Luukaṉu 13:9-17

⁹Yiiya kutjupangka tjinguru mangarri pakalku. Wiyangka nyuntu watjantjala kala palyaṉa yatura waṉiku warukutu.’” Yiitjulu tjananya yara palunya watjara yalatji tjayiṯwayingku watjaṉu. Watiya palunya kuya nguwanpa ngaranyi mangarriwiya. Tjuwu tjuṯa palunya nguwanpa tjana kuya nyinanyi Katutjaku tjukarurruwiya. Katutjanya kaanaku mayutju nguwanpa nyinanyi rawa tjanampa paṯalpayi, tjukarurrurringkunytjaku, kuya palyalwiya wantirra tjukarurrulpiya nyinanytjaku.

¹⁰Palulanguru tjiṉṯu Tjarritiyingka, Yiitjulu tjananya nintiṉingi Tjuwuku tjaatjingka.

¹¹Tjaatji palula minyma pikatjarra nyinangi, pupapupa ulytjayinkupayi, mamungku yirriṯi patjara kuyaṉutjatjanu. Pika palunyatjarra rawa puntu nyinangi yiiya yayitinpala.

¹²Minyma palunya nyakula Yiitjulu yaḻṯirra watjaṉu, “Yulkumina. Nyuntu palyalpi nyinaku.”

¹³Yiitjulu pampura palyaṉutjangka, tjukarurrulpi ngarangi pupapupawiyalpi. Palulanguru minyma paluru Katutjanya waḻkuṉu.

¹⁴Tjuwuku tjaatjiku mayutju, Yiitjukura mulyarrarringu, Tjarritiyingka Yiitjulu minyma pikatjarra palunya palyaṉutjangka. Tjaatjiku mayutju paluru yaṉangu tjuṯangka watjaṉu, “Tjarritiyingka, pikatjarra tjuṯa wiya ngaakutu ngalya katinytjaku, ngangkaritjarrangku palyantjaku. Luwulampa ngaranyi tjiṉṯu tjikitjipalangka ngangkaritjarrangku waarrkarringkula palyantjaku, Tjarritiyingka wiya.”

¹⁵Mayutju Yiitjulu watjaṉu yalatji, “Wiyawanangkunyurra kuliṉi. Tjarritiyingkanyurra tuungkiyi ruupatjarraku, tjinguru puluka ruupatjarraku aḻṯururringkula yarrara wantirriyalpayi kapikutu.

¹⁶Palunya nguwanpa minyma ngaatjanya pikatjarraku ngayulu aḻṯururringkula palyaṉu Tjarritiyingka. Paluru tuungkiyi mungutja nguwanpa wiya paluru Yipuramaku walytja ngaṉṯitja nyinanyi, nganaṉanya nguwanpa nyinanyi.”

¹⁷Tjaatjiku mayutju paluru, palumpa walytja tjuṯaṯarra Yiitjukuraya mulyarra ngarangi. Yaṉangu kutjupa tjuṯangkuya wangka panyapa kulira yunyparringuraya, “Paluru ilta ngangkari tiṉatjarrangku pikatjarra tjuṯa tjananya palyalpayi.”