Luk 13:9-28

⁹Tama nosali, du walobaso, usu da. Tiali goli e ni haga walisiąbaso, eno gelaibao,’ te gi sę ebo bidigo te po wali,” Jisasgo te po wai.

¹⁰Te Sabat sogo mede Jisas te Juda dabego bomo yai po ola mabo be tomoba pelama, te we bidi dabebolo Godigo po ola mani.

¹¹Tama agai wabo po odali we bidi bidali tomode te tudi basia sali we bidali. Te dwai kauwa bidi mego te we dąų olama, te dwai gasi te we tigide munama elalubadi, tama te kibu be hauwa 18 te tama kibu bede te we tudi basia selama elaluali, te aga bugagia dolo ma dolalugobeo.

¹²Tama Jisasgo te we sulama, agai te webolo i dwasianu weyu, asao wali. Tama te we asobo si da, Jisasgo te po wali, “We, nagede te elalubo gasi te silali dao, nage olo bidao,” wali.

¹³Te Jisas agai nogo si te tudi basia selama te sugą sali wego tigide mubaso, tama polo tama te we tudi debela palu bugagia dolugulualio. Tama te wego Godigo nogi ugaba sali.

¹⁴Te Juda dabego bomo yai po ola mabo be tobolu bidi agai sębę yali, Jisasgo te gasi yai we Sabat sogode dwagi yai ma ilalide. Tama tibaso, te tobolu bidigo te we bidibolo te po wali, “Nogo a naga bidama, e badu nogo deli sogo dago sę ebo usu da. Tama te sogode e bidigo pageba asiąo, agai dagego gasi sia somainu. Tialima, Sabat sogode asigimio,” wali.

¹⁵Te Genuai Bidi Jisasgo te tobolu bidibolo te po wei ponani, “Dage magi ebo bidi dawe? Dagego po mobo mabo da, tiali goli duga po mobo mabo te dagego tibo po dali weyu, te wabo po wali pabo meni. Te dagego wabo po me te ebo kolesaga me deli tigi tiwai si me elalubeo. Te Sabat sogode, dage tigidaligo te duga kibu hos me, te kau kibu me muani madi pelama, te wę tumainu, te duga augwali muani pesage tagalama, te węba odasa pabo da, te Sabat sogode tiaibao. Tama te sę ebo si, dage moni homu ebo meni dao.

¹⁶Me ma, e we da, te polobadu genuai bidi Abrahamgo hani we da. Tama e we te dwai kauwa bidi Satango dąų wali, kibu be hauwa 18 bidali. Eno e we tau salio, e we bugagia sese bidimainu sana palalio. Dwagi yai sę yalio. Eno dwai sę ebeo. Dagego homugo te eno dwai sę yalio, te homu ebawe? Te menio,” Jisasgo te po wali.

¹⁷Tama Jisasgo wali wei ponani po te boi bidi dabe kone palama, tama augwaligo geda muani po me koneama, augwali hale yali. Tiali goli, te we bidi tigidali augwaligo Jisasgo bomai sę yali sulama, augwaligo dwagi yai homu mu yali.

¹⁸Te Jisasgo te we bidibolo e nai mastetde po digi po weyu, te po wali, “Te Godigo we bidi tonalubo sę, te magi sę tiwai dawe? Mena sę agai ebo sę tiwai dawe?

¹⁹Godigo we bidi tonalubo sę te tubo nai nogi mastet ge tiwai dao. Te mastet ge da, te kemeni ge sabi si dao, dwasianunu mu dao. Tama bidi mego te mastet ge selama, agai gide tela yali. Tama te nai wai tedelama, te koliali. Koliama, te genuai holama, te ni tiwai pedelali. Tama te ba dabe augwa be te ni nologode sę yani,” Jisasgo te po wali.

²⁰Te Jisasgo po wadolama weyu, te po ma hanalu wali, “Te Godigo we bidi tonalubo sę te mena sę tiwai dawe?

²¹Godigo we bidi tonalubo sę te tubo nai nogi bret bo dabo nai yis tiwai da. We mego te yis selama, tama tubo plaua hauwa selama, te yis dali plaua dali si taluali. Tama taluama, te plaua tigidali bo dalio,” Jisasgo te po wali.

²²Te Jisas te Jerusalem be naniba pabo ma gagalali. Tama peyu, tomode dwasianu be nani dabeba saboloyu, tama agai te we bidi dabebolo Godigo po ola mani.

²³Tama ebadi yaide, bidi mego aga hanalu wali, “Genuai Bidi, te Godigo ma sabo we bidi nisu nagawe? Hauwa ma sogowe? Deli deli ma sogowe?” wali.

²⁴Te Jisasgo te we bidibolo te po wali, “Te be tų dwasianu goli, dage bomo elama, te sunumi tomoba piąo. Magi baso meni. Eno dagebolo obao. We bidi hauwa Godigo we bidi tonalubo madigi tomoba pai hagede, ebadi, tiali goli te augwali usu egobeo.

²⁵Tama te be page bidi hodaluama, te be sunumi palia sai madigi, tama dage te be mesalode bulu badu dolalueibao. Tama dolalubadi, dagego te be sunumiba bego bego wabo gagalama eyu, te po waibao, ‘Genuai Bidi, tų dayao, da tomoba asaio.’ Tiali goli, agai dagebolo te po wei ponaibao, ‘Dage menadu asaiwe, eno konebeo. Dage eno konebeo.’

²⁶Tama te sogo dagego e po wabo gagalaibao, ‘Woo, dago nage dali nai tuyu, wę tuyu yali. Nago dago be nanide da po ola mani,’ waibao.

²⁷Tiali goli, te be page bidigo dagebolo te po waibao, ‘Eno dagebolo obao, dage menadu asaiwe, eno konebeo. Dage piąo, dage tigidali dwai dwai sę ebo bage, dage enade gedao,’ waibao

²⁸Tama olama, dage tede bidiyu, te polobadu bidali bidi dabe te Abraham me, Aisak me, Jekop me, te Godigo po ola mabo profet bidi dabe me, augwali tigidali Godigo we bidi tonalubo madigi tomode bidibo dagego sueibao. Tiali goli, dage te bulu badu bidaibao. Dage bulu badu bidibaso, dage hwa waibao, duga kele gąųgo ma halua tueibao, te duga sębę ebaso tieibao.