Luuka 13:9-28

⁹Ana moƴƴa ki rima ɗoo e mawuuri. So ki rimaali, peƴƴaa ki.»

¹⁰Waɗiino e ɲalaande fowteteende wootere, Iisaa ana darii ana waajoo ley suudu waajordu wooturu.

¹¹Debbo gooto mo ladde ɲawni duuɓi sappo e jetti ana tawaa ɗon. O turiiɗo tan, o waawaa dartaade fey.

¹²Nde Iisaa yiinoo mo ndee, noddi mo, wii mo: —Banndam debbo, a daɗii e ɲaw maa oo.

¹³Iisaa fawi juuɗe mum dow makko, non o dartii cot! Hedde omo yetta Laamɗo.

¹⁴Jaka hooreejo suudu waajordu oo mettaama ko Iisaa sellini neɗɗo ley ɲalaande fowteteende koo, wii yimɓe ɓee: —Balɗe jeegom kaanɗe golleede ana ngoodi. E ɗeen balɗe kaan-ɗon warde sellineede, wanaa e ɲalaande fowteteende.

¹⁵Iisaa jaabii mo, wii: —Naafigi'en! Wanaa homo e mon fuu ana humta nagge mum naa ndakiiwa mum ɲalaande fowteteende yarnoya ɗum naa?

¹⁶Oo debbo taanii Ibarahiima, mo Ibiliisa haɓɓiri duuɓi sappo e jetti, haanaa humteede ɲalaande fowteteende naa?

¹⁷Nde Iisaa haalnoo ɗum ndee, wayɓe mum ɓee fuu njaagii faa walaa seese. Kaa jamaa oo fuu ana seyii e dow kaayeefiiji ɗi o waɗata ɗii.

¹⁸Iisaa wii: —Hono Laamu Laamɗo wa'i? Koɗum nanndinan-moo-mi?

¹⁹Laamu Laamɗo ana nanndi e ngeeƴu buyaage mo neɗɗo ɓami, aawi e sardiŋe mum. Ngeeƴu oo fuɗi, laatii lekki faa pooli ana ɲiɓa cuuɗi e caɓe mum.

²⁰O wii kasen: —Koɗum nanndinan-mi e Laamu Laamɗo oo?

²¹Omo nanndi e ƴuufinirdi ndi debbo ɓami, so jiiɓi e saawal tati conndi alkama faa ndi fuu ndi ƴuufi.

²²Iisaa ana fa'i Urusaliima, ana faŋa geelle e gure fuu, ana waajoo.

²³Neɗɗo gooto lamndii mo: —Moobbo, yimɓe seeɗa tan kisata naa? O wii ɓe:

²⁴—Tiinnee naatiron damal paaɗungal ngal, sabi miɗo wiya on: heewɓe njiɗan naatude, ndonka.

²⁵So jom galle oo immiima sokii damal ngal, onon on keedii sella oɗon calmina, oɗon mbiya: «Kalfaaɗo, udditan min!» o jaaboto on: «Mi anndaa to njeye-ɗon!»

²⁶Nden, on ndaroto oɗon mbiya: «Min ɲaamdii e maa, min njardii e maa, a waajike e daalaaje amen.»

²⁷Mo jaaboto on: «Mi anndaa to njeye-ɗon. Ngoɗɗee kam, onon ooɲiiɓe!»

²⁸On njiyan Ibarahiima e Isiyaaka e Yaakuuba, kaɲum e annabaaɓe fuu ley Laamu Laamɗo, tawa onon oɗon mbedaa sella. Ɲannde nden on mboyan, on ŋerƴondiran ɲiiƴe kammari mimsee mon.