LUKA 24:7-43

⁷‘Mwana wa Munhu kolondigwa yageligwe mmakono ga wanhu wene vilozo, na womuwamba mumsalaba, na zua da ikadatu kozuka.’ ”

⁸Aho waja iwatwanzi wakumbukila mbuli zake,

⁹wabwela kulawa kudipanga, na kuzilonga mbuli zija zose mwa wanahina longo dimwe na imwe na mwa wanhu wose wasigale.

¹⁰Watwanzi waja wakala Maliamu kulawa kiwambo cha Magidala, na Yoana na Maliamu mamaake Yakobo. Wao hamoja na watwanzi wayagwe wazilonga mbuli zino mwa watumigwa wa Kilisto.

¹¹Ila watumigwa wa Kilisto wagiza gaja gawalongile waja iwatwanzi ukala uponela, avo hawawategeleze.

¹²Ila Petulo kenuka kakimbila kachola kudipanga, kainamila kasungulila, kona isanda iiyeka. Abaho, kasegela haja hana dipanga kabwela ukae, kuno yokanganya gaja galawilile.

¹³Zua didija wanahina zake Yesu wabili wakala wochola kukiwambo kimwe kikemigwa Emau mwanza wa masaa mabili kulawa Yelusalemu,

¹⁴wakala wolongelela, wogalonga gaja gose galawilile.

¹⁵Viwakalile wolongelela kuno wokiiuzagiza, Yesu mwenyego kawakwenhukila kailongoza nao.

¹⁶Wamona ila meso gao gazuilwa sambiwamtange.

¹⁷Yesu kawauza, “Mbuli zaki hizo zimuisimulila mnzila?” Wema wanyamala tulu. Kuno vihanga visifukile.

¹⁸Munhu imwe mmwanza wao yokemigwa Kileopa kamuuza, “Gweye wiyeka iyo muhenza huzitangile mbuli zija zilawilile haja Yelusalemu mazua madodo gabitile?”

¹⁹Kawauza, “Mbuli zaki?” Na hewo wamulongela, “Mbuli zimulawilile Yesu wa Nazaleti. Heyo kakala muhokozi mwene mhiko mmbuli ziyalongile na zija ziyatendile hameso ga Mulungu na hameso ga wanhu.

²⁰Wakulu wa wakulu wa nhambiko na wakulu zetu wa isi wamgela mnhaguso ya ifa, avo kawambigwa mumsalaba.

²¹Ila tweye tutamanila kamba heyo iyo yondayaikombole isi ya Islaeli! Tuhagaleka higo gose, lelo zua da ikadatu songela vigalawilile gano.

²²Vivija watwanzi wayagwe wa mdidale jetu watusinhusa, waidamuka wachola kudipanga,

²³ila hawaluvikile lukuli lwake. Wabwela walonga wawona wasenga wa Mulungu wa kuulanga, wawalongela kamba Yesu mgima.

²⁴Wanhu wayagwe wakalile mdale jetu wachola kudipanga wavika vivija kamba viwalongile watwanzi waja, ila hawamonile.”

²⁵Abaho, Yesu kawalongela, “Habali muli wabozi kamba avo, na habali muli na mioyo izalame, kuzitogola mbuli zose zawalongile wahokozi?

²⁶Vino Kilisto Mkombola halondigwa yagaye m'vinhu kamba avo, abaho, yengile muyenzi yake?”

²⁷Avo Yesu kawasimulila mbuli zimulonga heyo mwenyego muna Zinyandiko Zing'alile, songela vitabu va Musa na Nyandiko Zing'alile za wahokozi wose wa Mulungu.

²⁸Viwakwenhukile ikiwambo chawakalile wochola, Yesu kaitenda kamba vija kogendelela na mwanza,

²⁹ila wamuyalalila ng'hani, wolonga, “Kala hano na tweye, kwavija zua diswa na ziza dingila.” Avo kengila mng'anda kakala na hewo.

³⁰Kakala hasi yaje nao mandia, kasola mkate, kamuheweza Mulungu, abaho, kaumogola kawagwelela.

³¹Baho meso gao gagubuka, wamtanga, ila heyo kayangayuka havihanga vao.

³²Wakiilongela, “Mioyo yetu haiding'huke ng'hani na ndeng'helelo, kipigiti viyakalile yolonga na tweye mnzila na kutugubulila Zinyandiko Zing'alile?”

³³Bahaja wenuka wabweleganya Yelusalemu, wawavika waja wanahina longo dimwe na imwe waiting'hana hamoja na wanhu wayagwe,

³⁴na kulonga, “Kweli Mndewa kazuka na kamulawilila Simoni!”

³⁵Baho waja wanhu wabili wasimulila gaja gawalawilile mnzila na avija viwamtambule Mndewa kipigiti viyakalile youmogola umkate.

³⁶Kipigiti waja iwanahina wabili hawanamambukiza kuwapetela gano, bahaja Mndewa mwenyego kema mdidale jao, kawalongela, “Tindiwalo diwe hamoja namwe.”

³⁷Wasinhuka na kona bwembwe wagiza wakala wokona mzimu.

³⁸Ila heyo kawauza, “Habali mkona bwembwe? Habali mdungwadungwa mmioyo yenu?

³⁹Loleni makono gangu na magulu gangu. Mwone kamba iyo nene. Nibabaseni mwone kamba nie siyo mzimu, kwavija mzimu wabule lukuli na mizege kamba vumnyona nie vinili.”

⁴⁰Kagalonga gano na kuno yowalagusila makono na magulu gake.

⁴¹Wakala wamemile ndeng'helelo ng'hulu ng'hani na mkanganyo kuno wang'hali hawanatogola kamba iyo heyo, avo kawauza, “Mna kinhu chochose hano cha kuja?”

⁴²Wamgwelela kidanga cha somba kibanikigwe,

⁴³kakisola kakija hameso gao.