Luku 5:17-34

¹⁷Koto mende Jisasame endakali dupa mana lamaiyoo kateamopa Patasi mendapuapi mana setapae dupanya lao mana lenge akali mendapuapi dupa ipao peteami-pyaa. Dokaita Galili yuu dokonya taono wakale wakale dupanyapi yuu Jutiapi Jetusalemepi dupanya katao ipupala peteami-pyaa. Kamongo dokome baa pupu lasiamopa baame endakali yaina pyapae dupa kapa pao mee jakamaipenge jia-pyaa.

¹⁸Dopa piamopa akali mendapuame akali papa tambotae mende lapa tokonya soo epeami-pyaa. Dokaitame akali doko soo Jisasa andaka kateamo tengesa dosa setamana lao masoo soo tuu lao kolandao makande piami-pyaa.

¹⁹Makande piaminoaka doko, endakali longome tumbatae kateamino dokome andaka kolandapenge nanjia-pyaa. Dopa piamosa soo anda-ketae pyakalyetala anda doko tunguiyami-pyaa. Dopa petala baanya lapa toko doko kende katatala baa lapa toko doko-pipa endakali peteamino kaina dokonya Jisasanya enomba-kaita pyandeami-pyaa.

²⁰Dokopa Jisasame dokaitanya masoo miningi dupa kandatala lao pituu, “Wane, embanya koo dupa kunanya nepekelyona,” lea-pyaa.

²¹Pii leamo doko sepala mana setapae masingi akalipi dee Patasipi dupame nyakamalapo lao pituu, “Gote ikimi koo dupa kapa pao kunanya nepakamaipenge jilyamona, akali dake apimi Gote kilya kandao lelya kanjemape?” leami-pyaa.

²²Dopa lelyamino lao Jisasame kandatala dokaita lamaiyoo, “Aipuma nyakamame moname dopa lao masilyamipi?

²³Anduku laa nayapengepe? Akali dakenya koo dupa kunanya nepakamailyona lapenge dokope, pande baa sakatatala kaita paena lapenge dokope?

²⁴Dopaka doko, Endakalinya Ikiningi dokome isa yuu dakenya katao endakali dupanya koo dupa kunanya nepenge pupu lapae doko baa-kisa singi lamo lao kanjepalena,” lea-pyaa. Dopa latala baame akali papa tambotae doko lamaiyoo, “Emba sakata! Sakatatala embanya lapa toko doko nyoo soo andaka puu lelyona,” lea-pyaa.

²⁵Dopa leamo dokopaka akali dokome dokaitanya enombasa sakatatala baanya lapa toko doko nyepala soo baanya andaka pea-pyaa. Pao pituu Gote lao lalyema pea-pyaa.

²⁶Dopa piamopa endakali dupa pitaka walu lao mona andao paka kayapala Gote lao lalyoo pituu, “Indupa gii dakenya naimame angi waka mendapua kanjemanona,” leami-pyaa.

²⁷Dopa petala Jisasame kamaka pyakalyetala pao pituu muni takisa nyingi akali Lipai lenge mende takisa nyingi anda ongonya peteamo doko kandatala lamaiyoo, “Embame namba watao ipu!” lea-pyaa.

²⁸Dopa leamopa akali doko sakatatala baanya oapi dupa pitaka yakinatala Jisasa watao pea-pyaa.

²⁹Akali Lipai dokome baanya andaka Jisasanya nee longo yangakamaiyamopa takisa nyingi akalipi endakali wakapi longo dupa awapa dolapo-pipa nee nao peteami-pyaa.

³⁰Peteaminopa akali Patasipi dupanya mana setapae masingi akalipi dupame pii mumu longo lao Jisasanya disaipele dupa lamaiyoo, “Aipuma nyakama akali takisa nyingipi mana koo minao paenge endakali dupa-pipa neepi endakipi awapa nao pilyamipi?” leami-pyaa.

³¹Dokopa Jisasame dokaitanya pii sepala yanu pyakamaiyoo, “Endakali yaina napingi dupa dokosaa katatasa pupenge nanjilyamo. Yaina pyapae dupa pupenge jilyamo.

³²Nambame endakali epe tolatae dupa mona kapilyina lao epena laanya naepeo. Endakali mana koo minao paenge dupa mona kapilyina lao epena laanya epeona,” lea-pyaa.

³³Dopa leamopa akali mendapuame baa lamaiyoo, “Akali Jonenya disaipele dupame yuu gii longole nee nanao loma seta pilyamino. Patasi dupanya disaipele dupame dopaka pingima. Dopaka doko, embanya disaipele dupame neepi endakipi dupa nawaka kalyaminona,” leami-pyaa.

³⁴Dokopa Jisasame dokaita lamaiyoo, “Akali mendeme enda kelyapala watapae pyao baanya kaita miningi dupa-pipa awapa kalyamo gii dokopa, dokaitame nee nanena lao nyakamame kaita lyokapimilipi? Etete kapa pao kaita lyokala nayapimili!