Luke 6:24-29

²⁴E huaidu huoloo adu gi goodou ala e maluagina dolomeenei, idimaa, goodou gu mouli humalia.

²⁵E huaidu huoloo adu gi goodou ala e maaluu dolomeenei, idimaa, goodou ga hiigai! E huaidu huoloo adu gi goodou ala e gadagada dolomeenei, idimaa, goodou ga tangitangi manawa gee!

²⁶E huaidu huoloo maa nia daangada ga helekai humalia i goodou, idimaa, nia maadua mmaadua nogo helehelekai labelaa beenei i nia soukohp dilikai.

²⁷“Au e hagi adu gi goodou ala e longono goodou Au: Aloho i godou hagadaumee, heia nia humalia ang gi digau ala e hudiou adu gi goodou.

²⁸Hagahumalia ina digau ala e haga halauwa goodou, dalodalo i digau ala e hagammaemmae goodou.

²⁹Maa tangada gaa paa do gauwae, wanga ina di baahi dela i golo. Maa tangada gaa kae do gahu mahaa, wanga ina labelaa doo gahu uluulu.