LUKA 24:7-43

⁷eto “Taunimanima Natuna na dika taudia ediai taona bae torea, bae hasatauroa, a dina ihatoina ai ia na do baine tore isi lou”.

⁸Bena idia ese ena hereva e helalolaia une.

⁹Bena kohua e rakatania, e lou ela, unu ḡau iboudiai gwauta-taosi mai bamodia ida e hamaorodia.

¹⁰Hahinedia bini: Maria, hane Magdala; bona Ioana; bona Maria, Iakobo sinana; bona bamodia haida. Idia ese hari kara aposetolo taudia e hamaorolaidia.

¹¹To edia hereva mamina na gori na heto, bena asie abia dae.

¹²A Petro e tore isi, e heau lao, gara lalonai eha igoa, dabua mo e ita; bena ena ruma e lou henia, e vara ḡaudia e hoalai.

¹³Una dina ai, idia rarua na hanua maraḡina ta, ladana Emausa, ela: Ierusalem bona una hanua padadia na maila hitu sisivana.

¹⁴Dala ai idia na hari e vara ḡaudia e herevalai heheniva,

¹⁵bena edia hereva-hereva lalonai Iesu na dekedia e raka kahi lao, e bamodia.

¹⁶A matadia asie papa; asi dibadia ia.

¹⁷Ia eto, Umui na dahaka dala ai o herevalai hehenimu? Bena raruosi e gini, vairadia e hua.

¹⁸Bena idia ta, ladana na Kleopa, ese e haere henia, elo, Oi na Ierusalem ai o noho edeamu, una dainai hari e vara ḡaudia na asi dibamu a?

¹⁹Ia eto, Dahaka ḡau? Idia eto, Iesu, Nasaret tauna, sivaraina. Ia na peroveta tauna, Dirava vairanai bona taunimanima iboudiai vairadiai, ena kara bona ena hereva danu mai siahudia.

²⁰A hahelaḡa taudia bona hanua Iohiadia ese e revaia mase, e hasatauroa.

²¹A ai banava ato ia na Israel edia hahemauri tauma. Dina toi vada ela unu ḡau e vara;

²²harihari emai hahine haida ese vada e hahoamai. Idia na daba matana ai gara ela,

²³to tau-anula asie davaria; bena e lou ema, e tomu aneru haida e itadia, bona unu aneru ese e hamaorodia ia na vada e mauri lou eto.

²⁴Bena bamomai haida danu ma gara ela, hahine edia hereva heḡereḡerena ai e davaria, to ia be asie itaia.

²⁵Bena ia ese e gwau henidia, eto, Kavakava taumui, laloduhu taumui, peroveta taudia edia hereva asio abi daemu.

²⁶Dia maoro a, Keriso hisi unu baine ani tonla bona hairaina baine abia?

²⁷Bena Mose bona peroveta taudia edia buka ai ia sivaraina e tore herevadia iboudiai anidia ia ese e hadibalaidia.

²⁸E lao henia hanuana vada e kahira-kahira, bena ia na baine raka hanai eto.

²⁹To raruosi ese e rua, eto, Mani baita noho, badina be ado vada eme rahi, dina vada be dihomu. Bena ia na idia ida ruma ai e dae kau.

³⁰Tatoiosi aniani gabuna ai e ege diho, bena ia ese flaoa atagana ta e abia, e hanamoa, e bitua, raruosi e henidia.

³¹Bena matadia e papa; dibadia ia. Bena vairadia amo vada e puki oho.

³²Bena raruosi e hereva heheni, eto, Dala ai e hereva henida, bona Buka Helaḡa anina e hadibalaida negana ai, laloda e siahu ani?

³³Bena idia e tore isi, lerusalem e lou henia, gwauta-taosi mai bamodia ida heboudia ai e davaridia.

³⁴Idia ese raruosi e hamaorodia, eto, Momokani, Lohiabada vada e tore isi, bona Simona enai vada e hedinarai.

³⁵Bena raruosi ese dala ai e vara ḡaudia na e hamaorolaidia, bona flaoa atagana ibituna ai lalodia e parara herevana danu.

³⁶Edia hereva lalonai, Iesu bogaragidiai e gini, bena eto, Maino emui ai baine mia.

³⁷Idia na kudoudia e hetaha, bona gari ese e butudia tao; banava eto laulau ta.

³⁸To ia eto, Dahaka dainai kudoumui e hetahamu? Dahaka dainai o daradaramu?

³⁹Imagu bona aegu ame ita: lau binai. Ame daugu toho, vada ba diba; badina be laulau na asi hidiona bona asi turiana, hari lau o itagumu heḡereḡerena.

⁴⁰Unu e gwau toma, bena imana bona aena e haheitalaidia.

⁴¹To edia moale bona edia hoa daidiai idia na dounu e daradara. Bena ia ese e nanadaidia, eto, Amui taina mia eiava?

⁴²Idia ese gwarume taina, vada e gabua ḡauna, e henia;

⁴³bena ia ese e abia, idia vairadiai e ania.