Luk 3:3-36

³Kɔ Saŋ ɔŋkɔt sədare sa Yurdɛn fəp, pəc-kawandi kəgbət afum dəromun teta kəsəkpər mera yaŋan, ŋacəmɛ pəlompu darəŋ, ntɛ tɔŋsɔŋɛ Kanu kəŋaŋnɛ ŋa kiciya kəŋan mɔ.

⁴Pəmɔ tɔkɔ aŋcic mi nde buk ba moloku ma wədəŋk wəka Kanu Esayi mɔ: «Dim da wəkɔ eyi kəkulɛ-kulɛ nde dətɛgbɛrɛ mɔ dɔ: Nəlompəs dɔpɔ da Kanu Kəpɔŋ, Nəlompɛ mɔpɔ mɔn!

⁵Andelas mɔrɔ dacɔ fəp, mɔrɔ kɔ pəŋeci fəp yendetor, Səpɔ sənutəsnɛ fəp səndelomp, Səpɔ səcumbul-cumbul fəp, andeyukur si,

⁶Afum fəp ŋandenəŋk kəyac ka Kanu.»

⁷Afum alarəm akɔ ŋaŋc-der nkɔn Saŋ pədegbət ŋa dəromun mɔ, ŋɔ oŋc-loku ti: «Nəna aŋɛ nəyi pəmɔ bok mɔ! Anɔ ɛtəks’on kəyɛksər ka mɛtɛlɛ mmɛ mender mɔ-ɛ?

⁸Nəmentər dəmɔyɔ a nəŋsəkpər mera, kɔ nəŋcəmɛ pəlompu darəŋ. Nəsak kəc-lokunɛ: ‹Abraham ɔyɔnɛ wətem kosu.› Bawo ic-lok’un a Kanu kəntam kəkafəli masar mamɛ awut a Abraham.

⁹Ndɛkəl oŋ tomunt tɛfaŋ kəcop kəcɛpəs tɔk haŋ ntɛntəl ya yi: Kətɔk nkɛ o nkɛ kətɔkom yokom yɔtɔt, aŋcɛp ki paləm ki dənɛŋc.»

¹⁰Kɔ cəgba ca afum cəyɛfɛ kəyifət kɔ: «Cəke cɔ səndeyɔ oŋ-ɛ?»

¹¹K’oloku ŋa: «Məna nwɛ məŋyɔ suma mɛrəŋ mɔ, məpocɛ wəkɔ ɔntɔyɔ mɔ, məna nwɛ məŋyɔ yeri mɔ, məpocɛ wəkɔ ɔntɔyɔ mɔ.»

¹²Kɔ abaŋəs dut ŋander a Saŋ pəgbət ŋa dəromun, ŋac-yifət kɔ: «Wətəksɛ, cəke cɔ pəmar sədeyɔ oŋ-ɛ?»

¹³K’oloku ŋa: «Ta nədeŋər mpɛ o mpɛ antɔlok’un kəbaŋ mɔ.»

¹⁴Kɔ asɔdar ŋayif kɔ sɔ: «A səna-a, cəke cɔ pəmar səyɔ oŋ-ɛ?» K’oloku ŋa: «Ta nəmentər nwɛ o nwɛ fənɔntər, ta nədeŋɛ sɔ nwɛ o nwɛ yem, kəway konu kətəŋn’on.»

¹⁵Ntɛ afum fəp ŋanayi kəkar mɔ, kɔ ŋaŋyifnɛ dəbəkəc kɔ pəyɔnɛ bafɔ Saŋ ɔyɔnɛ Krist, nwɛ Kanu kəpɔŋ kəyɛk-yɛk mɔ.

¹⁶Kɔ Saŋ oloku ŋa: «Ina dəromun iŋgbət’un de, mba wəlɔma eyi kəder nwɛ ɔyɔ fənɔntər pətas’im mɔ, ali cɔfta cɔn iyɔ fɛ dofum ndɛ pəmarɛ isikəli ci mɔ. Wəkakɔ, Amera Ŋecempi ŋa Kanu disrɛ kɔ nɛŋc yɔ ende pəc-gbət’un.

¹⁷Pətɔmpər kəgbo kɔn pəc-fɛŋət kur kɔn; endecɛŋ-cɛŋ yika nyɛ endecɔfɛ nɛŋc ndɛ dɔntɔdenimɛ mɔ, pəlɛk malɔ mɔn pəbɛr dəkɛlɛ.»

¹⁸Saŋ oŋc-loku sɔ afum moloku mɔtɔt pəc-yeŋkəs ŋa sɔ bəkəc bel-bel.

¹⁹Mba kɔ Saŋ ɛnal wəbɛ Herodu teta Herodiyas, wəran nwɛ ɛnabaŋər wɛŋc k’ɛnɛŋcɛ mɔ, kɔ teta mes mɛlɛc mɔkɔ Herodu ɛnayɔ mɔ.

²⁰Kɔ Herodu ende pənaŋkanɛ kələsər: k’osumpər Saŋ, k’ɛmbɛr kɔ dəbili.

²¹Ntɛ afum ŋasɔtɔ kəgbət dəromun mɔ, kɔ Yesu nkɔn sɔ ɔsɔtɔ kəgbət dəromun. Eyi kəlok-lokər Kanu, kɔ kɔm kəŋgbitɛ,

²²kɔ Amera Ŋecempi ŋa Kanu ŋontorər kɔ, ŋɛtəŋkəlɛ dis d’ abɛmp, pəmɔ antantoriya. Kɔ dim dontor kəyɛfɛ dareŋc: «Wan kem nwɛ imbɔtər mɔ məyɔnɛ, pəbotu pem fəp pɔ imbɛr’əm.»

²³Yesu ɛnasɔtɔ meren 30, a pədecop yɛbəc yɔn. Wan ka Isifu ɛnayi pəmɔ tatɔkɔ anacɛm-cɛmnɛ ti mɔ, wəka Heli,

²⁴wəka Matat, wəka Lewy, wəka Melki, wəka Yannay, wəka Isifu,

²⁵wəka Matatiyas, wəka Amɔs, wəka Nahum, wəka Hesəli, wəka Nakay,

²⁶wəka Mahat, wəka Matatiyas, wəka Semeyin, wəka Yosɛk, wəka Yoda,

²⁷wəka Yohanaŋ, wəka Resa, wəka Sorobabɛl, wəka Salatiyɛl, wəka Neri,

²⁸wəka Melki, wəka Adi, wəka Kosam, wəka Ɛlmadam, wəka Er,

²⁹wəka Yesu, wəka Eliyɛsɛr, wəka Yorim, wəka Matat, wəka Lewy,

³⁰wəka Simɔŋ, wəka Yuda, wəka Isifu, wəka Yonam, wəka Eliyakim,

³¹wəka Meleya, wəka Mɛnna, wəka Matata, wəka Natan, wəka Dawuda,

³²wəka Yisay, wəka Obɛd, wəka Bɔs, wəka Sala, wəka Nasɔŋ,

³³wəka Aminadabu, wəka Admin, wəka Arni, wəka Hɛcəron, wəka Perɛc, wəka Yuda,

³⁴wəka Yakuba, wəka Isiyaka, wəka Abraham, wəka Terah, wəka Nahor,

³⁵wəka Seruk, wəka Rehu, wəka Pɛlɛk, wəka Heber, wəka Sala,

³⁶wəka Kayinan, wəka Arpaksadu, wəka Semy, wəka Nuha, wəka Lɛmɛk,