San Lucas 23:2-25

²ába jagúmeserun íchiga lidúnrun, jaríñaga. —Darí wamaali wügǘri le achágaraguágüdaña gürígia, laríñajare luágu moun lan lun wafáyeijan seínsu lun urúei Rómana, aríñagati gíñe luágu ligía lan Crístubei le lanúadirubei Búngiu lun lasálbaruniña gürígia, aríñaga ligía luágu urúei lan ligía.

³Ábati laríñagun Piláto lun. —¿Amǘrüsan Jarúeitebei Juríu? Laríñaga Jesúsu lun. —Ánja, ítara líña quei baríñaguni.

⁴Ábati laríñagun Piláto joun jábutigu fádirigu lúma joun jíbiri gürígia. —Madáritina dúru luágu wügǘri le.

⁵Ábatima jaríñagun jére. —Lachágaraguágüdüñanu sun gürígia Judéana láu ligáburi larúfudajan, lagúmesera Galiléagiñe, niján mémegua adǘgei chülǘ ñájoun.

⁶Dan le lagáambunbalin Piláto cátei le, ába lálügüdajan ánjein Galiléana lubeí wügǘri ligía.

⁷Dánti le jaríñagun lun luágu Galiléana lan, ába loúnajani lun Heródes, le gumándan Galiléa, ladǘga ñíñein Heródes Jerusalén lídan dan ligía.

⁸Ába lagúndaaragun Heródes dan le laríjini Jesúsu, ladǘga agáambañajaali lan luágu áni lǘja labúseerun laríjini, agúrabatiti laríjin ladǘgün ában miláguru.

⁹Ába lálügüdaguni luágu sarágu cátei, moúnabunti Jesúsu ni cáta.

¹⁰Ñíñanu jábutigu fádirigu jáma arúfudajatiña lilúrudun Moisés, magúmuti jíchugun lidúnrun.

¹¹Ábati loúseruni Heródes jáu lisúdaaranigu quei ni cáta, éjeraja jagía láu. Ábati jadáüraguagüdüni táu anáanguni wéndegutu quei lanáangun urúei, ábaya loúnajani Heródes lun Piláto.

¹²Wéyu ligía, ába gamádagua lan Heródes lúma Piláto, lubáragiñe líra, gáganiguañajatiña.

¹³Ábati loúndaruniña Piláto jábutigu fádirigu jáma lúrudugu, jáma buri ámu gürígia,

¹⁴ába laríñagun joun. —Jugúya anǘgübalin wügǘri le nun, jaríñaga luágu chagáguagüda lániña gürígia, álügüdagua náali jigíbugiñe, áni aríja jumúti luágu madári nan ni murúsun dúru luágu lídaangiñe le jaríñagubei luágu.

¹⁵Madáriti gíñe Heródes lidúnrun, giríbugüdalá woun. Aríja jumáali luágu madǘgün lan ni cáta le lúnti lafarún jilágubei lueígiñe,

¹⁶nabeíchagüdali lubeíti, lárigiñeme, ábame nígiragüdüni.

¹⁷Gagáburititi Piláto lúnja lígiragüdün ában adaürǘti fédurugu,

¹⁸ába jagúarajan súngubei lídan ában. —¡Áfarabeí le! ¡Ígiragüdabeí Barabási!

¹⁹Barabási ligía, ladaürǘña lueígiñe ligía lan ában jádaangiñe ja iñúragubaña joúngua luágu gumádi, lúma lueígiñe láfarajan.

²⁰Busénti yebe Piláto lígiragüdüni Jesúsu, ábaya ladímurejan joun,

²¹ligíatima jagúaragun. —¡Dáguabeí luágu gurúwa! ¡Dáguabeí luágu gurúwa!

²²Ába laríñagun Piláto joun luágu lǘrüwan weíyaasu. —¿Cáti wuríbati ladǘgübei? Madáritina ni cáta le lúnti lafarún jilágubei lueígiñe. Nabeíchagüdali, ábame nígiragüdüni.

²³Ábatima jagúarajan lun ládarawagún luágu gurúwa, jéretiti jagúarajan jagía jáma jábutigu fádirigu, ába jabíjini le jabúseerubei.

²⁴Ábagubeíti ladǘgüni Piláto le jabúseerubei,

²⁵ábati lígiragüdüni wügǘri le jabúseerubei, le adaürǘbei lueígiñe iñúraguni lúma áfarajani, ábati ledéregeruni Jesúsu joun lun jadǘgüni jagúndan láu.