Lukas 13:9-28

⁹A ma a pan wa, ari me mau, a ma so, komui ap pan paledi sang.

¹⁰A kotin padapadak nan sinakoke eu ni ran en sapat.

¹¹A kilang, li amen mia, me ngen en somau ti poa par ngaulwalu, a kos pena o sota man kak uda.

¹²Iesus lao kotin masani i, ap molipei wong i masani ong i: Li, koe en maioda sang om somau!

¹³I ap kotin pwil po a lim a kan, i ari madang kasinenda, kapikapinga Kot.

¹⁴A saumas en sinakoke o makara kida pan Iesus a kakelada i ni ran en sapat, ap sapeng indang pokon o: Ran wonu, aramas en dodok, i ansau me komail kodon kakelada, a iermen ni ran en sapat!

¹⁵Kaun o ap kotin sapeng i masani: Malaun koe, kaidin komail karos kin lapwada kau o esel sang deu a kalualang nim pil ni ran en sapat?

¹⁶A li men et, me nain Apraam seripein, me Satan saliedi par ngaulwalu, me so mau, en lapwada ni ran en sapat?

¹⁷Ni a kotin masani mepukat, karos me palian i, ap namenokala o aramas karos peren kida wiawia mau kan karos, me wiauier pa a.

¹⁸A a kotin masani: Wein Kot rasong da? O da me I en karasai ong i?

¹⁹A rasong wantuka eu, me aramas amen kasela nan matuel ap wosada, wiala tuka kalaimun pot, o manpir en pan lang kaukauson nan ra kan.

²⁰A pil kotin masani: Da me I en karasai ong wein Kot?

²¹A rasong kalep kis, me li amen ale, okila nan kasak en plaua silu, karos lao mutala.

²²Ni a kotilang Ierusalem, a kotin padapadak sili nan kanim laud o tikitik kan.

²³Amen ap potoan ong i: Maing, me malaulau pan maurela? A kotin masani ong irail:

²⁴Ngiangi en pedelong ong nan wanim tätik, pwe I indai ong komail, me toto pan sosong pedelong ong, a sota pan kak.

²⁵A kaun pan im o lao udar ritingidier wanim o, komail ap pan pikikidi letelet ni wanim o indada: Maing, ritingida sang kit! A ap pan sapeng indang komail: I sasa komail, o wasa me komail ko sang ia.

²⁶Komail ap pan pikikidi indada: Kit me manga o nim imp omui, o komui pil kaukawewe nan atail al akan.

²⁷A i me pan inda: I indai ong komail, I sasa komail o wasa komail ko sang ia, ko wei sang ia, komail karos me wiawia sued.

²⁸Sangesang o teterok ap pan wiaui, komail lao kilang Apraam, o Isaak, o Iakop, o saukop akan karos nan wein Kot, a komail pisikonla sang.