San Lujc 13:9-28

⁹Rupent zian tian, per bal id zacan dxel tügan.”

¹⁰Tijb dxej raziiladx ree bejn, culüü Jesús bejn ree lën tijb yadoo,

¹¹yagaj zaꞌ tijb béngunaa ma gojc chiinbichoon ijz ragxuuman, tijb xindxab basaꞌn laaman con tijb bëw xijchaman, ad rileꞌtczi yaliman.

¹²Chi baguiaa Jesús laaman, gurejdxaman laaman, rëbaman: ―Na, ma bayajquil guialguijdx ni goquil.

¹³Dxel badxiib yaaman guijcaman; abiꞌ loj hor guin gajc baliman, zianz guzuloj cuzaꞌtaman Dios zagdxe.

¹⁴Per bén rniabee lën yadoo guin dád bidxeꞌchaman guial bayüjn Jesús bén guin dxej raziiladx ree bejn, dxel rëbaman loj ree bejn: ―Xhoꞌp dxej yuꞌ guial güün bejn dxiin, loj ree dxej guin gol guida din yayajquidi, per ad dxej raziiladxt bejn.

¹⁵Badxiꞌ Dad Jesús laan rëbaman: ―Bén rusquiee, ¿nid rxhiec xgoꞌndi o xburidi dxej raziiladx ree bejn ya par chiquiëꞌdi laa reeb nijs?

¹⁶Béngunaa guie zëëdaman loj xdiaa Abraham, ma gojc chiinbichoon ijz naxhii xindxab laaman con guialguijdx guie. ¿Wen id zajc yayajcaman dxej raziiladx ree bejn ya?

¹⁷Chi rëb Jesús zian, gra ree bén rdxeꞌch laaman bayaꞌn xtu; per graczi ree bejn rabaa guial ruguiaa reeman gra ree ni zagdxe ni rüjnman.

¹⁸Rëb tëë Jesús: ―¿Xhienaag ganin na̱j xguialrniabee Dios o xhie gulün lojdi din chigniaꞌdi xhienaag na̱j xguialrniabeeman?

¹⁹Laan na̱j ziꞌc xhaj moxtajs ni rxübin bejn loj xguiniaaman, rniꞌsan xt rajcan yag naroob. Abiꞌ guial naroob daꞌt rajcan xt rüjn xguixbitiaꞌs ree biguijn xidxan.

²⁰Rëb Jesús zatijb: ―¿Xhienaag ganin na̱j xguialrniabee Dios?

²¹Laan na̱j ziꞌc levadur ni rugoꞌch tijb béngunaa choon midid harin persi rusaaguijn gra cob guin.

²²Chi zë Jesús Jerusalén, rulüüman bejn ree luguiedx naroob ree në ree luguiedx dobëz niz lod rdëdaman.

²³Abiꞌ tijb bejn gunabdiidx lojman rëbaman: ―Dad, ¿taꞌnz ree bén gac perdon ya? Badxiꞌ Jesús laan rëbaman:

²⁴―Gol been naguiejn din chuꞌdi niz roꞌ port nadëë, din naj rni lëjt, zien ree bén rën chuꞌ, per ad zileꞌt chuꞌ reeman.

²⁵Din chi chisu bén na̱j lidxan gusiaawaman roꞌ port guin, lëjt guial yayaꞌndi xchu, gucaadi roꞌ port guin guiëbidi: “Dad, guxhal.” Per yadxiꞌman xtiidxidi naman: “Ad ragbeetan ban zadi.”

²⁶Dxel suloj guiëbidi: “Tijbzi badaaw ree, tijbzi badüꞌ ree, niz la̱d dux nejzan balüül dunujn.”

²⁷Per naman lojdi: “Ma rnin, ad ragbeetan ban guzadi. Gol biquied lon béndol.”

²⁸Ni goondi gaw tëë layidi chi guguiaadi Abraham, Isaac, Jacob, në gra ree bén badëë xtiidx Dios loj ree bejn, zaꞌ reeman lod rniabee Dios, guiáad lëjt yariicadi.