Luka 24:7-43

⁷gebe ‘Oc sêkêŋ Ŋamalacnê Latu êndêŋ lau sec nêŋ lemeŋ nasênac eŋ êpi kakesotau ma ŋabêc êtu têlêac, go êndi sa.’”

⁸Lauo taêŋ gêjam ênê biŋ tau tonaŋ,

⁹tec sêmu aŋga sêô sêja ma têdôŋ biŋ samob tonaŋ ŋai gêdêŋ ŋacseŋomi 11 to lau ŋagêdô samob.

¹⁰Lauo tau tonec ŋai Maria aŋga Magdala agêc Joana ma Jakobonê têna Maria to lauo ŋagêdô, taŋ sêwiŋ êsêac naŋ, sêsôm biŋ tonaŋ gêdêŋ aposolo.

¹¹Mago lau tonaŋ sêŋô lauonêŋ biŋ tonaŋ ŋai e amboac sêboaco ma sêkêŋ gêwiŋ atom.

¹²Tec Petere gêdi ma kêlêti gêja sêô jakêtuc kêniŋ kêsêp e gêlic obo kwalam-kwalam tau gêc ma gêŋac lêma kêtu gêŋ tonaŋŋa, go gêc gêmu gêja kêtiam.

¹³Bêc tonaŋgeŋ ma lau tonaŋ nêŋ ŋac luagêc sêja malac teŋ, ŋaê Emaus, naŋ gêc Jerusalem ŋagala, ŋasawa kêtôm ockatu ŋasawa têlêac,

¹⁴ma agêc sêjam biŋ samob tonaŋ ŋai kêtu biŋgalôm gêdêŋ tauŋ.

¹⁵Agêc sêsôm biŋ tau ma sênac mateŋ gêdêŋ tauŋ sêmoa e Jesu tau jagêô lasê ma kêsêlêŋ gêwiŋ êsêagêc,

¹⁶mago agêc mateŋanô kaiŋ teŋ e sêjala eŋ atom.

¹⁷Go Jesu kêtu kênac êsêagêc gebe “Biŋ ondoc tec amagêc ajam kêtu biŋgalôm gêdêŋ taôm amoa intêna nec.” Ma êsêagêc sêpô dêducgeŋ sêkô.

¹⁸Go agêcnêŋ ŋac teŋ, ŋaê Kleopa, gêjô eŋ awa gebe “Aôm ŋac jaba tageŋ tonec, tec gômoa Jerusalem ma kôjala biŋ, taŋ sêgôm aŋga malac gêdêŋ ŋasawa tecenec naŋ atom me.”

¹⁹Go Jesu kêtu kênac êsêagêc gebe “Biŋ amboac ondoc.” Tec êsêagêc sêjô eŋ awa gebe “Biŋ tonaŋ kêpi Jesu aŋga Nasaret. Eŋ propete, taŋ kêsôm to gêgôm nê gêŋ ŋajaŋa, Anôtô to lau samob sêlic.

²⁰Ma aêacma lau dabuŋsêga to kasêga sêkêŋ eŋ gêdêŋ lau-mêtôcwaga sebe sênac eŋ êndu e sêjac eŋ kêpi kakesotau.

²¹Mago aêac tec taêŋ kêka gebe Ŋac tau tonaŋ oc ênam Israel sa. Biŋ tonaŋ mêŋkêsa ma galoc ŋabêc kêtu têlêac.

²²Go aêacma lauo ŋagêdô têtakê aêac gebe bêbêc kanucgeŋ sêja sêô

²³ma têtap ênê ŋawêlêlaŋ sa atom, tec sêmu sêmêŋ ma sêsôm gebe sêlic aŋela seoc tauŋ lasê, naŋ sêsôm gebe eŋ gêmoa mata jali.

²⁴Tec aêacma lau ŋagêdô sêja sêô ma têtap sa kêtôm taŋ lauo sêsôm naŋgeŋ. Mago ŋac tau tec sêlic eŋ atom.”

²⁵Go Jesu kêsôm gêdêŋ êsêagêc gebe “Melocagêc, tonêm ŋalêlôm ŋadanigeŋ e akêŋ gêwiŋ biŋ samob, taŋ propete sêsôm naŋ atom.

²⁶Ŋandaŋ tonaŋ gêjac Kilisi ŋawae gebe êôc, go êkôc nê ŋawasi sa atom me.”

²⁷Ma eŋ gêwa biŋ, taŋ teto kêpi eŋ naŋ, sa gêdêŋ êsêagêc gêjac m aŋga Mose to propete samob nêŋ.

²⁸Ac sêsêlêŋ e têdabiŋ malac, taŋ sebe sêna naŋ, ma eŋ gêgôm amboac gebe êôc lêlêc êsêagêc êna.

²⁹Tec agêc sêsôm sepeŋ ducgeŋ gebe “Ômoa ôwiŋ aêagêcmaŋ gebe kêtula ma oc jakêsêpgac.” Tec eŋ kêsô gêja gebe êŋgôŋ êwiŋ êsêagêc.

³⁰Gêdêŋ taŋ sêŋgôŋ sêwiŋ tauŋ sebe sêniŋ gêŋ naŋ, Jesu kêkôc polom mêŋgêjam daŋge ma kêpô kêkôc jakêkêŋ gêdêŋ êsêagêc.

³¹Ma agêc mateŋanô ŋakêŋkêŋ kêsa e sêjala eŋ su ma malamê.

³²Gocgo agêc sêsôm gêdêŋ tauŋ gebe “Kec, gêdêŋ taŋ eŋ kêsôm biŋ gêdêŋ aêagêc aŋga intêna ma gêwa biŋ, taŋ teto gêc naŋ sa, ma nêŋ ŋalêlôm kepeŋ aêagêc nec atom me.”

³³Ma gacgeŋ dêdi sêmu sêja Jerusalem e têtap êsêac 11 to nêŋ lau ŋagêdô, taŋ sêkac tauŋ sa sêŋgôŋ naŋ sa.

³⁴Ma lau tonaŋ sêsôm gêdêŋ êsêagêc gebe “Apômtau gêdi sa biŋŋanôgoc, tec geoc tau lasê gêdêŋ Simon.”

³⁵Go êsêagêc sêjac miŋ biŋ, taŋ kêsa aŋga intêna to sêjala eŋ gêdêŋ kêpô polom kêkôc naŋ, gêdêŋ êsêac.

³⁶Sêsôm biŋ tonaŋ sêmoa ma Jesu tau kêsa jakêkô êsêac ŋaluŋgeŋ ma kêsôm gêdêŋ êsêac gebe “Biŋmalô êndêŋ amac.”

³⁷Mago êsêac têtakê ma têtêc tauŋ ŋanô seboc sêlic ŋalau teŋ.

³⁸Tec eŋ kêsôm gêdêŋ êsêac gebe “Amboac ondoc tec atakê ma nêm ŋalêlôm ulu-ulu kêtu asageŋŋa.

³⁹Alic lemoc to ockaiŋ acgom, gebe aê tau tec kakô. Mêŋamoasac aê alic acgom. Ŋalaunê ŋamêsôm to ŋatêkwa amboac alic aŋga aêŋoc nec gêc atom.”

⁴⁰Kêsôm tonaŋ ma kêtôc lêma to akaiŋ gêdêŋ êsêac.

⁴¹Êsêac têntac ŋajam gêbôc nêŋ ŋalêlôm auc ma sêkêŋ gêwiŋ atom, sê taêŋ ŋaômageŋ. Tec eŋ kêsôm gêdêŋ êsêac gebe “Amacnêm gêŋ taniŋŋa teŋ gêc tonec me masi.”

⁴²Ma sêkêŋ i sigob ŋagêdô teŋ gêdêŋ eŋ.

⁴³Ma eŋ kêkôc su mêŋgeŋ êsêac sêlic.