Luke 24:7-43

⁷En ni Fak e Girdi’ e thingar ni pi’ nga pa’ e pi tadenen, min richibiy ko kuruth min faseg ko yam’ ko chirofen nra gaman e dalip fen ngay.”

⁸Ma aram me yib ngan’ fapi ppin e thin ni yog,

⁹miyad pag fare low ko yam’ ngar sulod, miyad weliy urngin e pin’ey ngak fare ragag nge ta’reb i gachalpen nge tin kabay.

¹⁰Ma pi ppin nem e Maria Magdalene, nge Joanna, nge Maria ni chitiningin James; ni yad nge ku boch e ppin ni un ngorad e ra weliyed e pin’ey ngak fapi apostel.

¹¹Me finey fapi apostel ni thin nike weliy fapi ppin e thin ko balyang ma de riyul’ u wun’rad e tin ni karogned.

¹²Machane me sak’iy Peter ngalang nge mil nge yan ko fare low ko yam’; me ni tare’en ngalan me guy fapi mad ntay ko fare yam’ ma dakuriy ban’en ni guy ngabang. Ma aram me sul nga tafen ni be leamnag ko mang e rin’ me yodorom ni aram rogon.

¹³Ka chirofen nem ni be yan ruw i yad i yan nga bbinaw ni Emmaus fithingan, ni gonap’an e medlip e mayel nga orel u Jerusalem,

¹⁴ma yow be weliy murung’agen urngin e pin’em.

¹⁵Ma nap’an ni yow be weliy murung’agen, me chugur Jesus i yib ngorow ngu’u ranod i yan;

¹⁶miyow guy, machane de pow rorow.

¹⁷Me ga’ar Jesus ngorow, “Mang e gimew be weliy murung’agen ni fa’ani gimew be yib?” Miyow duwgil nike m’ug u owcherow nike kireban’row.

¹⁸Ma bagayow, ni Kleopas fithingan, e fith Jesus ni ga’ar, “Mog, kemus ni go’ gur e ka ga bay u Jerusalem ndawor mu nang e n’en ni kan rin’ u rom ko fa in i rran ni ba’aray nike yan?”

¹⁹Me fith ni ga’ar, “Bogi mang?” Miyow fulweg ngak ni lungurow, “N’en ni kan rin’ ngak Jesus nu Nazareth. Re mo’on nem e ba profet ni bay rogon u wan’ Got nge urngin e girdi’, ya bay gelngin e thin ni i yog nge tin ni i rin’.

²⁰Pi’in tolang ko prist rodad nge pi’in yad ma yog e thin rodad e ra pi’ed ngan turguy ni ngan thang e fan rok, miyad richibiy ko kuruth.

²¹Ma ug fineyed ni ir e bayi chuweg yu Israel u pa’ e to’ogor rok! Ma ku errogon ni daba’ e ke gaman e dalip e rran ngay nnap’an ni yodorom.

²²Ma boch e ppin ko biromad e ulung e ggin gad ko thin nrogned; ya ranod ko low rok ni be puf e woch,

²³machane dar pir’eged downgin. Miyad sul mu urogned nike m’ug l’agruw i engel ngorad ma karognew ngorad nike fos ko yam’.

²⁴Ma boch e girdi’ ko biromad e ulung e ranod ko re low rok nem miyad pir’eg ni bod rogon nike yog fapi ppin, machane dar guyed Jesus.”

²⁵Ma aram me ga’ar Jesus ngorow, “Ri gimew bbalyang, ri gimew ba sowath ni nge mich u wun’mew urngin e tin ke mu’ i yog rok e pi profet!

²⁶Gathi ri dabisiy ni nge gafgow fare Messiah ko pin’ey nge mu’ me yan ko fla’ab rok?”

²⁷Me weliy Jesus ngorow e tin ni murung’agen ni kan weliy u lan urngin kaen e babyor nib thothup, ni tabab ko yu ke rok Moses e babyor nge urngin e tin ni yoloy e pi profet.

²⁸Miyad chugur i yib ko fare binaw ni ir e yad be sor i yan ngay, ma susun e dabi un Jesus ko matal ni aram e ka be yan;

²⁹machane miyow taleg ni be lungurow, “Mu par romow; ya ke chugur ni nge m’ay e biney e rran ma ere nge aw e lumor.” Ma aram me un ngorow nga naun ni nge par rorow.

³⁰Me yan i un ngorow ko par nga tebel, me fek e flowa, me pining e magaer riy ngak Got; me t’ar fare flowa nge pi’ ngorow.

³¹Ma gowa puf owcherow miyow poy; machane me m’ay ngabang ndakur guyew.

³²Me lungurow, “Gathi da thamiyew rodow ni bod ba nifiy ni be yik’ u ngorongordow ni fa’ani i welthin ngodow u daken e kanawo’ me weliy fan fapi thin nu babyor nib thothup ngodow?”

³³Ka chingiyal’ nem miyow sak’iy ngar sulow nga Jerusalem, miyow pir’eg fa ragag nge ta’reb pi gachalpen Jesus ni kar mu’ulunggad yugu boch i gachalpen

³⁴ma be lungurad, “Fa’anem i Somol e riyul’ nike fos ko yam’! Ya Simon e ke guy!”

³⁵Ma aram me weliy fa gal i nem ngorad rogon nike m’ug ngorow u daken e kanawo’, nge rogon ni kar poyew Somol ko ngiyal’ ni ba’aram ni t’ar e flowa riy.

³⁶Nap’an ni ka yow be weliy ngorad e pi thin ney, ma yugu ra gin gad ma ke sak’iy Somol nga fithik’rad me ga’ar ngorad, “Nge yib e gapas ngomed.”

³⁷Me yib e tamdag nge marus ngorad nrib gel, ya ra fineyed ni yad be guy ba kan.

³⁸Machane me ga’ar ngorad, “Mang nike wagageyan’med? Mang ni gimed be fithmed u lanin’med?

³⁹Mu sapgad nga pa’ag nruw raba’ nge rifrif u eg mi gimed nang ni gag. Mmathgad nga dowag ngam guyed, ya kan e dariy e ufin nge yil u dow, ni bod rogon ni gimed be guyeg ni bay rog.”

⁴⁰I yog e re bugithin ney me dag pa’ nruw raba’ ngorad nge rifrif u ay.

⁴¹Machane ku de riyul’ u wun’rad, ya ke gel e felfelan’ ngorad ma kar ngatgad; me fithrad ni ga’ar, “Bay ban’en romed u roy ni yira kay?”

⁴²Miyad pi’ ngak bangi nig ni kan lith,

⁴³me fek nge kay u p’eowcherad.