LUKA 24:7-43

⁷Yeeriliye Mwaana a Muthu oneere opelekiwa mmadadani mwa athu othega, akomeliwe vamuraddini, nlabo na nethaaru avenyihiwe.”

⁸Vano, yahuubuwelela madhu aaye.

⁹Egawelilewo onsiyeni, yahisorihaga dhego dhatedhene wa anamasuuza kumi ni mmohi ni wa ale ateene yaaligi ni aliwa.

¹⁰Ahiyana ala aaligi Mariya Madalina, ni Zhuwana, ni Mariya amaaye a Tiyago, teto ni ahiyana amohi yaaligi ni aliwa yahisorihaga dhego dhatedhene wa arumiwi.

¹¹Madhu ala yaali woona ebeweene, aliwa kayarumeedhilege ahiyana ale.

¹²Mbwenye Peduru ovenya othamagela onsiyeni agafiyile ahiturumelagamo oonilege guwoove baahi dha linyu. Peduru ahiwelelaga vade vaaye otikiniheya mwaha wa dhende dheereyile.

¹³Nlabo nimohive nenddo anamasuuza abiili yaharaga dila ya murudda mung'onong'ono weeriwa Emawu; olapelanawa waali makilometuru kumi na mmohi, ofiya oZheruzalemi.

¹⁴Yegi othapanyedha dhego dhatedhene dheereyile.

¹⁵Ethapanyagave, Yesu mwiinyene ahawaaddamelaga, othaananaga ni aliwa.

¹⁶Meento eewa yahithitheyaga, kayamudidelilege.

¹⁷Yesu ahaawogagana, wiira: “Yego ddi yukathamihileni enathapanyedhiinyu mweeddaga?” Aliwa wiimela, ni okubanya.

¹⁸Namasuuza mmohi eeriwa Kelopa ahaakulaga, eeraga: “We oli muleddo oZheruzalemi wuno onatikina dhiireyile malabo alena evirile?”

¹⁹Oliye ahaakohaga aliwa: “Epadduwile ddi?” Vano, yahimwaaddelagamo dhende: “Dhampadduwele Yesu muNazareti. Oyene aali mulobwana namavuhulela owodha mmabasani ni mmadhuni vameentoni va Mulugu ni vameentoni va athu ateene.

²⁰Vano, woona apogo a anamakutha ni asogoleli eehu yahimpeleka wi akoniwe ni opiwa ni omukomela vamuraddini.

²¹Mbwenye hiyo noojejihedha wi aakale oliyeene oobole nlogo na Ezarayeli teto mwa dhatedhene, ala malabo maraaru dhego nda dhipadduwiwa.

²²Mbwenye teto ahiyana amohiwa yaali ni hiyo ehintikiniha voomaruwa njijiji nomaselo edhowaga onsiyeni.

²³Vano kifwanyilemo muruthu wa Yesu. Owelawo, yiiraga: ‘Nihifwanyiwa maroho a angero, ayene esorihile wi Oliye mugumi.’

²⁴Ebaribareene, amohiwa a mwa hiyo yahidhowa onsiyeni, woona ebaribariya dhawogile ahiyana ale mbwenye kiyamoonile.”

²⁵Yesu ahiwoga, wiira: “Nyo muli woona oolodhowa onyemela mirima, wi muroromele ni orumeedha dhiwogile anamavuhulela!

²⁶Kamunonile wi yaali yoofuneya Kirixtu oonihiwe goyi, avolowe munthithimihoni naaye?”

²⁷Vevale ahambeela waatapulela dhilebiwe dha Oliye mmalebani mateene wambeela niivuru na Mozezi ofiyedha mmaniivuru a anamavuhulela ateene.

²⁸Yaaddamelaga murudda wadhowigiisu, Yesu eeddaga woona onafuna akwaranye.

²⁹Mbwenye aliwa yaiiraga: “Kamukwaranye vowi ohuriba. Nduwa nihidhowa.” Oliye ovolowa okala ni aliwa.

³⁰Egakaratile vameeza, ahithukulaga mukaathe, otamala, opadhula, waagawela.

³¹Mowaaguva meento eewa yahifuguwaga, omudidela wi di Yesu, ahinanelaga vameentoni veewa.

³²Yegi owoga, mmohi ni mukwaaye yiiraga: “Mirima dheehu, kadhathamaga awogiye mundila antapulelaga Maleba, kahi ndo?”

³³Mudhidhi mmohive olene, yahimaruwaga, owelela oZheruzalemi. Waafwanya arumiwi kumi ni mmohi egatugumane ni amohiwa.

³⁴Yahawaaddelaga, wiira: “Ebaribareene, Nabwiya ohuvenyihiwa ohukumelela wa Simawu.”

³⁵Vano alobwana abiili ale, yahisorihaga dhawiireyele mundila, voomudidela ni vopadhula mukaathe ni wagawela.

³⁶Ewogagave dhego nda, Yesu ahikumelelaga vaari veewa, wiira: “Murenddele okale ni nyo.”

³⁷Aliwa yahirurumuwaga ni woova, yeesaga enoona ntowa.

³⁸Oliye waakoha, wiira: “Mukalele ddi owukuuwa ni wanganyedha mmirimani?

³⁹Moone madada aaga, ni manyalo aaga. Di Miyeene. Mugaababele, mugoone. Vowi ntowa kannakanna mwiili, naari makuva, munagoneliinyu Miyo Gihikanna.”

⁴⁰Awogagave nda, ahaawonihaga madada ni manyalo.

⁴¹Vano, aliwa kayarumeedhile, mwaha wohagalala ni otikina, Yesu ahiiraga: “Muhukannavo yooja?”

⁴²Nuwindo, yahimvahaga epaddi ya somba yowoosa ni nikandda na nwii.

⁴³Waakela oja vameentoni veewa.