Luka 23:2-25

²Tilo, motong la tipatokode dama ke Pailot, inbe timadit a tisopo koodi panga nen, “Am nga amkaua tool i, yesoo igarung di tooltool kiam lodi ye betanga ki yo iwete nga, le be titoo. Ngan ya in iwetekalam be kin amtar pat pang Sisa be, inbe iwete be ya in Kirisi, tool kuto mai yo be matan kalam am Yuda nga le imot i.”

³Motong la Pailot itoru nen, “Oo kuwete, ong i la tool kuto mai yo matam kala di Yuda le imot i, too?” Ngan Yesu iraua betanga ki nen, “E, dawa ben tina la kuwete koot nga.”

⁴Motong la Pailot iwete pang di tooltool maimai ke paroranga so pang Maro nga, ngan tiye di tooltool malala mai tina ngan nen, “Au i apuske busunu sa yo tool i ikapsap ye, nga tiap.”

⁵Bong ngan di tooltool tina ngan di le imot tiwete le koodi mede. Tiyei ne, “Tiap, ya in ipa le iwakaia tana mai Yudia i le imot, inbe igarung di tooltool lodi ye patomonaingi ki. Ngan ya in imadit ye urata nen ye tana mai Galili, ngan la le ipa so le se pombe ni nga.”

⁶Pailot ilongo tina yo tiwete nen nga, le nga itor di nen, “Ai, ngan tool i ke Galili, too?”

⁷Ye kene tani in Erot, yo iyei tool kuto mai pang Galili i, in iyepe Yerusalem lapau. Le nga yeisa be Pailot ilongo yo Yesu in tool ke Galili nga, motong la iwete a tikauu a ila pang ye Erot.

⁸Ngan kene tani in tikaua Yesu a tila la Erot ikamata, ngan le lon ponana mai san, yesoo bong ilongo bingi ki mukot, le itar matana ye be ikamata pa, a be nen ngan ikamata mos yo be Yesu iyei nga.

⁹Le nga Erot tani in itor kaiye Yesu ye torungu alunu san, bong ngan Yesu irau touo torungu ki tina, ngan siap.

¹⁰Ngan di tooltool maimai ke paroranga so pang Maro, tiye di pannoongoo ke ger ke Maro nga, ngan tilo tikodo lapau, le nga tipamede betanga kidi a tikapye be tiwetewete Yesu a tipaposi ye busunu ki.

¹¹Motong la Erot iye di tooltool ki ke patokongo nga, ngan tipalele sere ye Yesu, inbe tikan paseme. Motong la tisousouu ye sousoungu sallinene dook mata ben ya tool kuto mai nga, inbe tikauu mulu a tila pang ye Pailot.

¹²Ngan muku ngan Pailot iye Erot yaru ngan ben koi, bong ye kene tani in le yaru tigaua lodi dook mata san.

¹³Tipamulu Yesu a ila, motong la Pailot tani in ikiui di tooltool maimai ke paroranga so pang Maro tiye di kuto maimai yo matadi kala di Yuda nga, inbe di tooltool malala mai tina ngan di le imot timan tigaua,

¹⁴inbe iwete pang di nen, “Ang nga kakaua tool i a imulu a iman pang yau, inbe kawete be ya in igarung di tooltool lodi ye patomonaingi ki le be titoo. Bong muku ngan ang le imot kayepe, inbe atoru, ngan le apuske touo busunu sa yo ikapsap ye ben ang kawete nga tiap.

¹⁵Inbe Erot lapau ipuske touo busunu ki siap, ngan la le ipamule a iman pang yidi nga. Le kakamata, tool i iyei touo so sa yo dook tiap ke be nen ngan imata ye, ngan tiap.

¹⁶Le nga ole awete a tisaliti leu, inbe titaru a ila.”

¹⁸Bong ngan di tooltool tina ngan le imot oorootang a koodi nen, “Kuraumata tool in a imata! Inbe kupadu Barabas a isi pang yam.”

¹⁹(Ngan Barabas tani in titaru lo iyepe rumu dook tiap kidi talnga dikidiki lono, yesoo ye kene in ipamaditi patokongo ye di tooltool kuto maimai ke malala mai tani in nga, ngan le iraumata tool atu a imata.)

²⁰Ngan Pailot lono be le ipadu Yesu a ila, le nga koonoo a isadaua di mulu.

²¹Bong ngan di tooltool tina ngan le imot koodi tootoo nen, “Kupatota lo kai palasingi kaini a imata! Kupatota lo kai palasingi kaini a imata!”

²²Motong la Pailot iwete pang di mulu le patol ki nen, “Nga yelei? Soo dada dook tiap tool i ikapsap ye i? Au i apuske touo busunu ki sa yo ikapsap ye, a be nen ngan imata ye, ngan tiap. Le nga ole awete a tisaliti ye koro leu, inbe tiwulaii a ila.”

²³Bong ngan koodi tootoo a timangmang ye Yesu be tipatota lo kai palasingi kaini. Le nga di tooltool tina ngan di le imot oorootang le mai a tirautoo betanga ke Pailot.

²⁴Motong la Pailot tani ilongo betanga kidi tina yo tiwete nen nga, le nga imalum pang di be ole itoo betanga kidi.

²⁵Motong la Pailot ipadu tool talnga dikidiki tani yo tisoror di Rom ngan tipatoko a iraumata tool atu le imata a titaru lo rumu dook tiap kidi talnga dikidiki lono i, in a idu pang ye di. Inbe Pailot isukete Yesu la di tooltool ke patokongo baedi, a nen ngan la tiyeie soo so yo di tooltool tina ngan lodi be tiyeii panga i.