Luke 2:25-36

²⁵Ikwereng-arey artwamp anyent Jerusalem-itwew anenh itnan Simeon. Ran mwerr-angker, ran angka rlterrk Akngey-wenh mwanty apentenh. Ran Akngeyew arternp mpwelhenh. Ra areyew, ikwerenh-rnem Israel-wenh-rnem renh-rnem tyarlewenty, ikwer-rnem-wenh-angkwarrarl anenh-wety.

²⁶Inweng Mwerr-angker ikwer awank angkew, “Ngarl itetharl aneyel-awaty, ntwap inngarl artwa renhan areyenh, Akngeyelarl thwenew.”

²⁷Arlta ikwerel-antey Joseph-then Mary-then Jesus-akert tyaty ilkwewarl alhew, Inweng Mwerr-angkerel artwamp Simeon ilew, tyaty ilkwewarl arrpemarl alheyew.

²⁸Simeon-el ampa akely Jesus arey-alhew, rap renh iney-alhew. Rap renh antwerrkew-anem, angkemel irrwerl-warl Akngey-warl-athek alakenh:

²⁹“Ingkart ngan ilkwarl! Angka awankarl ntwa atyeng ilew, rap inngarl aleyan ayntem! Aleman ayeng mwerr-anem, ayengan mpwelheyel-anem ilweyew-athath.

³⁰Atha awey akely arew-anem, ntwarl anewantherr-warl thwenew. Rarl ilkwerreyenhelan, ra apmwa akngerr-wety irrarlkeyenh. Alakenh ngarl arrwekel-antey iterrew, renh thweneyew ingkerrew.

³²Ra lyenenty-apeny, rarl alethangew-rnem iwerr lwewarrerneyenh ngkweng-warl-athek. Ingkerrelan ngkwenh-rnem Israel-wenh-rnem mwerr antweyenh.” Alakenh-anyem Simeon angkenh Akngey-warl-athek.

³³Aynikw-then amikw-then Jesus-wenh apateyelpew, ratherrarl awew, Simeon alakenh angkenh.

³⁴Artwamp ra angka mwerr-angkwarr angkew ikwer-atherr, rap Mary-ew-anem angkew, “Akngeyelan ampengkw ngkwenh thwenew, raw Israel-wenh-rnem ingkerrew angkeyew. Ingwer-rnem awelheyelarl-rnem Akngey-itwel aney-alpeyenh. Awelhey-angenh ingwer-rneman, ingwer-angkwarr rwelarl aney-alpeyenh. Ingwer-rnemel renh-rnem angka Akngey-wenh ilerl-aneyenh. Awelhey-angenh-rneman arlkarerreyenh, rernemap apmwel-ayeth angkerl-aneyenh intem.

³⁵Rernem irrtyertel apmwel-ayeth angkeyenh-rnem, iterrerl-anemel apmwel-ayeth rernem, kel ingwer-rnemelan iterl-areyenharl. Mary, ngethen arlkan apmwerrerl-alheyenh, ntwarl areyenh, ampengkw ngkwenh ilwenty.” Artwamp Simeon-elan alakenh-anyem Mary ilew.

³⁶Jerusalem-itwew arelhampw innga anenh, itnan Anna. Ranap angkakert, angka Akngey-wenh iley-angker. Ranap alerikw Phanuel-wenh, Asher-wenh-antey anew. Aleyakank ra itengerrew, rap anenh mpwernikw-akert aherrety 7-ew-atety, rap inpert-anem irrew ingwer-ingwer.