Luk 7:17-38

¹⁷Ra a wasiso ri un o Iesu i wan sarara tong una papor Judia rop, ma a kum tamon milau kai.

¹⁸A kum nat na ususer anun o Jon a Tene Baptaiso det inanosi una kum utna rop ri o Iesu i pami. O Jon i kabo pas aru tagun det,

¹⁹ra i tulu ru der torom a Labino sur der in tingi lena, “Ui mo ra di wasiso mugu taru un ui lena, un nanpat, o met in kis langlang utmakai sur taio?”

²⁰Ra der wanpat torom o Iesu, der watungi lena, “O Jon, a Tene Baptaiso i tulu ru mir torom ui, sur mir in ting ui lena, ‘Ui mo ra di wasiso mugu taru un ui lena, un nanpat, o met in kis langlang utmakai sur taio?’”

²¹Una du bung ut ra, o Iesu i ulangolango pas a susut gusun anundet a kum ngunungut ma a kum misait, ma i lakro ru a kum laulau na nion gusun det, ma i utamtama pas a susut na pulu.

²²Ma i balu der lena, “Mur in milet melet, ma mur in inanos o Jon una sau ri mur sa tama tari, ma mur sa longoro tari: A kum pulu det sa tamtama, det ra a kikindet i mat det sa wan tokodos, a kum lepra det sa langolango, a kum kutkut det sa longoro, a kum minat det sa laun, ma di warawai nama Wakak na Wasiso torom a kum sibo na taro.

²³Osi ra i tama a kum utna ri a pami ma anun a nurnur ke puku, i sa dan.”

²⁴Ra aru nat na ususer anun o Jon der wan, o Iesu i inanos a kunur na taro un o Jon lena, “Una bung ra mot wan una nubual kalako taro uni torom o Jon, asau ra mot tamtama suri? Kutiro in nere ra i erere una wuwu? Awu.

²⁵Asau ra mot wan sur mot in tama i? A musano ra i emar nama kum wakak na malu? Awu. Tama i, det ra det ser emar nama kum wakak na malu, ma det dan nama kum wakak na utna, det ser kis una kum rumu na king.

²⁶Asau ra mot wan sur mot in tama i? A poropet? Ma! A watungi tamot, o Jon i labo sakit taun a kum poropet.

²⁷Di sa tumtumus taru uni, una Buk Tabu lena, ‘Tama i, iau an tulu ru anung a tene los wasiso sur in mugu tam, i ra in waninar anum a kisapi numugu tam.’

²⁸A watungi tamot, o Jon i labo sakit taun a taro rop taginin upiso. Ikut osi ra i natino sakit una matanitu anun o God, i labo taun o Jon.”

²⁹Ra a taro rop det longoro i, ma a kum tene los takis kai, det mulaot una tokodos na kisapi anun o God, uni det sa los pas a baptais anun o Jon.

³⁰Ikut a kum Parisi ma a kum tene ususer tagun a Warkurai det rosumur gusun a kisapi ra o God i pitari torom det, uni ka det los a baptais anun o Jon.

³¹Ma o Iesu i watungi lena, “An elaro a taro tagun uniri nama sau? Det elar nama sau?

³²Det elar nama kum nat liklik ra det kis una balano tamon ma det kakabo torom det etetalai lena, ‘Met wup tulal, ikut ka mot lagori, ma met kele a kelekele na tupunuk, ikut ka mot tangis.’

³³O Jon a Tene Baptaiso i wanpat, ke wan tu wakak na utna ma ke inum a wain, ra mot watungi uni lena, ‘A laulau na nion kura uni.’

³⁴A Nutun a Musano i wanpat, i wangon ma i inum, ra mot watungi uni lena, ‘Tama i, a musano ri a tene inangon ma a tene ininum, a pasan a kum tene los takis, ma a kum tene sakino.’

³⁵Ikut a taro rop ra det mur a mananos anun o God, det upuaso i lena, anun a mananos i a mananos mulus.”

³⁶Ara Parisi i ben pas o Iesu sur det in nangon tomo. O Iesu i ruk una rumu anun a Parisi, ma i kis sur der in nangon.

³⁷Ma ara ino tagitiro una tamon ra, a tene sakino. Ra i sa tasmani lena, o Iesu kura i wangon una rumu anun a Parisi, i ruk namin nopolo sangsangnain ra kura unin nokoto ra di pami nama wat.

³⁸Ma i tur taru numur tan o Iesu, nisan aru kikino. I tangis, ra a lurlur na matano i puku una ru kikin o Iesu, ma i wus der nama iwu na lorino, i gom der, ma i lingis in nopolo sangsangnain un der.