Lukas 7:17-38

¹⁷No ka sikan no nangnangonon ligkat to nighimu ni Hisus, naalap dio to tibo no mgo lunsud duon to sikan no ugpaan woy dio to tibo no mgo ugpaan no marani.

¹⁸Ka mgo hibatoon ni Huan no Talagbautismu, nigdinog to tibo soini no mgo hinimuan ni Hisus no dio dan nangoni si Huan to pirisuan.

¹⁹Nò, nigpoumow ni Huan ka darua no hibatoon din, no pogkouma ran, nigpohondio din on to ki Hisus oyow og-insaan dan sikandin to, “Sikoykow buwa ka Igbuyag no innangon ni Huan to ogpohondini on to Magboboot to kanami woy ko duon pad loin no otow no ogtagaran noy?”

²⁰Pogkouma ran dio ki Hisus, kagi ran, “Si Huan, no Talagbautismu, kandin ka nigsugu kanami dini to koykow su oyow og-insaan ka ko sikoykow buwa ian ka innangon din no igbuyag no igpohondini to Magboboot woy ko duon pad loin buwa ka ogtagaran noy?” kagi to mgo hibatoon ni Huan.

²¹Nò, duon pad dio ki Hisus ka mgo hibatoon ni Huan to nigbawian on ni Hisus ka mohon-ing no mgo otow no mohirap on ka dalu ran. Songo nigdogil din ka busow to duma no mgo otow. Lagkos, mohon-ing ka nabutud no nigbawian din no nakakita on.

²²Nigtabak si Hisus to mgo hibatoon ni Huan to, “Uli kow on dio ki Huan woy nangoni now sikandin to tibo no pigkita now woy pigdinog now kuntoon. Inangon now to ogpakakita on ka mgo nabutud, ogpokohipanow on ka mgo napulid, woy nabawian on ka kogang dut mgo ibungon; warad on ka igkaligsomi ran. Ogpakarinog on ka mgo nabongol woy ogkabuhi on ka mgo nammatoy. Woy songo ognangonan ku ka mgo publi to soini no Maroyow no Nangnangonon ligkat to Magboboot.”

²³Nigparagas si Hisus to kagi rin to mgo hibatoon ni Huan to, “Napulusan ka otow no kono no limanglimang ka goinawa ran to sikoddi ka impohondini to Magboboot.”

²⁴To nighipanow on ka mgo hibatoon no pigsugu ni Huan, kagi ni Hisus to mgo otow no mohon-ing tongod ki Huan to, “Nokoy ka noiniatan now to pogpitow now nokani no nighondio kow to holholawan? Og-inso a kaniu ko ian inhondio now su oyow ogpitawon now ro ka tibogow no ogkabanloybanloy to kalamag?

²⁵Ko kono, nokoy pad,” kagi ni Hisus, “ka inhondio now? Ka otow no ogpokoilis to maroyow lagboy no kinabo dan? Ka mgo otow no og-ilis to mahal no kinabo woy madmaroyow ka pog-ugpo dan, dio atag og-ugpo to mgo baloy to mgo datu,” kagi ni Hisus.

²⁶“Nokoy naan ka inhondio now to sikan no holholawan? Og-inso a kaniu ko ian do ogpitawon now porom ka sagboka no talagnangon to kagi to Magboboot? Hoo,” kagi ni Hisus, “Ognangonan ku sikaniu to labow pad to talagnangon ka nakitaan now

²⁷su bahin ki Huan ka inpasulat to Magboboot dongan no kagi to Magboboot, ‘Ogpohun-oon ku koykow ka suguonon ku oyow kandin ka ogpanagana to dalan no ogbayaan nu.’ ”

²⁸Nigparagas si Hisus nigkagi to, “Ka ignangon ku kaniu, agad kon-u, waro otow kai to tano no labow pad ki Huan. Dokad di, sikan no otow no doisok do ka katondanan din di sakup sikandin to Pogsugu to Magboboot, labow pad sikandin ki Huan.” kagi ni Hisus.

²⁹“Ka tibo no mgo otow no namminog ki Huan, ogmaroyawon dan ka Magboboot. Agad ka mgo talagkubla to buhis, songo nigpaagad-agad to nangnangonon din woy nigpabautismu sikandan ki Huan dio to woig to Hordan.

³⁰Dokad di ka mgo Parisiu woy ka mgo talag-anad to Balaod to mgo Hudiu, nigsamilian dan ka tuud to Magboboot kandan poron su waro nigbogoy to ogbautismuan sikandan ni Huan.”

³¹Nigparagas si Hisus to, “Nokoy pad buwa ka ogpounawaan ku ka kuntoon no mgo otow?

³²Ogkounawa sikandan to mgo bato no ogpinpinnuu dio to palingki no nigpatabtabakoy no ogbabansagon. Kagi to songo puntuk dio to dangob no puntuk, ‘Nigpanaluroy koy, di waro kow nigsayow. Nigpandalawit koy, no waro kow nigsinogow,’ kagi to mgo bato.

³³Si Huan no Talagbautismu, niglangkad to nigkoon woy waro nig-inum to inumanon, di nigdoot now sikandin to kagi now to, ‘Pigbusawan sikandin.’ ”

³⁴Kagi ni Hisus, “Koddi no ian Kakoy to Koot-otawan kai to tano, nighondini ad to kaniu no nigkoon ad dio to mgo pagkoonan now woy nig-inum a rod to inumanon di songo nigdoot a now to kagi now to, ‘Tungulon ka soini no lukos woy palainum, woy amigu sikandin to mgo talagkubla to buhis woy mgo otow no makasasalo.’ Sikan ka ogkagion now,” kagi ni Hisus.

³⁵“Dokad di, ka natouan to Magboboot, nakitaan to malogot naan dio to tibo no ogpakatinawo kandin,” kagi ni Hisus.

³⁶Duon sagboka no otow to mgo Parisiu no intugun din ki Hisus to oyow dio ogkoon to kandin no baloy. Nighondio si Hisus woy nigsolod on to baloy to Parisiu woy nighibat to kilid din dio to ogkoon.

³⁷No, duon songo boi to sikan no lunsud no maroot ka oghimuon din. Nigdinog to dio ogkoon si Hisus to baloy to sikan no Parisiu. Sikan ian no nig-alap din dio ka taguanan no nohimu to kalasi no batu no oghingaranan to alabaster no naponu to ogkounawa to lana.

³⁸Duon do nigsasindog ka boi to longod to paa ni Hisus no nakasinogow on sikandin. Nasubid on ka paa ni Hisus no nigtuluan to luwo to boi, no nigpunasan to boi ka paa rin to bulbul din. Napongaan din on to nigpunas, nigharokan din ka paa rin woy nigbus-ugan din on ka paa rin to sikan no mohomut no ogkounawa to lana no nig-alap din.