17Te dxe ne kaneluu Jesus mén, nga zob tebëd men ne nak farisew no le tebëd maxter ley ne wruu yra gyëz ne nak lo lyu ne la Galilea no le ne nak lo lyu ne la Judea no le Jerusalén. Wdee Dëdyuzh poder lo Jesus chen yneseyaken Ne mén.
18Lex wdxiin tebëd mén wdxinneey men te mgyeey ne noze waknet led, zhoob men te lo lonwin. Rlaan men ndee men lenyuu chen ngyix men mengyiz guin lo Ne.
19Per rakdet tee men por tant ndal mén ndxin. Orguin wyeep men xtoo yuu, wlis men tebëd tezh; lex nes guin wlit men mengyiz guin ydebxloon men, wgyix men men lo Ne gwrooltee lad yra mén guin.
20Chene wii Ne ne rlaleedx yra mén guin Ne, re Ne lo mengyiz guin: ―Le xdol de che wak perdon.
21Orguin nuu lextoo men ne nak farisew yra men maxter ley: “¿Txu nak ménree ne rnii men diznyaan por Dëdyuzh? Rut rundet gan gun perdon xdol mén, sinke nonchee Dëdyuzh run gan run perdon xdol mén.”
22Per wdeegue Jesus kwent gan kox nuu lextoo men, lex re Ne lo men: ―¿Penak rlebleedx de zegwa?
23¿Pe mazre mbëëdee gue noo lo mén: “Le xdol de che wak perdon”, u ne gue noo: “Gutsaxee, gugya”?
24Orree kwii de yra de gante ne Men ne wdxiid wak Mén rap men poder nee gyëzlyuree por ne gun men perdon xdol mén. Lex re Ne lo mengyiz guin: ―Yna noo lo de, gutsaxee gulis xloon de, gugya ruxyuu de.
25Orgueguin waxee men nes lo yra mén guin, wlis men xloon men ne waa men lo, lex sya men ruxyuu men, ryaldet rzaknon men Dëdyuzh.
26Wzee wzak yrandxee mén guin, wzelo men no men wzaknzoon Dëdyuzh; kesentyent rdxe men yra men, re men: ―Nedxeree wii be ne gardetlel kwii be.
27Zhich guin wruu Jesus nga. Lex wii Ne lo te men ne la Leví ne rgoob zeg impwest, zob men ledne rezh zeg impwest, lex re Ne lo men: ―Gutanal noo.
28Orguin wzuli men; wsan men yrandxoo, zanal men Jesus.
29Zhich guin wlaa men te lniroo ruxyuu men por Jesus. Kesentyent ndal men ne rgoob zeg impwest ndxinno Ne lo mezh no ndal ke noze mén.
30Per wzelo yra men ne nak farisew yra men maxter ley ne nuu lad ke men, rnii men por xpén Ne, re men lo men: ―¿Penak ru rootee de yra de men ne rgoob zeg impwest no le yra de mendol?
31Wke Jesus, re Ne lo men: ―Men ne ngyëël, rkyiinden men doctor, sinke men ne rzhuun, men guin rkyiinen doctor.
32Noo zëëdet noo zëdye noo menwen, sinke le noo zëdye mendol chen ysaan men xgyelmal men.
33Lex wnabdiiz men lo Jesus, re men: ―¿Penak kesentyent rkwan xpén Xwa no le xpén men ne nak farisew no kesentyent rnab men lo Dëdyuzh, le xpén de syemper ru rootee men?
34Wke Jesus, re Ne: ―Lo te dooy, ¿peguin zun de gan ydeedet de ne gu xemyooz nobye myentras ne benak zu nobye lo men?
LUCAS 5
LUCAS 5:17-34