta ra gunan, ma dia ki varurung, Petero i ki maravut diat.

⁵⁶Ma tika na vavina i gire ba i ki ta ra kapa na iap, ma i bobobe muka, ma i biti: Go ra tutana dir ga varvaragur bula me.

⁵⁷Ma i varpuai dari: la An, pa iau nunure muka.

⁵⁸A ik namur, ta ra tikai i gire, ma i biti: U bula avat. Petero i biti: To An, iau pata.

⁵⁹Ma namur mulai, ba i par tika na pakana bung, tikai bula i takun vadekdek ia dari: A dovotina, go ra tutana dir ga varvaragur me, tago ia ra te Galilaia.

⁶⁰Petero i biti: To An, pa iau nunure nam u tatike. Ba i tata boko, a loko i riki muka.

⁶¹Ma ra Luluai i lingan, ma i bobe ung Petero. Ma Petero i nuk pa ra tinata kai ra Luluai, ba i ga tatike tana dari: Gori, ba ra loko pa i riki boko, una vautul a varpuai vue iau.