Luka 17:20-35

²⁰Farisaio jaŋe Jesu wiocnerâ mumbiŋ: “Anuture uucmaŋ wezimucko fua tâcneocmu?” Eme jazawec: “Anuture uucmaŋ tâtâc mi fuaocmu,

²¹irec wemocko honerâ ʒiŋuc muzo: ‘O ʒira fuakac, o ocna fuakac.’ Manaŋgopieŋ, Anuture uucmaŋ i ŋondeŋ‐ŋeŋicko fuawec fokac.”

²²Erâ motecfâcne ʒiŋuc jazawec: “Juku dameŋ moc maickeocmu ira Ŋic Fâri Wâtuŋne e ʒoaŋ mocjaha tâtâcko fuame honeniŋte eŋare‐bipieha sifu mi honeniŋmu.

²³Dameŋ ira kecʒiŋuc ŋazaniŋmu: ‘O ʒira nâŋerao fuakac, o ocna jaŋerao fuakac.’ Mupie mi ranʒepieŋ â manapie jâmbomac mi ezejec.

²⁴Bâbâric e sambâŋ ŋifec bâricneme ŋifec qâninipe‐fâreekac, irec sâc Ŋic Fâri Wâtuŋne ere fifisi fuazokac.

²⁵Qanaŋ ine ŋicguru ʒi jaŋe Ŋic Fâri Wâtuŋne râpeckepie ʒâic gie sâko baocte mucnekicne.

²⁶Noa juwec dameŋ ira ŋic jaŋe wiac embiŋ ijaha Ŋic Fâri Wâtuŋne ere fifisi dameŋ maickeha enʒoŋgopieŋ.

²⁷Jaŋe nânâ qowi nâmbiŋ, huc ʒocʒu nâmbiŋ, ŋokac nareŋ gareŋ embiŋ. Qâoma iŋuc hâcne ehuc juhapie Noa wokeo feme rumi sâkozi fisirâ ʒeŋgoma bârârâŋ‐jopawec.

²⁸Â Loti juwec dameŋ ira iŋuc jaha embiŋ. Jaŋe nânâ qowi huc ʒocʒu i nâmbiŋ, wiac nareŋ gareŋ i embiŋ, gie hesac qasarac i embiŋ, fic gie bapa i bambiŋ.

²⁹Iŋuc ehuc juhapie Loti e Sodom hae râpeckeme sambâŋkonec kâmbâc â ʒoc wahame ŋic ʒeŋgoma sipirickembiŋ.

³⁰Ŋic Fâri Wâtuŋne e juku fua taniŋkezokac dameŋ ira ŋic jaŋe sâc ijaha eniŋmu.

³¹Eme ira moc e hae ʒoŋao juocmuzi ficmaŋ‐ticnao mi risie ferâ mafa‐ticne rozejec, â moc e gieo juocmuzi haeo mi risiezejec.

³²Ŋoŋe Loti ŋonâŋ‐ticnere manasunʒepieŋ.

³³Moc e juju‐ticne ŋezickezo mume sifuckecneocmu, â moc e juju‐ticne qikiŋneme e fuacneocmu.

³⁴No mupe mananiŋ, ŋafe ira ŋic jajahec fofo wirec fohapire moc rohuc moc qikiŋnezo.

³⁵Ŋokac jajahec nânâ sufiehuc ŋehapire moc rohuc moc qikiŋnezo.