San Lucas 23:2-25

²Jare umbɨpɨ reta uñeapo Jesús re. Jei reta: —Cua cuimbae umɨmbeu tenta guasu pegua reta pe uyapo vaerã icavi mbae vae. Echa'ã jei chupe reta agüɨye vaerã umbɨepɨ corepoti César peguarã. Jare jei jae co mburuvicha guasu Cristo jee vae —jei reta.

³Jayave Pilato upɨrandu Jesús pe: —¿Nde pa co jae judío reta juvicha guasu? —Nde ndere rami jae co che —jei Jesús chupe.

⁴Jayave Pilato jei sacerdote reta itenondegua reta jare tenta guasu pegua reta pe: —Avãe'ã teco cua cuimbae re.

⁵Jayave jae reta jeiete jei: —Omboepochɨ tenta guasu pegua reta. Oporomboe opaete Judea rupi. Umbɨpɨ Galilea pe jare añave ou uvãe cua pe oporomboe oĩ —jei reta.

⁶Pilato uyandu yave jei reta vae, upɨrandu penti Galilea pegua ra jocua cuimbae.

⁷Jayave umɨmbeu reta Pilato pe Galilea pegua co Jesús. Jayave Pilato güɨraaca Jesús Herodes pe. Echa'ã Herodes co jae Galilea pegua reta juvicha guasu. Jare jocua ara reta pe Herodes opou oĩ Jerusalén pe.

⁸Jare Herodes uecha Jesús yave, uyerovia ete, ɨma ma uipota uecha ramo. Echa'ã uyandu ma jeta Jesús regua, jare uipota uecha Jesús uyapo penti mɨacañɨ.

⁹Jayave Herodes upɨrandu Jesús pe jeta mbaembae re, ẽrei Jesús jei'ã mbae ave chupe.

¹⁰Jare sacerdote reta itenondegua reta jare mboroyocui re oporomboe vae reta uyemboɨ Herodes jovai jare iñeeãta reve uñeapo Jesús re.

¹¹Jare Herodes jare isundaro reta güɨrɨ̃ro jare oyoyai Jesús. Jayave omondeca chupe temimonde ipõra vae. Jayave Herodes güɨraaca ye Pilato pe.

¹²Jare jocua ara etei Pilato jare Herodes uyeyapɨcatu ye. Echa'ã tenonde yave uñemɨtarẽɨ.

¹³Jayave Pilato umbatɨca sacerdote reta itenondegua reta jare tenta guasu pegua reta itenondegua reta ndive.

¹⁴Jare jei chupe reta: —Pe reta peru cua cuimbae cheve jare pere cheve omboepochɨ co tenta guasu pegua reta. Mase, che apɨrandu chupe jocua re perovaque, jare avãe'ã etei teco jocua pe reta piñeapo cheve jese vae re —jei—.

¹⁵Jae ramiño vi Herodes uvãe'ã teco cua cuimbae re. Echa'ã che pomondo Herodes pe. Mase, mbaetɨ mbae teco uyapo umano vaerã —jei Pilato chupe reta—.

¹⁶Jáeramo ainupacañota jare ayoraca yeta —jei.

¹⁷Echa'ã opa año tenta guasu pegua reta uyerure chupe oyoraca vaerã penti pereso pascua ara rupi, jare Pilato oyoracañoi penti pereso.

¹⁸Jayave opaete vae iñeeãta reve jei: —Iyucaca cua cuimbae. Iyoraca oreve Barrabás —jei reta.

¹⁹(Tenonde yave Barrabás upuruyuca Jerusalén pe, mburuvicha reta ndive uñerãro yave. Jáeramo umɨingue peresorɨru pe.)

²⁰Ẽrei Pilato uipota tẽi oyoraca Jesús. Jáeramo jei ye chupe reta.

²¹Ẽrei iñeeãta reve jei reta: —Icutuca curusu re. Icutuca curusu re.

²²Jayave Pilato upɨrandu ye chupe reta: —¿Mbae pa uyapo? Avãe'ã mbae icavi mbae vae jese umano vaerã. Jáeramo ainupacañota jare ayoraca yeta —jei.

²³Ẽrei jeiete iñeeãta reve jei reta uicutuca vaerã Jesús curusu re. Jare sacerdote reta itenondegua reta jare ĩru joco pe ñugüɨnoi vae reta iñee umɨquɨrẽɨ Pilato.

²⁴Jayave Pilato jei uyeyapo vaerã Jesús pe jae reta uipota vae.

²⁵Jayave oyoraca chupe reta tenonde yave mburuvicha reta ndive uñerãro yave upuruyuca ramo peresorɨru pe umɨingue vae, jae reta uipota rami. Ẽrei umee Jesús chupe reta uyeyapo vaerã chupe jae reta uipota vae.