Luk 5:17-34

¹⁷Falosi so, lo utamsip tunum iso, iyo tal Yesus ami weng uyo weng selum o, kalalip tal Provins Galili so, Provins Judiya so, kaptam-ami abip ma ma iso, abip win finin Jerusalam so, kaali kulaa kela tal Yesus ami fanang tala-tala-keliwa, kulaali am ma daanule, Yesus ayo am kaptamu bomda unang tunum imi God ami weng ayo bakayin-balaya, Falosi sole, lo utamsip tunum malo ma iso, iyo tam tiindip weng sanip, God ami titil kaa Yesus ami diim kawu bom-buluya, unang tunum mafak-umusip iyo yam-talal kaa-balaya,

¹⁸tunum malo ma ita tunum angtiil taan dikiksa ayo dabaalip abiin tem una dibii-tal abip ababip-kup, kulaa dibii tam am Yesus ami bombe almi miit tem mepso kuluu daalupla dap-talalulak o, kalalip kanumip.

¹⁹Kata, iyo utamiwa yi, Kwin! am kaptam-ali muup-daabip kala, kalbip-kup iyo liip fen-tal-tal-kemip, liip dinim kelu kalbip-kup, kulaa nikil dibii tam am konal tii kela yak am kon ayo tak-duu kuyak-tii kelale, kulaali tunum angtiil dibim-alom taanin tap kesa ayo biin tem kabaaku kanola bom ilale, sok buku-lom akola dabaalip yakyak umbilaak unang tunum tiinaabip imi iipyak tem aba bilaak tii, Yesus almi be miit tem kulaak abale,

²⁰kulaa Yesus ayo itamala yi, Tunum nikil iyo atamipla, Yesus ali ti faneng nak-tunum kulaali, dap-talalulokoma kala, kal-bomdip kanubip kala, kalba-kup tunum angtiil alik dibim-ansa ami bokola-lomda: Nak-tunum kapyo, ban kemin kaali, alik takan-tiip-ti no, aka ko.

²¹Kemin, kulaa lo utamsip tunum so, Falosi tunum iso, iyo aket fukun-bam kanumip ko: Kwin! tawaal diim tunum kii dok kano-somdipla tunum unang imi ban wakamin kaa takan-telama disa yo! Ti God maakup ata-kup te! Tunum kalawaali dok kanolin tunum ma kalaata taba-lomda God kaa weng mafak bakaan-bamda kanum bakaba ni? ke-bam kanum bakamiple,

²²Yesus asiik imi aket kanolin aket fukunbip uyo uteyinba-kup, bokoya ko: Ibi kanimin o kalalipla, kanolin aket kaa fukunbip i?

²³Nali kalok nolin mafek mafek kanu-biliya, ibi abiltap nitam-ilomdip Kaa faneng bakaba nu nokokomip i? Nali bokoya-lomdi: Kapni ban kaali, takan-tiip-tili kayi! kalokomi kaa, ibi utamin disa ke-somdipla kaali, ibakaba no, nokokomip. Kemin ale, aa bokoya-lomdi: Tam tola unan o, akokomi kaata, utamdipla, Kuuli faneng bakaba nu, nokokomip.

²⁴Ipkal utamin o. Nali Dukum Ami Man kemin, nali nalmi titil dukum uyo kukuyili ipyo utam-somdipla, Kaali ibakan-umba disa; kemin, tawaal diim kalawu bombe kaali, ali ti unang tunum imi ban kemin uyo takan-tiiyokoma no nokokomip o, ke-bam ale, tunum angtiil dikiiknin ami bokola-lomda: Kabi tolalap kaltapni abiin dalaa tim-bilip tilip uyo, kuluu kutamalap kalapni am unan o! aka-laam-salale,

²⁵kulaa, tunum ayo maak fak-daalin tap unang tunum tal tiinaabip imi tiin tem kulu tam tola daak almi akan-unen-umba abiin uyo kuluu kutamala tam abip abala almi am din-ilomda, God ami win kaata-kup kufu-bamda fiyaap duuma ko.

²⁶Kanolala atamdiwa kawu, unang tunum alik iyo fanang alik tam baneyulala bokolip ko: Siin sawaayak kaa, kanolin kukup kaa ma atamsup disa yo! Kamala kulu kalanolin kukup kalawaata, Yesus ata kukuyila utamup o, kal-bomdip God ami win kaata-kup kufuumip ko.

²⁷Yesus ayo tunum angtiil dibim-alom taanin tap kesa ayo dap-talalula, yak aba din takis kaamin tunum imi am o kala, din takis kaamin tunum Livai ayo tiin bombe kala, kalale kulaa bokola ko: Nak-tunum a! kabi nami daang bakaalin tunum kelawa, naso nikil um-bomduwa, nami ok kaasiik ma kup-tiya, okok keman o! akale,

²⁸Yesus ayo Livai ami kanum bokola kem-salale, fan ayo tam tola bung alik kiiyo, keyimba-kup, yak Yesus ami daang bakaalala, alep unip ko.

²⁹Bombiile, Livai ayo Yesus ami fiyaap dukum-kup don-bamda ima fuu-bam, inum o! kalale, almi ok tabolin tunum imi bokoyilala, din ima fuu-bamdip, talal-bilipla, aptum kusal sole, takis kaamin tunum malo yaapkan iso, iyo tal Livai ami am tiliwa, tiin-aa-bomdip fiyaap duu-bam ima ina fakamipla,

³⁰kulaa Falosi kamok kamok so, kuno lo utamsip tunum ili yakal Falosi tunum kemin kiiso, iyo tal-ilomdip, Yesus ami daang bakaalin tunum imi itafii-bam ale, bokolip ko: Ibi kanimin o, kalaliwa, tal tunum mafak takis kaamin tunum isole, kukup mafak kutal-fukumin tunum iso, iyo tiin-bomdip ima so, ok so, kaa inaneng tababip i? kal-bomdip kanum bakamiple,

³¹Yesus asiik bokoya-lomda: Weng ma faldak-tii bokoyokomi kemin, weng sanin! Dokta ali tal tunum mafak-umulin dinim, ili yam-talalulokoma disa; ali tal tunum mafak-umulin ita-kup, yam-talalulokoma no.

³²Kanolin kemin, nali taldila tunum iyo boko-lomdip: Nuli tituun-kup tabasup tunum kemin, aket fal-sikilokomup dinim o, kebip kiimi yam-talalulon o, kalalila, talsii disa; nali taldi tunum iyo boko-lomdip: Nuli ban kemin tunum kemin, aket fal-sikilum o, kalbip kiimi yam-talalulon o kalalila, talsi te! kala kanum bokoya ko.

³³Tunum iip maakup maakup ma iyo tal Yesus ami bokola-lomdip: Kapyo, Jon Baptis ami kalaan tunum ili beten kemum o, kalip namti, ima fala-bom, beten ke-biliple, kuno Falosi yakal ilmi daang bakaalin tunum yakal ti kanolin kukup ultap uta kanu-bilip ken-umbip te! Lale, kapni daang bakaalin tunum itale, kanolin kukup uta kutal-fuku kanumin dinim ke-bamdiwa, ima inin-kup ken-umbip kaali, dok kano-lomdipla kanun-umbip i? akipla,

³⁴Yesus ayo almi sang kaata, faldak-tii-lomda bokoya ko: Tunum ma ayo unang kuluulale, tunum ami kayaak iyo ima fuu-bam imbile, alik maakup fiyaap dukum duu-mokomip. Kemin, fan yaap keyilu ili aptum kusal kii kasen-fokoya-lomdip: Ibi ima kala inin disa yo, yokokomip ema? Daa te; tunum ami kayaak kiili, ima kaa falaalokomip disa; tikip alik maakup inam-nokomip te!