San Lucas 13:9-28

⁹Cˀia⁴ tsa² no¹ xi³jnco³ coa⁴-le⁴ to³, nta³-ni¹ˀni³. Cˀoa⁴ tsa² mai³, coi⁴chai¹³-ˀni³.

¹⁰Jnco³ ni⁴čhjin³ ni²cja¹ya³ Jesús tsa³ca³co¹ya³ ya⁴³ ntˀia³ sinagoga.

¹¹Coe⁴-ni³ jnco³ chjon⁴² xi³ čhja³ˀaon²jan² no¹ tjin¹-le⁴ ntjao⁴ xi³ nta³jin³ xi³ tsjoa¹-le⁴ chˀin³. Cji³nia³ nca³ tsˀa³mjen³, cˀoa⁴ ni⁴to⁴jo³-jin²sˀin² ma³qui²xi⁴.

¹²Cˀia⁴ nca³ Jesús tsa³ve³, qui³nchja⁴-le⁴: Chjon⁴², je³to²mjen³nta³-lai⁴ chˀin³-li⁴.

¹³Jesús tsa³ca¹jna³son²-le⁴ ntsja³, cˀoa⁴ nti⁴ton⁴ tsa³cja³qui²xi⁴-ni³, cˀoa⁴ tsa³cˀa³sje³je³ya³ Ni³na¹.

¹⁴Je² cho⁴ta⁴ti¹tjon²-le⁴ ntˀia³ sinagoga coan³jti³-le⁴, nca³ Jesús qui³si³xqui³-le⁴ cˀia⁴ nca³ ni⁴čhjin³ ni²cja¹ya³. Cˀoa⁴ cho⁴ta⁴ti¹tjon² qui³tso²-le⁴ cho⁴ta⁴ncjin² xi³ ya⁴ tjio¹: Jaon³ ni⁴čhjin³ tjin¹-ni³ nca³ ma³ ni²xa¹. Coi³ ni⁴čhjin³-ve⁴ nčhoao¹³, cˀoa⁴ coan⁴nta³-nio³, cˀoa⁴ mai³ cˀia⁴ nca³ ni⁴čhjin³ ni²cja¹ya³.

¹⁵Cˀia⁴ je² Nai³-na¹ qui³tso²-le⁴: Cho⁴ta⁴ jao²ncjain¹ nio¹³. Jnco¹jnco¹ nca³ jon²-vi⁴, a³ tsi² chjo¹jnta¹nˀion¹³ nčha⁴ja⁴-no³ a³xo⁴ bo¹rro¹-no³ ya⁴ ntˀia³cho⁴-ve⁴ cˀia⁴ nca³ ni⁴čhjin³ ni²cja¹ya³, cˀoa⁴ coa⁴nquin¹cao⁴³ nca³ coa⁴nquin¹ ni²cˀio³ na³nta¹.

¹⁶Cˀoa⁴ je² ˀnti¹tso²ti³-le⁴ Abraham xi³ Satanás tsa³cˀe¹nˀion¹-le⁴ čhja³ˀaon²jan² no¹, a³ tsi² tsa² ma³chjen¹ nca³ tjo¹jnta¹ je² chjon⁴²-vi⁴ coi³ ni⁴čhjin³ ni²cja¹ya³.

¹⁷Cˀia⁴ nca³ ti¹tso² je² cjoa⁴-vi⁴, coan³soa³-le⁴ nca³tsˀi³ xi³ co²ntran⁴-le⁴, to⁴nca³ nca³tsˀi³ cho⁴ta⁴ncjin² coan³tsjoa³-le⁴ nca³yi³je³ cjoa⁴ xi³ je³ya³ xi³ Jesús qui³sˀin³.

¹⁸Cˀia⁴ Jesús qui³tso²: Jme¹ xi³ nco¹son² coan⁴-na¹ cjoa⁴te¹xo³ma³-le⁴ Ni³na¹. Jme¹ cjoa⁴ xi³ si³nco¹son²coa⁴.

¹⁹Cˀoa⁴-sˀin² nco³ya³-le⁴ jnco³ ˀnti¹na⁴xin⁴ xi³ tsˀe⁴ mostaza xi³ qui³scoe¹ cho⁴ta⁴. Tsa³cˀe¹ntje² jin³ tso³jmi²ntje²-le⁴. Coan³ntje², cˀoa⁴ jnco³ ya¹ coan³, cˀoa⁴ ni⁴se³ xi³ si¹ma³jin³sen¹ tsa³cˀe¹nta³ˀa³ tje¹-le⁴.

²⁰Cˀoa⁴ qui³tso² nqui²jnco³cˀa²: Jme¹ cjoa⁴ xi³ si³nco¹son²coa⁴ je² cjoa⁴te¹xo³ma³-le⁴ Ni³na¹.

²¹Cˀoa⁴-sˀin² nco³ya³-le⁴ na⁴ˀyo⁴san³ xi³ qui³scoe¹ jnco³ chjon⁴², cˀoa⁴ jan² choa⁴ scoan⁴ nio⁴xti²la⁴ qui³si³cˀo¹jin³ sa³ˀnta³ qui³tsin³jin³ nca³yi³je³ na⁴ˀyo⁴scoan⁴-ve⁴.

²²Jesús ja³ˀa³to³ nca³qui³jnta² na⁴xi⁴na³nta¹ cao⁴ nqui³chao³. Ti¹va³co¹ya³, cˀoa⁴ ti¹fi² ntia⁴² Jerusalén.

²³Jnco³ cho⁴ta⁴ qui³tso²-le⁴: Señor, a³ to⁴choa³ ma³-ni³ xi³ vi³tjo³ntjai². Jesús qui³tso²-le⁴:

²⁴Chˀa²sjao³ nca³nˀion¹-no³ nca³ coi⁴tja¹sˀaon³ xo⁴ntjoa⁴ xi³ nčhˀoe²ya³. Cˀoa⁴xin³-no³ nca³ jon²-vi⁴ nca³ cjai¹ ncjin² xi³ coa⁴sjai³ nca³ cjoa⁴ˀa³sˀen³, to⁴nca³ li²coi³ coan⁴-le⁴.

²⁵Coan⁴scan³-ni³ nca³ je² nˀai³-le⁴ ntˀia³ coi⁴so¹tjen⁴ nca³ cˀoe⁴²chjoa² xo⁴ntjoa⁴, cˀoe¹tsˀia⁴cao⁴³ nca³ coi⁴yo³ nti³tsin³, cˀoa⁴ si⁴cja³ne³tˀao³ xo⁴ntjoa⁴, coi⁴xon¹³: Señor, Señor, ti⁴nto¹ˀai²-na³jin⁴, cˀoa⁴ coi⁴tso⁴-no³: Li²coi³ ˀve³-no³ jña³-ni³ tsaon⁴³.

²⁶Cˀia⁴ cˀoe¹tsˀia⁴cao⁴³ nca³ cˀoa⁴cˀoin¹-lao⁴³: Nqui³xcoin³ tsa³qui³chi³⁴-jin⁴, qui³ˀyoi²⁴-jin⁴, cˀoa⁴ ya⁴ nti⁴tsin⁴-na⁴jin⁴ tsa³ca³co²yai³.

²⁷Cˀoa⁴ je² coi⁴tso⁴-no³: Cˀoa⁴²xin³-no³ nca³ tsi² coi³ ˀve³-no³ jña³-ni³ tsaon⁴³, ti⁴ncha³xin²-nao¹³ nca³tsˀio³, cho⁴ta⁴ xi³ cjoa⁴tsˀen⁴ sˀiaon⁴³.

²⁸Ya⁴ chi¹ˀntao¹³ tsao⁴nao²³ ni⁴ˀño³ cˀia⁴ nca³ jchao³ Abraham, Isaac, Jacob, cao⁴ nca³tsˀi³ xi³ qui³nchja⁴ya³ tˀa³tsˀe⁴ Ni³na¹, xi³ ya⁴ tjio¹ ya⁴ cjoa⁴te¹xo³ma³-le⁴ Ni³na¹. Cˀoa⁴ jon² tˀa³xin²-nio¹³.